سىرتقى ىستەر مينيسترلىگىنىڭ رەسمي وكىلى ايبەك سمادياروۆ اقش-تاعى قازاقستاندىقتارعا قاتىستى پىكىر ءبىلدىردى. ايتۋىنشا، 369 وتانداسىمىزدىڭ دەپورتاسيالاناتىنى تۋرالى اقپارات شىندىققا جاناسپايدى، دەپ حابارلايدى Dalanews.kz.
“كەشەدەن بەرى ب ا ق پەن الەۋمەتتىك جەلىلەردە اقش-تىڭ جاڭا پرەزيدەنتى زاڭسىز ميگرانتتاردى جاپپاي دەپورتاسيالايدى دەگەن اقپارات تاراپ جاتىر. كوپشىلىك Fox News تاراتقان دەرەكتەرگە سۇيەنەدى. سونىمەن قاتار دەپورتاسياعا 369 قازاقستاندىق تا ىلىگەدى دەگەن مالىمەت قوسىلدى. الايدا ءبىز بۇل اقپاراتتىڭ ءتۇپنۇسقاسىن تەكسەردىك. Fox News بۇل جاڭالىقتى 2024 جىلى 11 جەلتوقساندا جاريالاعان، ياعني ونىڭ قازىرگى كوشى-قون ساياساتىنا ەش قاتىسى جوق”، – دەپ ءتۇسىندىردى سمادياروۆ.
ونىڭ ايتۋىنشا، دەپورتاسيا – كەز كەلگەن ەلدە تۇراقتى تۇردە جۇرگىزىلەتىن زاڭدى پروسەسس. ءبىر مەملەكەتتىڭ بيلىگى زاڭسىز كەلگەن شەتەل ازاماتتارىن ەلدەن شىعارۋ تۋرالى شەشىم قابىلداعان جاعدايدا، ولار قازاقستان ەلشىلىگىنە نەمەسە كونسۋلدىعىنا حابارلاۋعا مىندەتتى ەمەس.
“الەۋمەتتىك جەلىلەر مەن باق-تا تاراعان “369 قازاقستاندىقتىڭ دەپورتاسيالاناتىنى”تۋرالى اقپاراتتىڭ نەگىزسىز ەكەنىن رەسمي تۇردە مالىمدەيمىن”، — دەدى ول.
ايتا كەتەيىك، قازىرگى ۋاقىتتا اقش بيلىگى زاڭسىز ميگرانتتاردى ەلدەن شىعارۋ شارالارىن جۇرگىزىپ جاتىر. وسىعان بايلانىستى ەل اۋماعىندا زاڭسىز جۇرگەن شەتەلدىكتەردى دەپورتاسيالاۋ پروسەسى باستالعان.
ەسكە سالايىق، اقش-تا ءقازىر 25 مىڭعا جۋىق قازاقستاندىق بار.
