ءىس-شاراعا ق ر پرەمەر-مينيسترىنىڭ ورىنباسارى – سىرتقى ىستەر ءمينيسترى مۇحتار تىلەۋبەردى، ءال-فارابي اتىنداعى قازۇۋ-دىڭ باسقارما ءتوراعاسى – رەكتورى جانسەيىت تۇيمەبايەۆ، ديپلوماتيا سالاسىنىڭ ارداگەرلەرى، مەملەكەت جانە قوعام قايراتكەرلەرى، ق ر ۇعا اكادەميكتەرى، عالىمدار مەن ۋنيۆەرسيتتەتىڭ وقىتۋشى-پروفەسسورلار قۇرامى قاتىستى.
جيىندا ءسوز العان سىرتقى ىستەر ءمينيسترى مۇحتار تىلەۋبەردى شاراعا قاتىسۋشىلاردى ايتۋلى مەرەكەمەن قۇتتىقتاپ، جىلى لەبىزىن ءبىلدىردى.
![](/uploads/images/20240127173639246.jpg)
– ءبىز وڭىرلىك جانە جاھاندىق پروسەستەرگە بەلسەندى قاتىساتىن ورنىقتى ءارى بەدەلدى مەملەكەتكە اينالدىق. قازاقستان ءوز ەگەمەندىگىن العان كۇننەن باستاپ شەكاراسىن بەكەمدەپ، شەت مەملەكەتتەرمەن بايلانىس ورناتتى. بۇگىنگى تاڭدا قازاقستان الەمنىڭ 186 ەلىمەن ديپلوماتيالىق قارىم-قاتىناستا. ورتالىق ازيا ەلدەرىمەن ديالوگ جاندانا ءتۇستى. قازاقستان ەۋرازيالىق كەڭىستىكتەگى ينتەگراسيالىق ۇدەرىستەردىڭ لوكوموتيۆى بولىپ، كوپتەگەن حالىقارالىق ۇيىمداردا ءتوراعالىق ەتتى. وسى تۇرعىدا ديپلوماتتاردى دايارلاۋدا قازاق ۇلتتىق ۋنيۆەرسيتەتىنىڭ قوسقان ۇلەسى زور. بارشاڭىزدى قازاقستان ديپلوماتياسىنىڭ مەرەيتويىمەن قۇتتىقتايمىن! – دەدى مۇحتار بەسكەن ۇلى.
![](/uploads/images/20240127173639624.jpg)
– قازاق ديپلوماتياسىنىڭ بەرىك ىرگەتاسىن كەرەي مەن جانىبەك حاندار قالادى. توقسانىنشى جىلداردىڭ باسىندا قازاقستان حالىقارالىق ارەنادا ءوزىنىڭ دەربەس سىرتقى ساياسي باعىتى مەن ۇستانىمىن قالىپتاستىرا باستاعانى بارشاعا ءمالىم. تاۋەلسىزدىك العان ساتتەن باستاپ قازاقستان وزگە ەلدەرمەن تۇراقتى قارىم-قاتىناس ورناتا باستادى. وتىز جىل ىشىندە ءبىزدىڭ ەلىمىز ءوزىن بەيبىتشىلىك پەن كەلىسىمنىڭ جاقتاۋشىسى رەتىندە كورسەتە ءبىلدى، – دەدى جانسەيىت تۇيمەبايەۆ.
![](/uploads/images/20240127173639949.jpg)
سونداي-اق، شارا اياسىندا ءال-فارابي اتىنداعى قازاق ۇلتتىق ۋنيۆەرسيتەتىندە ق ر پرەمەر-مينيسترىنىڭ ورىنباسارى - سىرتقى ىستەر ءمينيسترى مۇحتار تىلەۋبەردى مەن جوعارى وقۋ ورنىنىڭ باسشىسى جانسەيىت تۇيمەبايەۆتىڭ قاتىسۋىمەن «قازاقستان رەسپۋبليكاسىنىڭ سىرتقى ساياساتى جانە ديپلوماتياسى» ورتالىعى اشىلدى.
جۇمىس ساپارى بارىسىندا مينيستر مۇحتار بەسكەن ۇلى ءبىلىم ورداسىنىڭ تىنىس-تىرشىلىگىمەن تانىستى. جاڭارعان وقۋ عيماراتتارى مەن اۋديتوريالاردى، ءال-فارابي مۋزەيىن ارالاپ، قازۇۋ عالىمدارى ازىرلەگەن يننوۆاسيالىق جوبالاردىڭ ناتيجەلەرىنە قانىقتى.
![](/uploads/images/20240127173640245.jpg)