ءال-فارابي اتىنداعى قازۇۋ-دا «قازاقستاننىڭ مۋلتيلينگۆالدى جانە مۋلتيمادەنيەت ورتاسىندا بولاشاق كاسىبي مامانداردىڭ تىلدىك دايارلاۋ مودەلىن وڭتايلاندىرۋ» اتتى حالىقارالىق كونفەرەنسيا ءوتتى، دەپ حابارلايدى Dalanews.kz.
ءىس-شارا قازۇۋ-دىڭ 90 جىلدىعىنا جانە «فلاگمان» باعدارلاماسىنىڭ 10 جىلدىعىنا ارنالعان. كونفەرەنسيا جۇمىسىنا اقش جانە قازاقستان ديپلوماتتارى، حالىقارالىق ءبىلىم بەرۋ جونىندەگى امەريكالىق كەڭەستەردىڭ (ACCELS) باسشىلارى، «فلاگمان» باعدارلاماسىنىڭ وقىتۋشىلارى، قازاقستان، قحر، اقش، قىرعىزستان ۋنيۆەرسيتەتتەرىنىڭ شەت ءتىلى رەتىندە قازاق جانە ورىس تىلدەرىن وقىتاتىن ماماندار، سونداي-اق «فلاگمان» باعدارلاماسىنىڭ ستۋدەنتتەرى مەن قازۇۋ دوكتورانتتارى قاتىستى.
قازۇۋ-دىڭ باسقارما مۇشەسى – وپەراسيالىق قىزمەت جونىندەگى پرورەكتورى ەركىن دۇيسەنوۆ قۇتتىقتاۋ ءسوز سويلەپ، كونفەرەنسيانىڭ ماڭىزدىلىعىنا توقتالدى. پرورەكتور حالىقارالىق كونفەرەنسيا قازاقستاننىڭ مۋلتيلينگۆالدى جانە مۋلتيمادەنيەت ورتاسى جاعدايىندا تىلدىك دايارلىقتىڭ زاماناۋي ترانسفورماسيالىق مودەلىن تانىمال ەتۋگە باعىتتالعانىن اتاپ ءوتتى. ءال-فارابي اتىنداعى قازۇۋ مەن حالىقارالىق ءبىلىم بەرۋ جونىندەگى امەريكالىق كەڭەستەر (ACCELS، اقش) اراسىنداعى ىنتىماقتاستىق تۋرالى ەكىجاقتى كەلىسىمگە 2014 جىلى قول قويىلعان بولاتىن.
شارت قازاقستان مەن اقش اراسىنداعى ءبىلىم مەن عىلىمداعى ەكىجاقتى گۋمانيتارلىق قاتىناستاردى ودان ءارى دامىتۋ قاجەتتىلىگىن تەڭ قۇقىلى ارىپتەستىك ىنتىماقتاستىققا جانە تانۋعا نەگىزدەلگەن.
10 جىل ىشىندە «فلاگمان» باعدارلاماسى بويىنشا (Russian Overseas Flagship) ۋنيۆەرسيتەتتە اقش-تىڭ ءتۇرلى جوعارى وقۋ ورىندارىنان 200-دەن استام ستۋدەنت ءبىلىم الدى.
«ولار ورىس ءتىلىن مەڭگەرۋ داعدىلارىن جەتىلدىرىپ، ءتيىستى مەملەكەتتىك سەرتيفيكاتتاۋ دەڭگەيىنە (س1) ءساتتى قول جەتكىزدى، بۇل اقش-تاعى تەستىلەۋ قورىتىندىلارىمەن راستالادى. اتالمىش جەتىستىك قازۇۋ-دىڭ فيلولوگيا فاكۋلتەتى وقىتۋشىلارىنىڭ تاجىريبەلى ۇجىمىنىڭ ءسوزسىز ەڭبەگى»، – دەپ اتاپ ءوتتى پرورەكتور ە.دۇيسەنوۆ.
2023 جىلدىڭ شىلدەسىندە قازۇۋ العاش رەت ءار شتاتتان كەلگەن 15 امەريكالىق ورىس ءتىلىنىڭ مامانىنا – مەكتەپ مۇعالىمدەرى مەن ۋنيۆەرسيتەت پروفەسسورلارىنا بىلىكتىلىكتى ارتتىرۋ كۋرستارىن وتكىزدى. ولار قازۇۋ وقىتۋشىلارىنىڭ تەوريالىق جانە ادىستەمەلىك جەتىستىكتەرىمەن تانىسۋعا بىرەگەي مۇمكىندىك الىپ، قازاقستاننىڭ مادەنيەتى مەن تاريحىنا شىنايى قىزىعۋشىلىق تانىتتى، ءوز وتانىنداعى كاسىبي قىزمەتتە پايدالانۋ ءۇشىن قازاقستان تۋرالى وقۋ ماتەريالىن جينادى. 2023 جىلى اكسەلس جانە قازۇۋ پروفەسسورلارى قاتىساتىن بىرلەسكەن حالىقارالىق جوبا باستالدى. قازاق ءتىلى شەت ءتىلى رەتىندە جانە ورىس ءتىلى شەت ءتىلى رەتىندە ەكى وقۋ كەشەنىن قۇرۋ بويىنشا جۇمىس قولعا الىندى.
كونفەرەنسيا بارىسىندا قازاقستان رەسپۋبليكاسىنداعى اقش ەلشىلىگىنىڭ باس كونسۋلى ەركىن ميشەل، الماتى قالاسىنداعى ق ر ءسىم وكىلدىگى باسشىسىنىڭ ورىنباسارى يسلامبەك رايىموۆ، ستراتەگيالىق تىلدەر، مادەنيەتتەر جانە وڭىرلەر (اقش) بويىنشا ءبىلىم بەرۋ باعدارلامالارى دەپارتامەنتى ديرەكتورىنىڭ ورىنباسارى كەترين كەشنەر جانە «فلاگمان» باعدارلاماسىنىڭ ستۋدەنتى حلويا ەدجينگتون قۇتتىقتاۋ ءسوز سويلەدى.
قازۇۋ پروفەسسورى ەلەونورا سۇلەيمەنوۆا «فلاگمان» باعدارلاماسىنىڭ تاجىريبەسى: قازاقستاننىڭ مۋلتيمادەنيەتتى جانە مۋلتيلينگۆالدى ورتاسىندا تىلدەردى وقىتۋ» تۋرالى بايانداما جاسادى.
حالىقارالىق كونفەرەنسياعا قاتىسۋشىلار قۇزىرەتتىلىك، مادەنيەتتانۋ جانە موتيۆاسيالىق تاسىلدەر نەگىزىندە ستۋدەنتتەردى قازاق جانە ورىس تىلدەرىن شەت ءتىلى رەتىندە كەشەندى وقىتۋ تاجىريبەسىمەن ءبولىستى. كونفەرەنسيا بارىسىندا «قازىرگى ورىس ءتىلىنىڭ مورفولوگياسى» وقۋلىعىنىڭ تۇساۋكەسەرى ءوتتى (اۆتورلارى: ە.سۇلەيمەنوۆا، و.التىنبەكوۆا، ل.ەكشەمبەيەۆا، ز.ءسابيتوۆا).
پلەنارلىق وتىرىس كەزىندە ءال-فارابي اتىنداعى قازۇۋ-دىڭ قۇرمەتتى دوكتورى، پروفەسسور دەن ديەۆيدسون (اقش) «سوڭعى 10 جىلداعى تەستىلىك دەرەكتەر ناتيجەلەرى بويىنشا «فلاگمان» باعدارلاماسىنىڭ ءترانسفورماتيۆتى وقىتۋى» جايلى بايانداماسىن جاسادى.
كونفەرەنسيا بارىسىندا وقىتۋشى مارتين س.سينتيا (اقش) «فلاگمان» باعدارلاماسىندا بولاشاق كاسىبي شەتەلدىك مامانداردىڭ ءۇشىنشى شەكتى دەڭگەيىنىڭ قۇزىرەتتىلىك بىلىكتىلىگىن باعالاۋ» اتتى شەبەرلىك ساعاتىن وتكىزدى. شارا سوڭىندا قاتىسۋشىلار جەكە پىكىرلەرىن جەتكىزىپ، ويلارىمەن ءبولىستى.
كونفەرەنسيانى حالىقارالىق ءبىلىم بەرۋ جونىندەگى امەريكالىق كەڭەستەردىڭ (ACCELS) «فلاگمان» باعدارلاماسى، ءال-فارابي اتىنداعى قازۇۋ-دىڭ تۇركولوگيا جانە التايستيكا عىلىمي-زەرتتەۋ ينستيتۋتى، شەتەل فيلولوگياسى جانە اۋدارما كافەدراسى بىرلەسىپ ۇيىمداستىردى.
