بەلگىلى بلوگەر لەيلا راحىمجانوۆا ءوزىنىڭ الەۋمەتتىك جەلىدەگى جازباسىندا قازاق كينوسىنىڭ اڭىزعا اينالعان تۋىندىسى - "قىز جىبەك" فيلمىندە قالاي تۇسكەنىن جانە سول كەزدەگى كوڭىل كۇيىمەن ءبولىستى، دەپ حابارلايدى Dalanews.kz.
"قازاق قىزدارىن ەڭ سۇلۋ ەمەس دەيتىن…"
"مەن "قىز جىبەك" فيلمىنە تۇسكىم كەلدى، سەبەبى سول كەزدە قازاق قىزدارىن ەڭ كورىكسىز دەپ ايتاتىن. سوندىقتان مەن فيلمدە ادەمى قىزدار دا كورىنۋى كەرەك دەپ ويلادىم. ءبىراق ءبىزدى مۇلدە تۇسىرمەدى. ءتۇسىرىلىم توبى تەك باستى كەيىپكەرمەن اينالىستى. ءبىزدىڭ جۇزىمىزگە قارا قوشقىل گريم جاعىپ، بويانۋعا تىيىم سالىندى. ال ەگەر ءبىز "قىز جىبەكتەن ادەمىرەك" شىققان كادر بولسا، ول بىردەن قيىلىپ تاستالاتىن. وسىلايشا فيلمدە قىز جىبەكتەن باسقا ادەمى قىزدار مۇلدە كورىنبەي قالدى"، – دەپ ەسكە الادى لەيلا راحىمجانوۆا.
"اعام كۇلكىگە قارىق بولدى، مەن قورىقتىم"
بلوگەردىڭ ايتۋىنشا، فيلم جارىققا شىققان ساتتە اۋىر سەزىم بولعان.
"فيلم شىققان كەزدە اعام مەنى ەكراننان كورىپ، كۇلكىسىن توقتاتا المادى. مەن قاتتى قورىقتىم، جانە وسى فيلمگە تۇسكەنىمە وكىندىم"، – دەيدى ول.
"مەن رەجيسسەرلەرگە ۇنادىم، ءبىراق كينونى قويدىم"
سوعان قاراماستان، لەيلا راحىمجانوۆا سول كەزەڭدەگى ايگىلى رەجيسسەرلەردىڭ نازارىندا بولعانىن ايتادى.
"ماسكەۋ مەن لەنينگرادتان كەلگەن رەجيسسەرلەر ماعان ەرەكشە كوڭىل بولەتىن. ءتىپتى كونچالوۆسكيي مەنى بىرنەشە اي كۇتكەن. ءبىراق مەن ول كەزدە تۇرمىسقا شىعىپ كەتتىم دە، رەجيسسەردىڭ اسسيستەنتتەرىنە "ەندى كينوعا تۇسپەيمىن" دەدىم. ولار "تىم بولماسا كەلىپ، ءبىر كورىنىپ كەتىڭىز، ءسىزدى مىقتى ادامدار كۇتىپ وتىر" دەيتىن. مەن ءبارىن تۇسىنەتىنمىن، ءبىراق ءوزىمدى تىم ادال جار سانادىم"، – دەپ جازدى ول.
ايتا كەتەيىك، 1970 جىلى تۇسىرىلگەن "قىز جىبەك" ءفيلمى قازاق كينوسىنىڭ التىن قورىنا ەنگەن تۋىندى. باستى ءرولدى سومداعان مەرۋەرت وتەكەشوۆا سول كەزدەن باستاپ ۇلتتىق سۇلۋلىقتىڭ سيمۆولىنا اينالدى.
