قازاقستاندا 2025 جىلدىڭ قاڭتار ايىندا ءوندىرىس پەن قىزمەت كورسەتۋ سالاسىنداعى يندەكستىڭ تومەندەۋىنە بايلانىستى ىسكەرلىك بەلسەندىلىكت كۇرت باياۋلادى، دەپ جازادى Dalanews.kz.
ۇلتتىق بانكتىڭ اقشا-كرەديت ساياساتى جونىندەگى دەپارتامەنتىنىڭ ديرەكتورى رۇستەم ورازالين 2025 جىلعى قاڭتاردا ىسكەرلىك بەلسەندىلىك باياۋلاعانىمەن، الايدا، كورسەتكىش 50،2ء-نى قۇراي وتىرىپ، وتكەن جىلعى اقپاننان وڭ ايماقتا كەلە جاتقانىن ناقتىلايدى.
كورسەتكىش ءوندىرىس پەن قىزمەت كورسەتۋ سەكتورىندا يندەكس تومەندەۋىنە بايلانىستى باياۋلادى. بۇل سەكتورلاردا ىسكەرلىك بەلسەندىلىك تيىسىنشە 49،9-عا جانە 49،7-گە دەيىن (2024 جىلعى جەلتوقسانداعى تيىسىنشە 50،4-تەن جانە 50،2-دەن) تومەندەپ، تەرىس ايماققا ءوتتى.
"كورسەتكىش ساۋدا مەن قۇرىلىستا عانا تيىسىنشە 51،6 جانە 51،2 قۇراپ (2024 جىلعى جەلتوقساندا تيىسىنشە – 52،1 جانە 53،9)، وڭ ايماقتا قالدى. تاۋ-كەن ءوندىرۋ ونەركاسىبىندە يندەكس 49،9-عا دەيىن (48،3-تەن) وسكەنىنە قاراماستان، ءالى دە تەرىس ايماقتا قالىپ وتىر"، - دەيدى رۇستەم ورازالين.
2025 جىلعى قاڭتاردا بيزنەس-احۋال يندەكسى (باي) جاقساردى. بيزنەس جۇرگىزۋدىڭ قازىرگى جانە كەلەشەك جاعدايىن باعالاۋ كورستكىشى دە جاقساردى. سول سەبەپتى بيزنەس-احۋال يندەكسى 12،8 بولىپ، ارتا ءتۇستى. بيزنەس-سيكل "ساعاتىنىڭ" ينديكاتورى ءوسۋ ايماعىندا قالدى.
"كاسىپورىنداردىڭ باعالاۋى بويىنشا، ولاردىڭ ونىمدەرىنە/كورسەتىلەتىن قىزمەتىنە سۇرانىس ارتتى. كورسەتكىش باسەڭدەگەنىنە قاراماستان، ەڭ جوعارى سۇرانىس قۇرىلىستا بايقالىپ وتىر"، دەلىنگەن تۇسىنىكتەمەدە.
جالپى ەكونوميكادا سۇرانىس ءوستى، ءبىراق سالالار بويىنشا وزگەرىس ءارتۇرلى باعىتتى كورسەتتى. رەسپوندەنتتەر ينفراقۇرىلىمنىڭ وزگەرۋىنە وڭ باعا بەرسە، قالعان فاكتورلاردى (بيزنەستى قورعاۋ ماسەلەسىن، سالىق جۇكتەمەسىن جانە قارجىعا/كرەديتكە قولجەتىمدىلىكتى) تەرىس باعالادى، اسىرەسە سالىق جۇكتەمەسىن باعالاۋ كورسەتكىشى ناشارلادى.
بۇعان دەيىن "ينفلياسيا بولجامدى كورسەتكىشتەن اسىپ ءتۇسىپ، ساراپشىلار شۋ ەتتى" دەگەن ماقالا جاريالانعان. 2025 جىلى قاڭتاردا ينفلياسيا ۇدەي ءتۇسىپ، ءبىر جىلدا 8،9% قۇرادى. ساراپشىلار ونىڭ بولجامدى كورسەتكىشتەن اسىپ تۇسكەنىن، بۇل فاكت اقشا-نەسيە ساياساتىن قاتاڭداتۋ قاجەتتىلىگىن راستايتىنىن دابىل قاعا ايتادى.
