قازاقستاندا قىمباتشىلىق قوعامدا قىزۋ تالقىلانىپ كەلەدٸ. كەيٸنگٸ جىلدارى رەسمي ينفلياتسييا كٶرسەتكٸشٸ مەن حالىقتىڭ ناقتى سەزٸنگەن باعا ٶسٸمٸ اراسىنداعى ايىرماشىلىق ازايعانىمەن, كٷندەلٸكتٸ تۇتىناتىن تاۋارلار قىمباتتاۋى - جۇرتشىلىق ٷشٸن ەلٸ دە ٶزەكتٸ مەسەلە. ساراپشىلاردىڭ ايتۋىنشا, ەسٸرەسە, ازىق-تٷلٸك باعاسى ٶسۋٸ جالپى ينفلياتسييا دەڭگەيٸنە ايتارلىقتاي ەسەر ەتٸپ وتىر, دەپ حابارلايدى Dalanews.kz.
رەسمي دەرەككە سەيكەس 2025 جىلى ەلدەگٸ ينفلياتسييا دەڭگەيٸ 12,3% بولعان. ال ازىق-تٷلٸك ينفلياتسيياسى 13,5%-عا جەتٸپ, جالپى باعا ٶسٸمٸنە ەڭ ٷلكەن ٷلەس قوسقان نەگٸزگٸ فاكتورلاردىڭ بٸرٸنە اينالدى. بۇل كٶرسەتكٸشتەر حالىقتىڭ كٷندەلٸكتٸ شىعىنى ارتىپ بارا جاتقانىن كٶرسەتەدٸ.
ساراپشىلار ينفلياتسييا جوعارى بولۋىنا بٸرنەشە سەبەپتٸ اتاپ ٶتەدٸ. ەڭ الدىمەن, تۇتىنۋ قورجىنىنا كٸرەتٸن تاۋارلاردىڭ ەدەۋٸر بٶلٸگٸ يمپورتقا تەۋەلدٸ. سوندىقتان ۆاليۋتا باعامىنىڭ ٶزگەرۋٸ ٸشكٸ نارىقتاعى باعاعا تٸكەلەي ىقپال ەتەدٸ. 2025 جىلى تەڭگە ەلسٸرەۋٸ يمپورتتىق ٶنٸمدەر قىمباتتاۋىنا ەكەپ سوعىپ, ەلەكترونيكا مەن تۇرمىستىق تەحنيكانىڭ باعاسى 20–30%-عا دەيٸن ٶسكەن.
ەكٸنشٸ ماڭىزدى فاكتور - حالىق باس تارتا المايتىن تاۋارلار مەن قىزمەتتەر قىمباتتاۋى. ازىق-تٷلٸكپەن قاتار كوممۋنالدىق قىزمەتتەر مەن جانارماي باعاسىنىڭ ٶسۋٸ تۇتىنۋشىلاردىڭ شىعىنىن ارتتىرىپ وتىر. بۇل ساناتتاعى تاۋارلار سۇرانىسى تۇراقتى بولعاندىقتان, ولاردىڭ باعاسىنىڭ ٶزگەرۋٸ جالپى ينفلياتسيياعا قاتتى ەسەر ەتەدٸ.
ٷشٸنشٸ سەبەپ: اقشا-كرەديت ساياساتىنىڭ ەسەرٸ بٸردەن بايقالمايدى. بازالىق مٶلشەرلەمە ٶزگەرگەنٸمەن, بانكتەر نەسيە مەن دەپوزيت شارتتارىن بٸردەن جاڭارتپايدى. سونىڭ سالدارىنان تۇتىنۋشىلىق نەسيە بەلسەندٸلٸگٸ ساقتالىپ, ينفلياتسييالىق قىسىم جالعاسادى.
مامانداردىڭ پٸكٸرٸنشە, ينفلياتسييانى تٶمەندەتۋ ٷشٸن كەشەندٸ شارالار قاجەت. وعان كوممۋنالدىق تاريفتەردٸ كەزەڭ-كەزەڭٸمەن رەتتەۋ, تۇتىنۋشىلىق نەسيەلەۋدٸ باقىلاۋ, ماكروەكونوميكالىق تۇراقتاندىرۋعا باعىتتالعان ۇزاقمەرزٸمدٸ باعدارلامالاردى جٷيەلٸ ٸسكە اسىرۋ جاتادى.
