2022 جىلى 1 ماۋسىمدا قازاقستان رەسپۋبليكاسىنىڭ پرەزيدەنتى قاسىم-جومارت كەمەل ۇلى توقايەۆ ءال-فارابي اتىنداعى قازاق ۇلتتىق ۋنيۆەرسيتەتىنە ارنايى كەلىپ، قىزمەتىمەن تانىستى.
ساپارى بارىسىندا پرەزيدەنت قازۇۋ قالاشىعى قۇرىلىسى ءىى كەزەڭىنىڭ باس جوسپارىنا ۇلكەن قولداۋ ءبىلدىرىپ، بەكىتكەن بولاتىن.
قازۇۋ قۇرىلىسىنىڭ ءىى كەزەڭىن باستاۋ شاراسىنا ق ر عىلىم جانە جوعارى ءبىلىم ءمينيسترى ساياسات نۇربەك، الماتى قالاسى اكىمىنىڭ ورىنباسارى الىشەر ءابدىقادىروۆ، قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ، بيزنەس جانە عىلىم وكىلدەرى، ەلىمىزدەگى جوعارى وقۋ ورىندارىنىڭ رەكتورلارى، ءىرى كومپانيا باسشىلارى قاتىستى.
جيىندا ءسوز العان ق ر عىلىم جانە جوعارى ءبىلىم ءمينيسترى ساياسات نۇربەك بۇگىنگى باستامانىڭ تاريحي وقيعا ەكەنىن ايتتى.
«قازۇۋ-دىڭ تاريحى تەرەڭدە. وقۋ ورداسى العاش اكادەميالىق قالاشىق مودەلىمەن سالىنعان بولاتىن. 1974-75 جىلداردان كەيىن ۋنيۆەرسيتەتكە كەڭ كولەمدە ينۆەستيسيا قۇيىلماعان. سوندىقتان بۇگىنگى شارانىڭ ماڭىزدىلىعى وتە جوعارى. جوسپاردى مەملەكەت باسشىسى قاسىم-جومارت كەمەل ۇلى قولداپ وتىر. قارا شاڭىراق قازۇۋ-دىڭ ەكىنشى تىنىسى اشىلدى دەۋگە بولادى»، – دەدى مينيستر.
شارا بارىسىندا الماتى قالاسى اكىمىنىڭ ورىنباسارى الىشەر ءابدىقادىروۆ ءسوز سويلەپ، قازۇۋ ۇجىمى مەن ءبىلىم الۋشى جاستارىن ايتۋلى كۇنمەن قۇتتىقتادى.
ءوز كەزەگىندە ۋنيۆەرسيتەت رەكتورى جانسەيىت تۇيمەبايەۆ قازۇۋ قۇرىلىسىنىڭ ءىى كەزەڭىن جۇزەگە اسىرۋ ستۋدەنتتەر ءۇشىن جاسالىپ جاتقان باستاما ەكەنىن جەتكىزدى.
«قازۇۋ ەلىمىزدەگى ىرگەلى، كوشباسشى وقۋ ورنى رەتىندە الەمگە تانىمال. ەلىمىزدىڭ جانە شەتەلدىڭ كوپتەگەن جاستارى زامانعا ساي ءبىلىم الۋ ءۇشىن قازاق ۇلتتىق ۋنيۆەرسيتەتىن تاڭدايدى. بۇگىندە وقۋ ورداسىندا 24 مىڭنان استام ستۋدەنت ءبىلىم الىپ جاتىر. ونىڭ ىشىندە 50-گە جۋىق مەملەكەتتەن كەلگەن 3 مىڭنان استام شەتەلدىك ستۋدەنت بار. قازۇۋ QS WUR الەمدىك رەيتينگىندە 150-ورىنعا كوتەرىلدى. مەملەكەت باسشىسى بۇل جوسپاردى وتكەن جىلى ۋنيۆەرسيتەتىمىزگە جۇمىس ساپارىمەن كەلگەندە كورىپ، بارلىق باستامالارىمىزعا قولداۋ كورسەتتى. بۇگىننەن باستاپ پرەزيدەنت بەكىتكەن جوسپار بويىنشا قازۇۋ قالاشىعىنىڭ ءىى كەزەڭىن ىسكە اسىرۋ جۇمىستارى باستالادى»، – دەدى رەكتور.
كەيىن ساياسات نۇربەك، الىشەر ءابدىقادىروۆ جانە جانسەيىت تۇيمەبايەۆ كەلەشەك ۇرپاققا جولداۋ جازىلعان حاتتى كاپسۋلاعا سالىپ، قالادى.
بولاشاققا جازىلعان حاتتا: «ءبىز قازۇۋ-دى جاڭعىرتۋدىڭ جاڭا ءداۋىرى قارساڭىندا تۇرمىز. بۇل – ۋنيۆەرسيتەت ءۇشىن تاريحي ءسات. مىنە، بۇگىن قۇرىلىسى باستالعالى تۇرعان ستۋدەنتتەر قالاشىعىن جاڭعىرتۋدىڭ ءىى كەزەڭىندە جاسالاتىن جۇمىستىڭ ءبارى سىزدەردىڭ يگىلىكتەرىڭىز ءۇشىن. وسى جاتاقحانادا تۇرىپ، وقۋ كورپۋستارىندا بىلىممەن قارۋلانىپ، ەرتەڭگى كۇنى ەلگە قىزمەت ەتەدى دەگەن ۇلكەن ءۇمىتىمىز، زور سەنىمىمىز بار. ويتكەنى ەل بولاشاعى سىزدەردىڭ قولدارىڭىزدا»، – دەلىنگەن.
جوسپار بويىنشا قالاشىقتا 14 700 ورىندىق وقۋ عيماراتتارى، 12 مىڭ شارشى مەتر اكىمشىلىك كورپۋستار، 35 000 شارشى مەتر ەمحانا، 3000 شارشى مەتر سپورتتىق-ساۋىقتىرۋ ورتالىعى، قىزمەتكەرلەرگە ارنالعان تۇرعىن ءۇي، يننوۆاسيالىق ورتالىق، عىلىمي-زەرتتەۋ ورتالىعى، تەحنوپارك جانە ستۋدەنتتەر مەن ماگيسترلارعا، دوكتورانتتارعا ءۇش گەكتار جەرگە 12 مىڭ توسەك-ورىنعا ارنالعان جاتاقحانالار بوي كوتەرەدى.
سونداي-اق قولدانىستاعى جاتاقحانالار، وقۋ كورپۋستارى مەن اكىمشىلىك عيماراتتار كۇردەلى جوندەۋدەن وتەتىن بولادى.
