قازاقستاندا ءونىمنىڭ وتاندىق شىعۋ تەگىن راستاۋ ءراسىمىن جەڭىلدەتۋگە جانە بيزنەستىڭ مەملەكەتتىك قولداۋ شارالارى مەن رەتتەلەتىن ساتىپ الۋلارعا قولجەتىمدىلىگىن كەڭەيتۋگە باعىتتالعان وتاندىق تاۋار وندىرۋشىلەردىڭ سيفرلىق ءتىزىلىمى ىسكە قوسىلدى، دەپ حابارلايدى Dalanews.kz.
جاڭا قۇرال ءىرى كاسىپورىندارمەن قاتار جاس كاسىپكەرلەرگە، ستارتاپتارعا جانە ءوندىرىستى ەندى باستاپ جاتقان وندىرۋشىلەرگە دە ارنالعان. تىركەۋ e-ondiris.gov.kzپلاتفورماسى ارقىلى تولىقتاي ونلاين فورماتتا جۇزەگە اسىرىلادى، قىزمەت تەگىن كورسەتىلەدى جانە قاعاز انىقتامالاردى جيناۋدى تالاپ ەتپەيدى. جۇيە مەملەكەتتىك دەرەكقورلارمەن ينتەگراسيالانعان جانە ءوندىرىستى قىسقا مەرزىم ىشىندە سيفرلىق ۆەريفيكاسيالاۋعا مۇمكىندىك بەرەدى.
ءتىزىلىم مەملەكەت باسشىسىنىڭ تاپسىرماسى بويىنشا ەنگىزىلدى جانە 2025 جىلعى 19 مامىردا قازاقستان رەسپۋبليكاسىنىڭ تاۋارلاردىڭ شىعۋ ەلىن ايقىنداۋ ماسەلەلەرى بويىنشا زاڭناماعا وزگەرىستەر ەنگىزۋ تۋرالى زاڭ قابىلدانعاننان كەيىن ىسكە اسىرىلدى. جاڭا جۇيەگە تولىق كوشۋ 2026 جىلعى 1 قاڭتاردان باستاپ جوسپارلانعان. وسى ۋاقىتقا دەيىن وتاندىق وندىرۋشىلەر ءوز مارتەبەسىن ست-KZ سەرتيفيكاتتارى مەن يندۋستريالىق سەرتيفيكاتتار ارقىلى راستادى.
تىزىلىمگە العاشقىلاردىڭ ءبىرى بولىپ تۇرمىستىق تەحنيكا وندىرەتىن «Silk Road Electronics» ج ش س ەنگىزىلدى. كاسىپورىن اۆتوريزاسيادان ءساتتى ءوتىپ، قازاقستان اۋماعىندا تۇرمىستىق تەحنيكا ءوندىرىسىن جۇزەگە اسىرىپ كەلەدى. كومپانيا جەرگىلىكتى وندىرىستىك قۋاتتاردى دامىتىپ، زاماناۋي تەحنولوگيالىق شەشىمدەردى ەنگىزۋدە. ءونىم نەگىزىنەن ىشكى نارىققا باعىتتالعان، سونداي-اق ءوڭىر ەلدەرىنە جەتكىزۋ پەرسپەكتيۆاسى بار.
تىزىلىمگە ەنگىزىلۋ كاسىپورىننىڭ ناقتى وتاندىق تاۋار ءوندىرۋشى مارتەبەسىن راستايدى جانە باسىمدىق بەرىلەتىن ساتىپ الۋلارعا قاتىسۋ مەن مەملەكەتتىك قولداۋ شارالارىن الۋ ءۇشىن نەگىزگى شارتتاردىڭ ءبىرى بولىپ تابىلادى. تەكسەرۋ وندىرىستىك الاڭدار، جابدىقتار، جەتكىزۋ تىزبەكتەرى جانە جەرگىلىكتەندىرۋ دەڭگەيى تۋرالى سيفرلىق دەرەكتەر نەگىزىندە جۇرگىزىلەدى.
رەسمي دەرەككوزدەردىڭ مالىمەتىنشە، قولدانىستاعى يندۋستريالىق سەرتيفيكات يەلەرىنىڭ 1 800-دەن استامى جۇيەگە اۆتوماتتى تۇردە كوشىرىلگەن، ال شامامەن 1 000 كومپانيا دەرەكتەرىن سيفرلىق فورماتتا راستاعان.
ءتىزىلىمدى پايدالانۋ تولىقتاي تەگىن. وتپەلى كەزەڭ اياقتالعاننان كەيىن تىزىلىمنەن بەرىلەتىن ءۇزىندى وتاندىق ءونىمنىڭ شىعۋ تەگىن راستايتىن جالعىز قۇجات بولادى.
