قازاقستاندىقتار جاساعان، اعىلشىن ءتىلىن ۇيرەتەتىن Aleem اتتى قوسىمشا AppStore-دا كوش باستادى. بۇل ستارتاپ تانىمال قوسىمشا Duolingo-نى دا باسىپ وزدى، دەپ حابارلايدى Dalanews.kz.
جوبا اۆتورلارىنىڭ ايتۋىنشا، ستارتاپتىڭ ارتىندا ۇلكەن كوماندا تۇرعان جوق. قوسىمشا قازاقستان مەن قىرعىزستاندا 1-ورىنعا، تاجىكستاندا 2-ورىنعا، تۇرىكمەنستاندا 6-ورىنعا، وزبەكستاندا 11-ورىنعا، رەسەيدە 12-ورىنعا شىققان.
"ەكى كۇن بۇرىن AppStore-عا سالدىق. ينۆەستيسياسىز. ۇلكەن كومانداسىز. جارناماسىز. جاي عانا قازاقستاننان شىققان جاس جىگىتتەر قولىنان كەلەتىنىنە سەندى. Duolingo-نى باسىپ وزدىق"، - دەدى جوبا اۆتورىنىڭ ءبىرى اسىلجان التاي.
ايتا كەتەيىك، Aleem - تولىقتاي تەگىن قوسىمشا، اعىلشىن تىلىندەگى ساباقتاردى وتۋگە شەكتەۋسىز مۇمكىندىك بەرىلەدى. جوبا اۆتورلارى ەندى الەمدىك ارەنانى باعىندىرۋدى كوزدەپ وتىر.
