قازاقستاندا جاڭا سالىق كودەكسىنە تاعى دا تۇزەتۋلەر ەنگىزىلۋى مۇمكىن. بۇل اقپاراتتى پرەمەر-مينيستردىڭ ورىنباسارى – ۇلتتىق ەكونوميكا ءمينيسترى سەرىك جۇمانعارين ماجىلىستەگى بريفينگتە راستادى، دەپ حابارلايدى Dalanews.kz.

جۋرناليستەر ۇكىمەت جانىنداعى جوبالىق كەڭسە وتىرىستارىندا سالىق كودەكسىنە قاتىستى ۇسىنىستار تالقىلانىپ جاتقانىن ايتىپ، "بۇل وزگەرىستەر جاڭا قۇجاتقا ەنگىزىلە مە؟" دەپ سۇراعان.

سەرىك ءجۇمانعاريننىڭ ايتۋىنشا، بارلىق ۇسىنىس قارالىپ جاتىر. بەلگىلى ءبىر ماسەلەلەر بويىنشا جاۋاپ بەرۋ مەرزىمى 3، 5 نەمەسە 10 كۇن بولىپ بەلگىلەنگەن. وسى ۋاقىت ىشىندە ناقتى جاۋاپ بەرىلمەسە، ماسەلە جۇيەلى سيپاتقا يە دەپ تانىلىپ، سالىق كودەكسىنە وزگەرىستەر ەنگىزۋ جونىندەگى جۇمىس توبىنىڭ قاراۋىنا جىبەرىلەدى. بۇل توپ جىل سايىن جۇمىس ىستەيدى.

ۆيسە-پرەمەردىڭ سوزىنشە، ەنگىزىلۋى مۇمكىن تۇزەتۋلەر جىل سوڭىنا قاراي بەلگىلى بولۋى مۇمكىن، ال ولاردىڭ كۇشىنە ەنۋى كەلەسى جىلدان باستالۋى ىقتيمال. كەيبىر نورمالار بويىنشا بيۋدجەت جانە سالىق كودەكستەرى اراسىندا سايكەسسىزدىكتەر انىقتالعان.

سونىمەن قاتار، ول سالىق كودەكسىنە ەنگىزىلەتىن وزگەرىستەر ادەتتە 1 قاڭتاردان باستاپ كۇشىنە ەنەتىنىن ايتتى. سوندىقتان قابىلداناتىن تۇزەتۋلەر دە كەلەسى جىلدىڭ 1 قاڭتارىنان باستاپ قولدانىسقا ەنگىزىلەدى.

سەرىك جۇمانعارين ناقتى قانداي وزگەرىستەر قاراستىرىلىپ جاتقانىن اشىپ ايتپادى، الايدا قاجەت بولعان جاعدايدا بۇل اقپاراتتى جاريالاۋعا دايىن ەكەنىن جەتكىزدى.