قازاقستاندا لاۋازىمدى تۇلعالاردىڭ كىرىستەرى مەن مۇلكىن دەكلاراسيالاۋ قاعيدالارىنا وزگەرىستەر ەنگىزەتىن قاۋلى جوباسى ازىرلەندى. قۇجاتتاعى وزگەرىستەرگە مەملەكەتتىك قىزمەت ىستەرى اگەنتتىگى باستاماشى بولدى، دەپ حابارلايدى Dalanews.kz.
جوباعا سايكەس،مىنانداي وزگەرىستەر ۇسىنىلادى:
- لاۋازىمدى تۇلعالار مەن ولاردىڭ جۇبايلارىنىڭ اكتيۆتەرى مەن مىندەتتەمەلەرى تۋرالى مالىمەتتەردىڭ قايتالانۋىن بولدىرماۋ؛
- دەكلاراسيالاردى وزگەرىستەر ەنگىزىلگەن جاعدايدا عانا جاريالاۋ.
قۇجاتتى ازىرلەۋگە "سىبايلاس جەمقورلىققا قارسى ءىس-قيمىل تۋرالى" زاڭنىڭ 11-بابىنىڭ 9-تارماعى نەگىز بولدى.
جوبا قوعامدىق تالقى ءۇشىن 2025 جىلعى 8 قازانعا دەيىن "اشىق نقا" پورتالىنا ورنالاستىرىلدى.
ايتا كەتسەك، جالپىعا بىردەي دەكلاراسيالاۋ شاراسى اياسىندا جەكە تۇلعالار ءۇشىن دەكلاراسيانىڭ ەكى ءتۇرى قاراستىرىلادى:
- اكتيۆتەر مەن مىندەتتەمەلەر تۋرالى-250.00-نىسان (جۇيەگە كىرگەن كەزدە ءبىر رەت تاپسىرىلادى، جيناقتالعان اكتيۆتەردى تىركەيدى)؛
- 270.00 نىسان — كىرىستەر مەن مۇلىكتەر تۋرالى (جىل سايىن).
