Qazatomónerkásip 2024 jyly ýran óndirý jáne qarjylyq kórsetkishteri boiynsha turaqty nátijelerge qol jetkizdi. Kompaniia ýran óndirý kólemin 23 myń tonnadan asyrdy, al satý kólemi 16,5 myń tonnadan joǵary boldy. 2023 jylmen salystyrǵanda kiris 26%-ǵa ósip, rekordtyq 1,8 trln teńgege jetti, dep habarlaidy Dalanews.kz.
Kompaniia Qazaqstan biýdjetine 723 mlrd teńgeden astam salyq aýdardy, onyń ishinde 31 mlrd teńgeden astamy óńirlik biýdjetterge jiberilgen.
Jańa damý strategiiasy qabyldandy
Álemde atom energetikasyna degen suranys artqandyqtan, Qazatomónerkásip aldaǵy on jylǵa arnalǵan damý strategiiasyn jańartty. Kompaniia negizgi baǵytyn ýran óndirýge shoǵyrlandyrsa, ekonomikalyq tiimdilikke súiene otyryp, iadrolyq otyn tsiklin damytýǵa nietti. Sonymen qatar, sirek jáne sirek jer metaldary salasyn damytý josparlanyp otyr.
Memleket basshysynyń tapsyrmasyna sáikes, kompaniia resýrstyq bazany keńeitý jáne tiimdi paidalaný boiynsha jumystaryn jalǵastyrýda. 2024 jyly Túrkistan oblysynda shamamen 170 myń tonna ýran qory bar ken oryndaryn barlaýǵa jańa litsenziia alyndy. Sondai-aq, «Inkai» ken ornynyń №3 ýchaskesinde tájiribelik-ónerkásiptik ýran óndirý týraly kelisim jasaldy.
Iadrolyq otyn óndirisi jáne jańa jobalar
Qazatomónerkásip ýran óndirýmen qatar, iadrolyq otyn tsiklin damytýǵa da basymdyq berip otyr. Úlbi metallýrgiia zaýytynda otyn tabletkalary, al «Úlbi-TVS» zaýytynda jylý bóletin quramalar óndirilýde. 2023 jyly «Úlbi-TVS» zaýyty jylyna 200 tonna tómen baiytylǵan ýran óndirý qýatyna jetti.
Kompaniia sirek metaldar óndirisin keńeitip, Aqtóbe, Abai jáne Ulytaý oblystaryndaǵy ken oryndaryn barlaýǵa litsenziia aldy. Óndiristik qaýipsizdikke 13 mlrd teńge jumsalyp, kompaniia osy saladaǵy jetistikteri úshin «Samuryq-Qazyna» qorynyń portfeldik kompaniialary arasynda birinshi orynǵa ie boldy.
Halyqaralyq yntymaqtastyq jáne ǵylymi zertteýler
Qazatomónerkásip sheteldik áriptestermen seriktestigin keńeitýde.
• Tájikstanmen – sirek jáne sirek jer metaldaryn barlaý boiynsha
• Frantsiiamen – atom salasy úshin kadrlar daiarlaý jóninde
• Mońǵoliiamen – ýran barlaý jáne óndirý jobalary boiynsha kelisim jasaldy.
Kompaniia AQSh, Japoniia jáne otandyq ǵylymi uiymdarmen meditsinalyq radioizotoptardy óndirý boiynsha jumys júrgizýde.
Sonymen qatar óndiris tiimdiligin arttyrýǵa baǵyttalǵan jańa tehnologiialar engizilýde. 2024 jyly ǵylymi jobalardyń ekonomikalyq áseri shamamen 1,7 mlrd teńgeni qurady.
Qazatomónerkásiptiń bolashaq josparlary
Kompaniia ekologiia, áleýmettik jaýapkershilik jáne korporativtik basqarý standarttaryn jetildirýde. 2024 jyly qorshaǵan ortany qorǵaýǵa 1 mlrd teńgeden astam qarjy bólinse, óńirlerdiń áleýmettik-ekonomikalyq damýyna 4 mlrd teńge qarastyrylǵan.
Osylaisha, Qazatomónerkásip tek Qazaqstannyń ǵana emes, álemdik atom salasyndaǵy bedelin nyǵaityp, el ekonomikasynyń damýyna úles qosyp otyr.
