"قازاتومونەركاسىپ" ۇلتتىق اتوم كومپانياسى" اق AIX بيرجاسىنىڭ رەسمي ءتىزىمىنىڭ Main الاڭىنا 200 ملن دوللاردىڭ 2000 دانا وبليگاسياسىن شىعاردى، دەپ حابارلايدى Dalanews.kz.
كومپانيا وبليگاسيالارىن 2024 جىلعى 27 قاراشادا قابىلدانىپ، 2 جەلتوقساندا كۇشىنە ەنگەن AIX ليستينگتىك كوميسسياسىنىڭ شەشىمى نەگىزىندە بيرجاعا ورنالاستىردى.
قازاتومونەركاسىپ پەن "سامۇرىق-قازىنا" ءۇاق" اق اراسىندا وبليگاسيالاردى "ساتىپ الۋشى" رەتىندە ساتىپ الۋ-ساتۋدىڭ اتاۋلى مامىلەسىن جاساۋ ارقىلى ۇيىمداستىرىلماعان AIX باعالى قاعازدار نارىعىندا ورنالاستىرۋ مىناداي نەگىزگى شارتتاردا كۇتىلەدى:
- وبليگاسيا ءتۇرى: كەپىلسىز كۋپوندىق وبليگاسيالار.
- وبليگاسيالار سانى: 2000 (ەكى مىڭ) دانا.
- كۋپوندىق مولشەرلەمە: SOFR+1%.
- ءبىر وبليگاسيانىڭ نومينالدى قۇنى جانە نومينالدى قۇنىنىڭ ۆاليۋتاسى: 100 000 (ءجۇز مىڭ) اقش دوللارى.
- وبليگاسيالار شىعارىلىمىنىڭ جالپى كولەمى: 200 000 000 (ەكى ءجۇز ميلليون) اقش دوللارى.
- وبليگاسيالاردىڭ اينالىم مەرزىمى: 36 (وتىز التى) اي (02 جەلتوقسان 2024 - 02 جەلتوقسان 2027).
وسى وبليگاسيالار شىعارىلىمىنىڭ ماقساتى - اينالىم كاپيتالىن تولىقتىرۋ.
ايتا كەتسەك، Halyk Finance "قازاتومونەركاسىپ" اكسيالارى بويىنشا بۇرىنعى ۇسىنىمىن سول كۇيىندە وزگەرىسسىز قالدىرىپ وتىر. سونىمەن:
- ماقساتتى باعا (12 ايداعى): 22 822 تەڭگە؛
- ءوسىم پوتەنسيالى: +14%؛
- قازىرگى باعاسى: 20 000 تەڭگە.
