ول اۋداندىق اكىمدىكتىڭ مالىمەتىنە سۇيەنىپ، ميتينگگە 50-60 ادام قاتىسقانىن، كوپشىلىگى ات-باشى بازارىندا ساۋدا جاسايتىندار ەكەنىن، ءاربىر اۋىلدان 2-3 ادام كەلگەنىن ايتتى.
– نەگىزگى تالاپتارى – يندۋستريالىق ساۋدا-لوگيستيكالىق ورتالىقتى جۇڭگو ينۆەستورلارىنىڭ سالىنۋىنا قارسىمىز، ونى ءوزىمىزدىڭ قىرعىز كاسىپكەرلەرى سالسىن دەپ تالاپ ەتىپ وتىر.
ات-باشىداعى شەكاراعا جاقىن ايماقتا ورتالىق قۇرۋ جوباسىن ىسكە اسىرۋشى «ات-باشى قىرعىز-قىتاي ەركىن ساۋدا ايماعى» كومپانياسىنا قىتايلىق ليۋ ين جانە قىرعىزستاندىق ەميلبەك ابدىكادىروۆ يەلىك ەتەدى. قىرعىز كاسىپكەرىنىڭ ايتۋىنشا، لوگيستيكالىق ورتالىقتى سالۋ ءۇشىن ليۋ ين 280 ميلليون دوللار ينۆەستيسيا جاساماق. باسقاشا ايتقاندا، مەملەكەتتەن ەشقانداي كەپىلدىك كەلىسىمدەرى جوق.
قۇرىلىسقا قارسى بولعاندار لوگيستيكالىق ورتالىق سالۋ ءۇشىن بولىنگەن جەر كەيىن قىتايعا ءوتىپ كەتەدى دەپ قاۋىپتەنەدى.
2000 جىلدىڭ باسىنان بەرى جەرگىلىكتى بيلىك ات-باشىعا ساۋدا تەرمينالى سالىناتىنىن ايتىپ، ينۆەستور ىزدەپ كەلەدى.
