ءماجىلىس دەپۋتاتى ولجاس قۇسپەكوۆ كوممەرسيالىق ءىس-شارالاردا پوليسيا قىزمەتكەرلەرىن ەمەس، جەكە كۇزەتتى تارتۋ كەرەك ەكەنىن جەتكىزدى، دەپ حابارلايدى Dalanews.kz.
ونىڭ ايتۋىنشا، كەيىنگى كەزدە قازاقستاندا ءىرى كونسەرتتەر مەن سپورتتىق ماچتار ءجيى ءوتىپ جاتىر.
"استانادا وتكەن دجەننيفەر لوپەستىڭ كونسەرتىنە شامامەن 1300 پوليسەي، ال الماتىدا 2240 پوليسيا قىزمەتكەرى، اسكەري مەن ەرىكتى جۇمىلدىرىلدى. سونىڭ سالدارىنان پارادوكس جاعداي قالىپتاسادى: جاپپاي شوۋ مەن كونسەرتتەرگە بۇكىل جەكە قۇرام تارتىلادى دا، كوشەلەردى پاترۋلدەۋگە ادام قالمايدى"، – دەدى دەپۋتات.
ولجاس قۇسپەكوۆ مەملەكەتتىك رەسۋرستاردى ءتيىمدى ءارى ماقساتتى پايدالانۋ قاجەت ەكەنىن ايتىپ، كوممەرسيالىق ءىس-شارالاردىڭ قاۋىپسىزدىگىن قامتاماسىز ەتۋ مىندەتىن جەكە سەكتورعا جۇكتەۋ قيسىندى ەكەنىن جەتكىزدى.
"بۇگىندە ەلىمىزدە 4 مىڭعا جۋىق جەكە كۇزەت ۇيىمى جۇمىس ىستەيدى. وندا 100 مىڭنان اسا كاسىبي قىزمەتكەر بار، ولار بۇل مىندەتتى ءوز موينىنا الۋعا دايىن"، – دەدى ول.
