Айтулы шараға БҰҰ Бас хатшысы Антониу Гутерриш құттықтау хат жолдап, Халықаралық волонтерлер форумының маңызы жайында ойын ортаға салыпты.
– Мен Халықаралық еріктілер форумына өз сәлемімді жолдауға және Қазақстанға волонтерлікті ілгерілетуге, озық тәжірибемен бөлісуге және халықаралық ынтымақтастықты нығайтуға бейілділігі үшін өз алғысымды білдіруге қуаныштымын.
Еріктілер Біріккен Ұлттар Ұйымының құндылықтарын бейнелейді. Бас Ассамблея растағандай, волонтерлік 2030 жылға дейінгі орнықты даму мақсаттарын ілгерілетуде және ешкімнің артта қалмауын қамтамасыз етуде маңызды рөл атқарады.
Адамзат күрделі және өзара байланысты сын-қатерлерге тап болған жағдайда, еріктілердің адалдығы мен берілгендігі бұрынғыдан да қажет. Еріктілер гуманитарлық көмек көрсету, бейбітшілік пен теңдікті жақтау, планетамызды қорғау үшін қызмет ету арқылы және әртүрлі басқа тәсілдермен сансыз адамдардың өмірлері мен қауымдастықтарға нақты өзгерістер әкеледі.
Мен өз уақыты мен күш-жігерін мұқтаж жандарға көмектесуге арнайтын дүние жүзіндегі миллиондаған адамдарға шын жүректен алғыс айтамын. Мен барлық үкіметтерді волонтерлікті қоғамдастықтардың мүмкіндіктерін кеңейтудің және әлеуметтік келісімді құрудың маңызды құралы ретінде қолдауға және тануға шақырамын.
Барлығы үшін бейбіт, әділ және орнықты болашақты құру үшін ынтымақтастықтың күшін бірлесіп қолданайық, – деп БҰҰ Бас хатшысы Қазақстан мен форумға қатысушыларға ыстық сәлемін жолдапты.
