قازاتومونەركاسىپ 2024 جىلى ۋران ءوندىرۋ جانە قارجىلىق كورسەتكىشتەرى بويىنشا تۇراقتى ناتيجەلەرگە قول جەتكىزدى. كومپانيا ۋران ءوندىرۋ كولەمىن 23 مىڭ توننادان اسىردى، ال ساتۋ كولەمى 16،5 مىڭ توننادان جوعارى بولدى. 2023 جىلمەن سالىستىرعاندا كىرىس 26%-عا ءوسىپ، رەكوردتىق 1،8 ترلن تەڭگەگە جەتتى، دەپ حابارلايدى Dalanews.kz.
كومپانيا قازاقستان بيۋدجەتىنە 723 ملرد تەڭگەدەن استام سالىق اۋداردى، ونىڭ ىشىندە 31 ملرد تەڭگەدەن استامى وڭىرلىك بيۋدجەتتەرگە جىبەرىلگەن.
جاڭا دامۋ ستراتەگياسى قابىلداندى
الەمدە اتوم ەنەرگەتيكاسىنا دەگەن سۇرانىس ارتقاندىقتان، قازاتومونەركاسىپ الداعى ون جىلعا ارنالعان دامۋ ستراتەگياسىن جاڭارتتى. كومپانيا نەگىزگى باعىتىن ۋران وندىرۋگە شوعىرلاندىرسا، ەكونوميكالىق تيىمدىلىككە سۇيەنە وتىرىپ، يادرولىق وتىن سيكلىن دامىتۋعا نيەتتى. سونىمەن قاتار، سيرەك جانە سيرەك جەر مەتالدارى سالاسىن دامىتۋ جوسپارلانىپ وتىر.
مەملەكەت باسشىسىنىڭ تاپسىرماسىنا سايكەس، كومپانيا رەسۋرستىق بازانى كەڭەيتۋ جانە ءتيىمدى پايدالانۋ بويىنشا جۇمىستارىن جالعاستىرۋدا. 2024 جىلى تۇركىستان وبلىسىندا شامامەن 170 مىڭ توننا ۋران قورى بار كەن ورىندارىن بارلاۋعا جاڭا ليسەنزيا الىندى. سونداي-اق، «ينكاي» كەن ورنىنىڭ №3 ۋچاسكەسىندە تاجىريبەلىك-ونەركاسىپتىك ۋران ءوندىرۋ تۋرالى كەلىسىم جاسالدى.
يادرولىق وتىن ءوندىرىسى جانە جاڭا جوبالار
قازاتومونەركاسىپ ۋران وندىرۋمەن قاتار، يادرولىق وتىن سيكلىن دامىتۋعا دا باسىمدىق بەرىپ وتىر. ءۇلبى مەتاللۋرگيا زاۋىتىندا وتىن تابلەتكالارى، ال «ءۇلبى-تۆس» زاۋىتىندا جىلۋ بولەتىن قۇرامالار وندىرىلۋدە. 2023 جىلى «ءۇلبى-تۆس» زاۋىتى جىلىنا 200 توننا تومەن بايىتىلعان ۋران ءوندىرۋ قۋاتىنا جەتتى.
كومپانيا سيرەك مەتالدار ءوندىرىسىن كەڭەيتىپ، اقتوبە، اباي جانە ۇلىتاۋ وبلىستارىنداعى كەن ورىندارىن بارلاۋعا ليسەنزيا الدى. وندىرىستىك قاۋىپسىزدىككە 13 ملرد تەڭگە جۇمسالىپ، كومپانيا وسى سالاداعى جەتىستىكتەرى ءۇشىن «سامۇرىق-قازىنا» قورىنىڭ پورتفەلدىك كومپانيالارى اراسىندا ءبىرىنشى ورىنعا يە بولدى.
حالىقارالىق ىنتىماقتاستىق جانە عىلىمي زەرتتەۋلەر
قازاتومونەركاسىپ شەتەلدىك ارىپتەستەرمەن سەرىكتەستىگىن كەڭەيتۋدە.
• تاجىكستانمەن – سيرەك جانە سيرەك جەر مەتالدارىن بارلاۋ بويىنشا
• فرانسيامەن – اتوم سالاسى ءۇشىن كادرلار دايارلاۋ جونىندە
• موڭعوليامەن – ۋران بارلاۋ جانە ءوندىرۋ جوبالارى بويىنشا كەلىسىم جاسالدى.
كومپانيا اقش، جاپونيا جانە وتاندىق عىلىمي ۇيىمدارمەن مەديسينالىق راديويزوتوپتاردى ءوندىرۋ بويىنشا جۇمىس جۇرگىزۋدە.
سونىمەن قاتار ءوندىرىس تيىمدىلىگىن ارتتىرۋعا باعىتتالعان جاڭا تەحنولوگيالار ەنگىزىلۋدە. 2024 جىلى عىلىمي جوبالاردىڭ ەكونوميكالىق اسەرى شامامەن 1،7 ملرد تەڭگەنى قۇرادى.
قازاتومونەركاسىپتىڭ بولاشاق جوسپارلارى
كومپانيا ەكولوگيا، الەۋمەتتىك جاۋاپكەرشىلىك جانە كورپوراتيۆتىك باسقارۋ ستاندارتتارىن جەتىلدىرۋدە. 2024 جىلى قورشاعان ورتانى قورعاۋعا 1 ملرد تەڭگەدەن استام قارجى بولىنسە، وڭىرلەردىڭ الەۋمەتتىك-ەكونوميكالىق دامۋىنا 4 ملرد تەڭگە قاراستىرىلعان.
وسىلايشا، قازاتومونەركاسىپ تەك قازاقستاننىڭ عانا ەمەس، الەمدىك اتوم سالاسىنداعى بەدەلىن نىعايتىپ، ەل ەكونوميكاسىنىڭ دامۋىنا ۇلەس قوسىپ وتىر.
