ايتۋلى شاراعا بۇۇ باس حاتشىسى انتونيۋ گۋتەرريش قۇتتىقتاۋ حات جولداپ، حالىقارالىق ۆولونتەرلەر فورۋمىنىڭ ماڭىزى جايىندا ويىن ورتاعا سالىپتى.
– مەن حالىقارالىق ەرىكتىلەر فورۋمىنا ءوز سالەمىمدى جولداۋعا جانە قازاقستانعا ۆولونتەرلىكتى ىلگەرىلەتۋگە، وزىق تاجىريبەمەن بولىسۋگە جانە حالىقارالىق ىنتىماقتاستىقتى نىعايتۋعا بەيىلدىلىگى ءۇشىن ءوز العىسىمدى بىلدىرۋگە قۋانىشتىمىن.
ەرىكتىلەر بىرىككەن ۇلتتار ۇيىمىنىڭ قۇندىلىقتارىن بەينەلەيدى. باس اسسامبلەيا راستاعانداي، ۆولونتەرلىك 2030 جىلعا دەيىنگى ورنىقتى دامۋ ماقساتتارىن ىلگەرىلەتۋدە جانە ەشكىمنىڭ ارتتا قالماۋىن قامتاماسىز ەتۋدە ماڭىزدى ءرول اتقارادى.
ادامزات كۇردەلى جانە ءوزارا بايلانىستى سىن-قاتەرلەرگە تاپ بولعان جاعدايدا، ەرىكتىلەردىڭ ادالدىعى مەن بەرىلگەندىگى بۇرىنعىدان دا قاجەت. ەرىكتىلەر گۋمانيتارلىق كومەك كورسەتۋ، بەيبىتشىلىك پەن تەڭدىكتى جاقتاۋ، پلانەتامىزدى قورعاۋ ءۇشىن قىزمەت ەتۋ ارقىلى جانە ءارتۇرلى باسقا تاسىلدەرمەن سانسىز ادامداردىڭ ومىرلەرى مەن قاۋىمداستىقتارعا ناقتى وزگەرىستەر اكەلەدى.
مەن ءوز ۋاقىتى مەن كۇش-جىگەرىن مۇقتاج جاندارعا كومەكتەسۋگە ارنايتىن دۇنيە جۇزىندەگى ميلليونداعان ادامدارعا شىن جۇرەكتەن العىس ايتامىن. مەن بارلىق ۇكىمەتتەردى ۆولونتەرلىكتى قوعامداستىقتاردىڭ مۇمكىندىكتەرىن كەڭەيتۋدىڭ جانە الەۋمەتتىك كەلىسىمدى قۇرۋدىڭ ماڭىزدى قۇرالى رەتىندە قولداۋعا جانە تانۋعا شاقىرامىن.
بارلىعى ءۇشىن بەيبىت، ءادىل جانە ورنىقتى بولاشاقتى قۇرۋ ءۇشىن ىنتىماقتاستىقتىڭ كۇشىن بىرلەسىپ قولدانايىق، – دەپ بۇۇ باس حاتشىسى قازاقستان مەن فورۋمعا قاتىسۋشىلارعا ىستىق سالەمىن جولداپتى.
