Qazaqstanda ónimniń otandyq shyǵý tegin rastaý rásimin jeńildetýge jáne bıznestiń memlekettik qoldaý sharalary men retteletin satyp alýlarǵa qoljetimdiligin keńeıtýge baǵyttalǵan otandyq taýar óndirýshilerdiń sıfrlyq tizilimi iske qosyldy, dep habarlaıdy Dalanews.kz.
Jańa qural iri kásiporyndarmen qatar jas kásipkerlerge, startaptarǵa jáne óndiristi endi bastap jatqan óndirýshilerge de arnalǵan. Tirkeý e-ondiris.gov.kzplatformasy arqyly tolyqtaı onlaın formatta júzege asyrylady, qyzmet tegin kórsetiledi jáne qaǵaz anyqtamalardy jınaýdy talap etpeıdi. Júıe memlekettik derekqorlarmen ıntegrasıalanǵan jáne óndiristi qysqa merzim ishinde sıfrlyq verıfıkasıalaýǵa múmkindik beredi.
Tizilim Memleket basshysynyń tapsyrmasy boıynsha engizildi jáne 2025 jylǵy 19 mamyrda Qazaqstan Respýblıkasynyń taýarlardyń shyǵý elin aıqyndaý máseleleri boıynsha zańnamaǵa ózgerister engizý týraly Zań qabyldanǵannan keıin iske asyryldy. Jańa júıege tolyq kóshý 2026 jylǵy 1 qańtardan bastap josparlanǵan. Osy ýaqytqa deıin otandyq óndirýshiler óz mártebesin ST-KZ sertıfıkattary men ındýstrıalyq sertıfıkattar arqyly rastady.
Tizilimge alǵashqylardyń biri bolyp turmystyq tehnıka óndiretin «Silk Road Electronics» JSHS engizildi. Kásiporyn avtorızasıadan sátti ótip, Qazaqstan aýmaǵynda turmystyq tehnıka óndirisin júzege asyryp keledi. Kompanıa jergilikti óndiristik qýattardy damytyp, zamanaýı tehnologıalyq sheshimderdi engizýde. Ónim negizinen ishki naryqqa baǵyttalǵan, sondaı-aq óńir elderine jetkizý perspektıvasy bar.
Tizilimge engizilý kásiporynnyń naqty otandyq taýar óndirýshi mártebesin rastaıdy jáne basymdyq beriletin satyp alýlarǵa qatysý men memlekettik qoldaý sharalaryn alý úshin negizgi sharttardyń biri bolyp tabylady. Tekserý óndiristik alańdar, jabdyqtar, jetkizý tizbekteri jáne jergiliktendirý deńgeıi týraly sıfrlyq derekter negizinde júrgiziledi.
Resmı derekkózderdiń málimetinshe, qoldanystaǵy ındýstrıalyq sertıfıkat ıeleriniń 1 800-den astamy júıege avtomatty túrde kóshirilgen, al shamamen 1 000 kompanıa derekterin sıfrlyq formatta rastaǵan.
Tizilimdi paıdalaný tolyqtaı tegin. Ótpeli kezeń aıaqtalǵannan keıin Tizilimnen beriletin úzindi otandyq ónimniń shyǵý tegin rastaıtyn jalǵyz qujat bolady.
