قازاقستاندا كەيىنگى بەس جىلدا 18 جاسقا تولماعان 12 مىڭعا جۋىق قىز بالا جۇكتى بولعان. بۇل تۋرالى ق ر پرەزيدەنتى جانىنداعى ايەلدەر ىستەرى جانە وتباسىلىق-دەموگرافيالىق ساياسات جونىندەگى ۇلتتىق كوميسسيا ءتوراعاسىنىڭ ورىنباسارى جۇلدىزاي ىسقاقوۆا مالىمدەدى، دەپ حابارلايدى Dalanews.kz.
ىسقاقوۆا اتاپ وتكەندەي، جاسوسپىرىمدەر اراسىندا رەپرودۋكتيۆتى دەنساۋلىق تۋرالى جاۋاپكەرشىلىك مادەنيەتىن قالىپتاستىرۋعا ارنالعان شارالار جۇيەلى تۇردە جۇرگىزىلىپ جاتىر. بۇل جۇمىسقا مەملەكەتتىك ورگاندار، ءبىلىم بەرۋ جانە مەديسينالىق مەكەمەلەر، سونداي-اق ۇكىمەتتىك ەمەس ۇيىمدار مەن حالىقارالىق سەرىكتەستەر اتسالىسۋدا.
"بۇل باعىتتا مەملەكەتتىك ورگاندار، مەديسينالىق جانە ءبىلىم بەرۋ مەكەمەلەرى، ۇكىمەتتىك ەمەس ۇيىمدار مەن حالىقارالىق سەرىكتەستەر بىرلەسىپ جۇمىس ىستەۋدە. الايدا، جاۋاپكەرشىلىكتى تەك مەكتەپتەرگە نەمەسە اتا-انالارعا ارتىپ قويۋ دۇرىس ەمەس. حالىقتىڭ دەنساۋلىعى — بۇل بارشاعا ورتاق جاۋاپكەرشىلىك، ول ۇلتتىق يگىلىككە نەگىز بولارلىق ماڭىزدى ماسەلە"، — دەپ اتاپ ءوتتى ول وكق الاڭىندا.
بۇدان بولەك، جۇلدىزاي ىسقاقوۆا جاستار اراسىندا ايتۆ تۋرالى اقپاراتتىڭ جەتكىلىكسىز ەكەندىگىن اتاپ ءوتتى.
"سوڭعى بەس جىلدا ەلىمىزدە 18 جاسقا تولماعان 12 مىڭداي قىز بالا جۇكتى بولىپ قالعان. 15 پەن 19 جاس ارالىعىنداعى جاسوسپىرىمدەردىڭ ۇشتەن ءبىرى جىنىستىق بەلسەندى، الايدا UNFPA زەرتتەۋلەرىنە سۇيەنسەك، ولاردىڭ كوپشىلىگىنىڭ ايتۆ مەن جيتس تۋرالى ءبىلىمى تومەن"، — دەدى سپيكەر.
