قازاقستاندىق Halyk Bank، ForteBank، Jusan Bank جانە RBK Bank قارجى مەكەمەلەرى ءقازىر «زولوتايا كورونا» اقشا اۋدارىم جۇيەسى ارقىلى قاراجات اۋدارۋ مۇمكىندىگىن توقتاتىپ قويدى. وعان رەسەيلىك «سەنتر فينانسوۆىح تەحنولوگيي» (سفت) كومپانياسىنا اقش سالعان سانكسيا سەبەپ بولدى دەپ حابارلايدى Dalanews.kz BES.media-عا سىلتەمە جاساي وتىرىپ.
«زولوتايا كورونانىڭ» باعدارلامالاۋشى-كومپانياسىنا سانكسيا سالىنعان سوڭ قازاقستاندىق بىرنەشە بانك بۇل رەسەيلىك سەرۆيسپەن سەرىكتەستىكتى ۋاقىتشا توقتاتقان ەدى. سونىڭ سالدارىنان رەسەيگە اقشا الىپ-سالىپ جۇرگەندەر ول مۇمكىندىكتەن ايىرىلعان. قازاقستاندا بۇل سەرۆيس وتە اتاقتى. مىسالى شىلدەدە قازاقستاننان جىبەرىلگەن بارلىق اۋدارىمنىڭ 90 پايىزى «زولوتايا كورونا» ارقىلى جىبەرىلگەن. سول سياقتى جارتىسىنا جۋىعى سول سەرۆيستەن قازاقستانعا ءتۇسىپ وتىرعان. رەسەيلىك كومپانيامەن جۇمىس ىستەۋگە قاتىستى شەشىمدى ءار بانك ءوزى قابىلدايدى.
«زولوتايا كورونامەن» جۇمىستى توقتاتا تۇرعان بانكتەرگە كەلسەك، سانى تورتەۋ: Halyk Bank، ForteBank، Jusan Bank جانە RBK Bank. ال ۆتب بۇرىننان جۇمىس ىستەمەگەن. ءقازىر رەسەيلىك سەرۆيس قىزمەتى ءالى ءجۇرىپ تۇرعان بانكتەر ىشىندە سەنتركرەديت بانكى، Bereke Bank، ەۋرازيالىق بانك، Freedom Bank، نۇربانك پەن Altyn Bank بار.
Halyk Bank باسپاسوز-قىزمەتى حالىقارالىق سانكسيالاردى قاتاڭ ساقتايتىنىن اتاپ وتكەن. ال ForteBank ءبىرجولاتا ەمەس، ۋاقىتشا عانا توقتاتىپ قويعان. قارجى ۇيىمى «ءقازىر ءبىز «زولوتايا كورونا» سەرىكتەستەرىنىڭ بىرىنە سانكسيا سالىندى دەگەن جاڭالىق شىققان سوڭ قوسىمشا تەكسەرىس جاساپ جاتىرمىز. وسى جاعدايدى انىقتاۋ ءۇشىن قوسىمشا اقپارات سۇراتتىق. ماسەلەنىڭ ءمان-جايى انىقتالعان سوڭ شەشىم قابىلدانادى» —، دەيدى.
جوعارىدا ايتىلعان باسقا بانكتەردە «زولوتايا كورونا» ارقىلى اقشا جىبەرە بەرۋگە بولادى. دەسە دە، رەسەيگە مۇلدەم قاراجات جولدانبايدى دەگەن ءسوز ەمەس. سەبەبى SWIFT-اۋدارىم ارقىلى دا اقشا جولدايتىن مۇمكىندىك بار ەكەنىن ايتا كەتۋ كەرەك. امالىن تاپقاندار وسىلاي ءتۇرلى جول ىزدەيدى.
