كەشە قازاقستان 2025-2026 جىلدارعى جوسپارعا ساي مۇناي ەكسپورتىنىڭ كولەمىن جاريالادى. بۇل الەمدىك نارىقتاعى باعاعا بىردەن اسەر ەتىپ، "قارا التىن" 2 دوللارعا ارزاندادى. نەگىزى، وتكەن اپتادا ەنەرگەتيكا مينيسترلىگى گەرمانياعا تاسىمالداناتىن قازاقستان مۇنايى كولەمىن ارتتىراتىنىن مالىمدەگەننەن-اق نارىق ويىنشىلارىنان مازا كەتە باستاپ ەدى. اسىرەسە، وپەك+ ەلدەرى مەن رەسەيدەن، دەپ حابارلايدى Dalanews.kz.
25 قاراشادا ەنەرگەتيكا ءمينيسترى الماسادام ساتقالييەۆ پەن "قازمۇنايگاز" ۇك" اق باسشىسى اسحات حاسەنوۆتىڭ پارلامەنت قابىرعاسىندا وقىعان بايانداماسىن شەتەلدىك باق-تار بىردەن ءىلىپ اكەتتى.
"قازاقستان رەسەيدىڭ كومەگىنسىز جۇزەگە اسىرىلاتىن شەتەلدىك تاسىمالداعى ۇلەستى ۇلعايتۋدى ماقسات ەتىپ وتىر. ەنەرگەتيكا ءمينيسترى الماسادام ساتقالييەۆ مۇنداي ەكسپورتتىڭ كولەمى 13 ەسەگە ءوسۋى ءتيىس دەپ مالىمدەدى. ياعني، باكۋ — تبيليسي — جەيحان قۇبىرىنىڭ جىلدىق ەكسپورتى قازىرگى 1،5 ميلليون توننادان 20 ميلليون تونناعا دەيىن ارتۋى مۇمكىن"، دەپ جازدى Reuters.
راسىندا، الەمدىك قاۋىمداستىق مۇنداي كولەمدى قازاقستاننان كۇتكەن جوق. سەبەبى وپەك-كە مۇشە قازاقستاننان، كەرىسىنشە وسى كۇنگە دەيىن مۇناي ءوندىرىسىن قىسقارتۋ تالاپ ەتىلىپ، بۇل مىندەتتەمەنى ءبىزدىڭ ەل بارىنشا ورىنداۋعا تىرىسىپ كەلگەن. سوندىقتان تومپاق تۇس تۋىنداسا، بىزگە ول وسى ارادان شىعۋى مۇمكىن. بۇعان bloomberg باسىلىمى دا باسا نازار اۋدارتادى. ءسويتىپ "ىشتەن شىققان جاۋ جامان" دەگەننىڭ كەلتىرىپ، قازاقستان وپەك تاراپىنان جازالاۋعا ۇشىراپ قالاماسا دەپ قاۋىپتەنەدى. ويتكەنى بۇل كارتەل قازاقستاننان ءوندىرىس كولەمىن قىسقارتۋدى تالاپ ەتۋمەن كەلەدى. ال بۇل تالاپتى بۇعان دەيىن اۋپىرىمدەپ ورىنداپ كەلگەن قازاقستان 2025 جىلى مۇناي ءوندىرىسى كولەمىن اياق-استى قاتتى ارتتىرۋ جوسپارى بارلارىن جاريالادى. سوندىقتان بۇل وپەك، سونداي-اق رەسەي ءۇشىن دە "سوققى" بولۋى مۇمكىن.
"2021 جىلى ءباا كۆوتالارعا بايلانىستى ساۋد ارابياسىنىڭ كەلىسىمشارتتارىن بىرنەشە كۇنگە بۇعاتتاعان. سول كەزدە اقىرى ساۋديالىقتار جەڭىسكە جەتكەنىمەن، ولار ابۋ-دابيگە كەلەسى ايلاردا كۆوتا بويىنشا ايتارلىقتاي جەڭىلدىكتەر جاساۋعا مۇمكىندىك بەردى. ال كارتەل 2023 جىلى انگولا كۆوتاسىن قىسقارتپاق بولعاندا، بۇل ەل وپەك-تەن شىعا سالدى. قازاقستاننىڭ دا وسىلاي ەتۋ ءقاۋپى بار. "وپەك+ 2025 جىلى كوپتەگەن شەپتە قيىندىقتارعا تاپ بولادى"، دەپ جازادى bloomberg.
ال نەمىستەر بۇعان دەيىن وزدەرىنە تاسىمالدانىپ كەلگەن رەسەي مۇنايىن قازاقستاندىكى باسقانىنا ءدان ريزا.
"2024 جىلدىڭ قورىتىندىسى بويىنشا قازاقستاننان گەرمانياعا مۇناي ەكسپورتىنىڭ كولەمى 1،3-1،35 ملن تونناعا دەيىن ارتۋى مۇمكىن. بۇل تۋرالى "قازمۇنايگاز" قازاقستاندىق مەملەكەتتىك كومپانياسىنىڭ باسشىسى اسحات حاسەنوۆ مالىمدەدى" دەپ جازدى Deutshe Welle.
سونداي-اق نەمىس باسىلىمى بىرنەشە كۇن بۇرىن قازاقستاننىڭ ەنەرگەتيكا مينيسترلىگى تاراتقان اقپاراتقا دا توقتالادى.
"قازاقستان 2024 جىلدىڭ قاڭتار-قازان ايلارى ارالىعىندا "درۋجبا" ماگيسترالدىق قۇبىرلار جۇيەسى ارقىلى گەرمانياعا 1،2 ملن توننا مۇناي جەتكىزگەنىن حابارلادى. وسىلايشا، اعىمداعى جىلدىڭ توعىز ايىندا قازاقستان بۇرىن رەسەي مۇنايى ايدالعان شۆەدتەگى ءموز ءۇشىن مۇناي جەتكىزۋ بويىنشا مىندەتتەمەلەردى ورىندادى. 2023 جىلى قازاقستاندىق قاراشىعاناق كەن ورنىنان گەرمانياعا 933 مىڭ توننا مۇناي جەتكىزىلدى. قازاقستان پرەزيدەنتى قاسىم-جومارت توقايەۆ گفر-عا مۇناي ەكسپورتىن ۇلعايتۋعا دايىن ەكەنىن ايتتى"، دەلىنەدى DW ماقالاسىندا.
ال بۇل رەتتە رەسەيلىك باسىلىم مىنانداي فاكتىلەردى العا تارتادى:
"ساتقالييەۆ باكۋ-جەيحان قۇبىرى ارقىلى ەكسپورتى ۇلعايتۋ جوسپارى قاشان جۇزەگە اسىرىلاتىنىن ناقتى ايتپادى. ءبىراق 2023 جىلى تامىزدا، سول كەزدەگى ەنەرگەتيكا ءمينيسترى ەرلان اقكەنجەنوۆ قازاقستان تانكەرلەر ساتىپ الا باستاعانىن، بۇل كتك-عا دەگەن تاۋەلدىلىكتى تومەندەتۋ ماقساتىندا كاسپيي جانە قارا تەڭىزدەرى ارقىلى مۇناي تاسىمالى ءۇشىن كەرەك ەكەنىن ايتقان بولاتىن. ول كەزدە، ياعني 2023 جىلدىڭ باسىندا باكۋگە بار بولعانى 300 مىڭ توننا مۇناي جەتكىزىلگەن بولاتىن. 2022 جىلى نوۆوروسسييسكيي سوتى ەكولوگيالىق بۇزۋشىلىقتاردى جەلەۋ ەتىپ قازاقستانعا كتك-مەن جۇمىس ىستەۋدى ۋاقىتشا دوعارعان. كتك-عا تاۋەلدىلىكتى ازايتۋ وسى كەزدەن باستاۋ الادى. قازاقستان بيلىگى رەسەيدىڭ ۋكرايناداعى اسكەري ءىس-قيمىلدارىن قولدامادى، دحر، لحر-دى مويىندامادى، رەسەيگە سالىنعان سانكسيا تارتىپتەرىن ساقتايدى. وسىنىڭ ءبارىنىڭ ناتيجەسىندە قازاقستاندىق مۇناي ەكسپورتىنىڭ 80 پايىزىنداعى رەسەي ۇلەسى ايتىرلىقتاي كەمي باستايدى"، دەپ جازادى moscowtimes.ru.
باعا جايىن ناقتىلاي كەتسەك:
"قازاقستاننىڭ تۇركيانىڭ جەيحان پورتى ارقىلى مۇناي ەكسپورتىن كۇرت ۇلعايتۋ جانە ەكسپورتتىق ماگيسترالدا رەسەيگە تاۋەلدىلىكتى تومەندەتۋ تۋرالى جوسپارى جاريا بولا سالىسىمەن، Brent ماركالى مۇنايىنىڭ ءبىر باررەلى 2 دوللارعا ارزانداپ، 72،73 دوللاردى قۇرادى"، دەپ جازادى Reuters.
بۇعان دەيىن بىزدە "قازاقستان وپەك قۇرامىنان شىعا سالۋى مۇمكىن بە" دەگەن ماقالا جاريالانعان بولاتىن.
