Almatyda rektorattyń 14-qabatynan qulap qaza tapqan stýdent qyzdyń oqiǵasyna qatysty tergeý áli de jalǵasyp jatyr. Joǵary bilim jáne ǵylym ministri Saiasat Nurbek osy jaǵdaiǵa pikir bildirdi, dep habarlaidy Dalanews.kz.
“Tergeý organdary óz jumystaryn atqaryp jatyr. Bir ǵana nárse aitamyn: bul – negizinen ishki jáne jeke tragediia. Mendegi aqparat boiynsha, “ózin-ózi óltirýge itermeleý” baby boiynsha qylmystyq is qozǵalady. Munyń ýniversitetke de, oqý protsesine de qatysy joq”, — dedi Saiasat Nurbek.
Eske salaiyq, buǵan deiin Almatydaǵy ál-Farabi atyndaǵy Qazaq ulttyq ýniversitetiniń rektorat ǵimaratynda qaiǵyly jaǵdai oryn alǵan edi. Birinshi kýrs stýdenti 14-qabattan qulap, qaza tapty.
Almaty qalalyq politsiia departamentiniń baspasóz qyzmetiniń habarlaýynsha, bul derek boiynsha Bostandyq aýdany politsiia basqarmasy qylmystyq is qozǵady.
"Qazir oqiǵanyń naqty sebebi men mán-jaiy anyqtalýda. Aldyn ala boljam boiynsha, qaiǵyly jaǵdaidyń sebebi otbasylyq máselelerge bailanysty bolýy múmkin", – delingen politsiia habarlamasynda.
Politsiia departamenti qala turǵyndary men áleýmettik jeli qoldanýshylaryn resmi aqparatqa ǵana súienýge jáne shyndyqqa sai kelmeitin málimetterdi taratpaýdy surady.
