جاڭا سۋ كودەكسىنىڭ كۇشىنە ەنۋىمەن ەلىمىزدە تىرشىلىك كوزىن ءتيىمدى پايدالانۋ ماسەلەسىنە باسا نازار اۋدارىلىپ وتىر. ەندى مونشا مەن اۆتوجۋۋ ورىندارى پايدالانعان سۋدى قايتا اينالىمعا ەنگىزەتىن جۇيەمەن جۇمىس ىستەۋى ءتيىس، دەپ حابارلايدى Dalanews.kz.
جاڭا زاڭناماعا سايكەس، سۋ ۇنەمدەۋ تەحنولوگياسىن ەنگىزگەن كاسىپ يەلەرىنە مەملەكەت تاراپىنان قولداۋ كورسەتىلەدى. كودەكستە اۋىز سۋدى بەي-بەرەكەت قولدانۋعا جول بەرمەۋ ماسەلەسى ناقتى كوتەرىلگەن.
"سوڭعى ون جىل ىشىندە ەلىمىزدە، سونىڭ ىشىندە الماتى قالاسىندا، سۋدىڭ 1 مىڭ ءليترى – ياعني 1 تەكشە مەترى – نەبارى 50 تەڭگە بولدى. سوندىقتان باسقا ەلدەرمەن سالىستىرعاندا بىزدە سۋ تۇتىنۋ ەكى ەسە ارتىق"، – دەيدى «الماتى سۋ» مكك دەپارتامەنت ديرەكتورى سەرىك شاگيروۆ.
ەندى سۋدى تۇتىنۋ كولەمىنە قاراي اقى تولەۋ ءتارتىبى ەنگىزىلمەك. تابيعي مونوپوليا سۋبەكتىلەرى ۇسىنعان مالىمەت بويىنشا، ءبىر كۇندە تۇتىناتىن سۋ كولەمى 3 تەكشە مەتردەن اسقان جاعدايدا، ونىڭ قۇنى جوعارى تاريفپەن ەسەپتەلەدى.
ەسكە سالايىق، 10 ماۋسىمدا قازاقستاندا جاڭا سۋ كودەكسى كۇشىنە ەنگەن بولاتىن.
كودەكستە العاش رەت «سۋ قاۋىپسىزدىگى» ۇعىمى ەنگىزىلدى. بۇل حالىق پەن ەكونوميكانى سۋ تاپشىلىعى مەن لاستانۋدان قورعاۋ، سونداي-اق ترانسشەكارالىق سۋ رەسۋرستارىنداعى ۇلتتىق مۇددەنى قامتاماسىز ەتۋ دەگەندى بىلدىرەدى.
ەكوجۇيەلەردى ساقتاۋ ماقساتىندا «ەكولوگيالىق اعىن» ۇعىمى ەنگىزىلدى – بۇل وزەن-كولدەردەگى ەڭ تومەنگى سۋ دەڭگەيىن ساقتاۋ تالابى. سۋ رەسۋرستارىن باسقارۋدا باس جانە باسسەيندىك جوسپارلار ازىرلەنىپ، جۇرتشىلىقتىڭ شەشىم قابىلداۋعا قاتىسۋى كەڭەيتىلمەك.
شاعىن وزەندەرگە تۇيىق بوگەت سالۋعا تىيىم سالىنادى. سونىمەن قاتار سۋلى-باتپاقتى القاپتار، مۇزدىقتار ارنايى قورعاۋعا الىنىپ، سۋ قورعاۋ ايماقتارىن انىقتاۋ مىندەتى جەرگىلىكتى اكىمدىكتەرگە جۇكتەلدى.
كليماتتىڭ وزگەرۋىنە بەيىمدەلۋ شارالارى جەكە تاراۋدا قارالعان. بۇل — سۋ تاسقىنى مەن قۇرعاقشىلىققا دايىندىق، سۋ قويمالارىن تەرەڭدەتۋ، ەگىن اينالىمىن ەنگىزۋ، جاڭبىر مەن ەرىگەن سۋدى جيناۋ سياقتى باعىتتاردى قامتيدى.
سۋ رەسۋرستارىن ءتيىمدى باسقارۋ ءۇشىن ۇلتتىق اقپاراتتىق جۇيە قۇرىلىپ جاتىر. ءقازىردىڭ وزىندە ونىڭ ءتورت ءمودۋلى («اكىمشىلىك»، «سۋ پايدالانۋ»، «ترانسشەكارالىق سۋ»، «كارتوگرافيا») پيلوتتىق رەجيمدە جۇمىس ىستەيدى.
سۋدى ۇنەمدەۋگە ىنتالاندىراتىن جاڭا تەتىكتەر دە قاراستىرىلعان. سۋ پايدالانۋعا رۇقسات تەك قايتا سۋمەن جابدىقتاۋ جوسپارى بولعان جاعدايدا عانا بەرىلەدى. بۇل جوسپاردى جاساۋعا ەكى جىل، ال تولىق اۋىسۋعا بەس جىل ۋاقىت بەرىلەدى.
