ءقازۇۋ-دىڭ 334 عالىمى 74،8 ملن تەڭگە سىياقى الدى

Dalanews 31 تام. 2021 16:39 421

ءال-فارابي اتىنداعى قازاق ۇلتتىق ۋنيۆەرسيتەتىنىڭ عالىمدارى Scopus دەرەكتەر بازاسىنىڭ حالىقارالىق رەيتينگتىك باسىلىمدارىندا جاريالانعان ماقالالارى ءۇشىن قارجىلاي سىياقىمەن ماراپاتتالدى، – دەپ حابارلايدى Dalanews.kz.

ءبىلىم ورداسىنىڭ باسشىسى جانسەيىت تۇيمەبايەۆتىڭ شەشىمىمەن ارنايى سىياقىعا Scopus مالىمەتتەر بازاسىنىڭ جۋرنالدارىندا ماقالا جاريالاعان 234 اۆتور يە بولدى.  جالپى سوماسى 74،8 ملن تەڭگەنى قۇراعان سىياقى مولشەرى CiteScore رەيتينگتىك جۋرنالدارىنىڭ STR، كۆارتيل جانە پروسەنتيل كورسەتكىشتەرىنە بايلانىستى تاعايىندالدى.

بۇل قازۇۋ اۆتورلارىن ماتەريالدىق تۇرعىدان ىنتالاندىرۋ جانە ءبىلىم الۋشىلار مەن وقىتۋشىلاردى عىلىمي-زەرتتەۋ جۇمىستارىنا تارتۋدىڭ ەڭ ءتيىمدى قۇرالدارىنىڭ ءبىرى بولىپ تابىلادى. سونداي-اق قازۇۋ-دىڭ ۋنيۆەرسيتەتتەردىڭ الەمدىك رەيتينگىندە ىلگەرىلەۋىنە ايتارلىقتاي اسەر ەتپەك.

قارجىلاي سىياقى الداعى ۋاقىتتا دا Scopus دەرەكتەر بازاسىنا كىرەتىن جۋرنالداردا جاريالانعان رەيتينگتىك ماقالالاردىڭ اۆتورلارىنا بەرىلەدى. ولاردىڭ اراسىندا دايەكسوزدىلىگى جوعارى رەيتينگتىك ماقالالار باسىمدىققا يە بولادى. ۋنيۆەرسيتەتتىڭ وقىتۋشى-پروفەسسورلىق قۇرامى مەن عىلىمي قىزمەتكەرلەرى، سونىمەن قاتار ءبىلىم الۋشىلارىنىڭ ماقالالارى ءۇشىن دە بەرىلەتىنىن اتاپ وتكەن ءجون.

Scopus – عىلىمي باسىلىمداردىڭ ماقالالارىنان دايەكسوز الۋ دەڭگەيىن انىقتاۋعا مۇمكىندىك بەرەتىن الەمدەگى ەڭ ءىرى رەفەراتتىق دەرەكقور. الەمدىك بازانى ۋنيۆەرسيتەتتەر دە، عىلىمي-زەرتتەۋ ينستيتۋتتارى دا قىزمەتكەرلەردىڭ جاريالانىم ستراتەگياسىن انىقتاۋعا، ال رەيتينگتىك اگەنتتىكتەر جوعارى وقۋ ورىندارىنىڭ الەمدىك رەيتينگتەرىن قۇرۋ ءۇشىن پايدالانادى.

ۇسىنىلعان
سوڭعى جاڭالىقتار