قازاقستاندا جۇمىس ورنىنداعى سەكسۋالدىق قىسىمعا زاڭ جۇزىندە تىيىم سالۋ كوزدەلىپ وتىر. بۇل باستاما ەڭبەك جانە حالىقتى الەۋمەتتىك قورعاۋ مينيسترلىگىنىڭ كەڭەس بەرۋ قۇجاتىندا كورسەتىلگەن. قۇجات «اشىق نقا» پورتالىندا جاريالانىپ، 15 مامىرعا دەيىن كوپشىلىك تالقىلاۋىنا ۇسىنىلعان، دەپ حابارلايدى Dalanews.kz.
مينيسترلىك وكىلدەرىنىڭ ايتۋىنشا، ەلدە ەڭبەك ۇجىمدارىنداعى ادەپسىز ارەكەتتەرگە قارسى ناقتى قۇقىقتىق تەتىكتەر جوق. الەۋمەتتىك زەرتتەۋلەر ناتيجەسى بويىنشا، قىزمەتكەرلەردىڭ 30 پايىزى جۇمىس بارىسىندا ەتيكاعا ساي ەمەس ارەكەتتەرگە تاپ بولعان.
«سەكسۋالدىق قىسىم» ۇعىمىن زاڭنامالىق دەڭگەيدە ەنگىزۋ، سونداي-اق مۇنداي جاعدايلارعا جاۋاپ بەرۋ مەحانيزمدەرىن جاساۋ ۇسىنىلىپ وتىر. سونىمەن قاتار جۇمىس بەرۋشىنىڭ وسىنداي قۇقىقبۇزۋشىلىقتاردىڭ الدىن الۋ جونىندەگى مىندەتتەرى دە زاڭمەن بەكىتىلۋى مۇمكىن.
باستاما قىركۇيەكتە مەملەكەتتىك ورگاندارعا جولدانىپ، جەلتوقساندا ۇكىمەتكە ۇسىنىلادى. ال 2026 جىلدىڭ قاڭتارىندا ءماجىلىس قاراۋىنا ەنگىزۋ جوسپارلانىپ وتىر.
ايتا كەتەيىك، قازاقستان ەڭبەك سالاسىنداعى زورلىق-زومبىلىق پەن قىسىمدى جويۋ تۋرالى حالىقارالىق كونۆەنسيانى (№190) ءالى راتيفيكاسيالاعان جوق. الايدا مينيسترلىك بۇل باعىتتا ناقتى قادام جاساۋ قاجەت ەكەنىن ايتادى.
