Májilis depýtaty Daniiar Qasqaraýov QR Premer-ministri Oljas Bektenovke depýtattyq saýal joldap, Almaty oblysyndaǵy Sorbulaq káriz sýy qoimasyna qatysty ózekti máselelerdi kóterdi, dep habarlaidy Dalanews.kz.
Depýtattyń aitýynsha, 37 jyldan beri Almaty qalasynyń qaldyq sýlary jinalatyn Sorbulaq kóliniń jai-kúii óńir turǵyndarynyń densaýlyǵyna jáne ekologiialyq qaýipsizdikke tikelei qater tóndirip otyr.
Birinshi másele – kólden shyǵatyn jaǵymsyz iis Ile aýdanyna qarasty eldi mekenderdi tunshyqtyryp otyr.
Ekinshi másele – zerthanalyq tekseristerde Sorbulaq sýynda 31 túrli himiialyq zat anyqtalyp, onyń ishinde kadmii mólsheri normadan tórt ese asyp ketken. Depýtat muny «adam aǵzasyna jasyryn ý bolyp jinalyp, qaterli aýrýlarǵa ákelýi múmkin» dep atap ótti.
Úshinshi másele – kóldiń syiymdylyǵy shamamen 1 mlrd tekshe metr bolsa, qazirdiń ózinde 750 mln tekshe metri tolǵan. Mamandardyń aitýynsha, tabiǵi apat kezinde sý arnasynan asyp ketse, Aqshi, Kúrti aýyldary tasqyn astynda qalýy múmkin. Bul Ile, Qapshaǵai jáne Balqash sý aidyndaryn da lastap, ekologiialyq apatqa soqtyrýy yqtimal.
Osyǵan bailanysty depýtat Úkimetke mynadai usynystar aitty:
-
Sorbulaqtyń jaǵdaiyn tekseretin memlekettik komissiia qurý;
-
Káriz sýlaryn tazartatyn zamanaýi stantsiialar salý;
-
Buǵan deiin bólingen qarajattyń maqsatty jumsalýyna memlekettik aýdit júrgizý;
-
Kóldiń sýyn aýyl sharýashylyǵyna paidalaný úshin arnaiy joba ázirleý.
«Bul tek Ile aýdany emes, búkil Jetisý óńiriniń qaýipsizdigine qatysty másele. Sondyqtan Sorbulaq problemasyn Úkimettiń erekshe baqylaýyna alýdy suraimyn», – dedi Daniiar Qasqaraýov.
