الماتىدا رەكتوراتتىڭ 14-قاباتىنان قۇلاپ قازا تاپقان ستۋدەنت قىزدىڭ وقيعاسىنا قاتىستى تەرگەۋ ءالى دە جالعاسىپ جاتىر. جوعارى ءبىلىم جانە عىلىم ءمينيسترى ساياسات نۇربەك وسى جاعدايعا پىكىر ءبىلدىردى، دەپ حابارلايدى Dalanews.kz.
“تەرگەۋ ورگاندارى ءوز جۇمىستارىن اتقارىپ جاتىر. ءبىر عانا نارسە ايتامىن: بۇل – نەگىزىنەن ىشكى جانە جەكە تراگەديا. مەندەگى اقپارات بويىنشا، “ءوزىن-وزى ولتىرۋگە يتەرمەلەۋ” بابى بويىنشا قىلمىستىق ءىس قوزعالادى. مۇنىڭ ۋنيۆەرسيتەتكە دە، وقۋ پروسەسىنە دە قاتىسى جوق”، — دەدى ساياسات نۇربەك.
ەسكە سالايىق، بۇعان دەيىن الماتىداعى ءال-فارابي اتىنداعى قازاق ۇلتتىق ۋنيۆەرسيتەتىنىڭ رەكتورات عيماراتىندا قايعىلى جاعداي ورىن العان ەدى. ءبىرىنشى كۋرس ستۋدەنتى 14-قاباتتان قۇلاپ، قازا تاپتى.
الماتى قالالىق پوليسيا دەپارتامەنتىنىڭ باسپا ءسوز قىزمەتىنىڭ حابارلاۋىنشا، بۇل دەرەك بويىنشا بوستاندىق اۋدانى پوليسيا باسقارماسى قىلمىستىق ءىس قوزعادى.
"ءقازىر وقيعانىڭ ناقتى سەبەبى مەن ءمان-جايى انىقتالۋدا. الدىن الا بولجام بويىنشا، قايعىلى جاعدايدىڭ سەبەبى وتباسىلىق ماسەلەلەرگە بايلانىستى بولۋى مۇمكىن"، – دەلىنگەن پوليسيا حابارلاماسىندا.
پوليسيا دەپارتامەنتى قالا تۇرعىندارى مەن الەۋمەتتىك جەلى قولدانۋشىلارىن رەسمي اقپاراتقا عانا سۇيەنۋگە جانە شىندىققا ساي كەلمەيتىن مالىمەتتەردى تاراتپاۋدى سۇرادى.
