ءماجىلىس دەپۋتاتى دانيار قاسقاراۋوۆ ق ر پرەمەر-مينيسترى ولجاس بەكتەنوۆكە دەپۋتاتتىق ساۋال جولداپ، الماتى وبلىسىنداعى سوربۇلاق كارىز سۋى قويماسىنا قاتىستى وزەكتى ماسەلەلەردى كوتەردى، دەپ حابارلايدى Dalanews.kz.

دەپۋتاتتىڭ ايتۋىنشا، 37 جىلدان بەرى الماتى قالاسىنىڭ قالدىق سۋلارى جينالاتىن سوربۇلاق كولىنىڭ جاي-كۇيى ءوڭىر تۇرعىندارىنىڭ دەنساۋلىعىنا جانە ەكولوگيالىق قاۋىپسىزدىككە تىكەلەي قاتەر ءتوندىرىپ وتىر.

ءبىرىنشى ماسەلە – كولدەن شىعاتىن جاعىمسىز ءيىس ىلە اۋدانىنا قاراستى ەلدى مەكەندەردى تۇنشىقتىرىپ وتىر.

ەكىنشى ماسەلە – زەرتحانالىق تەكسەرىستەردە سوربۇلاق سۋىندا 31 ءتۇرلى حيميالىق زات انىقتالىپ، ونىڭ ىشىندە كادميي مولشەرى نورمادان ءتورت ەسە اسىپ كەتكەن. دەپۋتات مۇنى «ادام اعزاسىنا جاسىرىن ۋ بولىپ جينالىپ، قاتەرلى اۋرۋلارعا اكەلۋى مۇمكىن» دەپ اتاپ ءوتتى.

ءۇشىنشى ماسەلە – كولدىڭ سىيىمدىلىعى شامامەن 1 ملرد تەكشە مەتر بولسا، ءقازىردىڭ وزىندە 750 ملن تەكشە مەترى تولعان. مامانداردىڭ ايتۋىنشا، تابيعي اپات كەزىندە سۋ ارناسىنان اسىپ كەتسە، اقشي، كۇرتى اۋىلدارى تاسقىن استىندا قالۋى مۇمكىن. بۇل ىلە، قاپشاعاي جانە بالقاش سۋ ايدىندارىن دا لاستاپ، ەكولوگيالىق اپاتقا سوقتىرۋى ىقتيمال.

وسىعان بايلانىستى دەپۋتات ۇكىمەتكە مىناداي ۇسىنىستار ايتتى:

• سوربۇلاقتىڭ جاعدايىن تەكسەرەتىن مەملەكەتتىك كوميسسيا قۇرۋ؛

• كارىز سۋلارىن تازارتاتىن زاماناۋي ستانسيالار سالۋ؛

• بۇعان دەيىن بولىنگەن قاراجاتتىڭ ماقساتتى جۇمسالۋىنا مەملەكەتتىك اۋديت جۇرگىزۋ؛

• كولدىڭ سۋىن اۋىل شارۋاشىلىعىنا پايدالانۋ ءۇشىن ارنايى جوبا ازىرلەۋ.

«بۇل تەك ىلە اۋدانى ەمەس، بۇكىل جەتىسۋ ءوڭىرىنىڭ قاۋىپسىزدىگىنە قاتىستى ماسەلە. سوندىقتان سوربۇلاق پروبلەماسىن ۇكىمەتتىڭ ەرەكشە باقىلاۋىنا الۋدى سۇرايمىن»، – دەدى دانيار قاسقاراۋوۆ.