Qazaqstanda 2025 jyldyń qańtar aiynda óndiris pen qyzmet kórsetý salasyndaǵy indekstiń tómendeýine bailanysty iskerlik belsendilikt kúrt baiaýlady, dep jazady Dalanews.kz.
Ulttyq Banktiń Aqsha-kredit saiasaty jónindegi departamentiniń direktory Rústem Orazalin 2025 jylǵy qańtarda iskerlik belsendilik baiaýlaǵanymen, alaida, kórsetkish 50,2-ni qurai otyryp, ótken jylǵy aqpannan oń aimaqta kele jatqanyn naqtylaidy.
Kórsetkish óndiris pen qyzmet kórsetý sektorynda indeks tómendeýine bailanysty baiaýlady. Bul sektorlarda iskerlik belsendilik tiisinshe 49,9-ǵa jáne 49,7-ge deiin (2024 jylǵy jeltoqsandaǵy tiisinshe 50,4-ten jáne 50,2-den) tómendep, teris aimaqqa ótti.
"Kórsetkish saýda men qurylysta ǵana tiisinshe 51,6 jáne 51,2 qurap (2024 jylǵy jeltoqsanda tiisinshe – 52,1 jáne 53,9), oń aimaqta qaldy. Taý-ken óndirý ónerkásibinde indeks 49,9-ǵa deiin (48,3-ten) óskenine qaramastan, áli de teris aimaqta qalyp otyr", - deidi Rústem Orazalin.
2025 jylǵy qańtarda biznes-ahýal indeksi (BAI) jaqsardy. Biznes júrgizýdiń qazirgi jáne keleshek jaǵdaiyn baǵalaý kórstkishi de jaqsardy. Sol sebepti biznes-ahýal indeksi 12,8 bolyp, arta tústi. Biznes-tsikl "saǵatynyń" indikatory ósý aimaǵynda qaldy.
"Kásiporyndardyń baǵalaýy boiynsha, olardyń ónimderine/kórsetiletin qyzmetine suranys artty. Kórsetkish báseńdegenine qaramastan, eń joǵary suranys qurylysta baiqalyp otyr", delingen túsiniktemede.
Jalpy ekonomikada suranys ósti, biraq salalar boiynsha ózgeris ártúrli baǵytty kórsetti. Respondentter infraqurylymnyń ózgerýine oń baǵa berse, qalǵan faktorlardy (biznesti qorǵaý máselesin, salyq júktemesin jáne qarjyǵa/kreditke qoljetimdilikti) teris baǵalady, ásirese salyq júktemesin baǵalaý kórsetkishi nasharlady.
Buǵan deiin "Infliatsiia boljamdy kórsetkishten asyp túsip, sarapshylar shý etti" degen maqala jariialanǵan. 2025 jyly qańtarda infliatsiia údei túsip, bir jylda 8,9% qurady. Sarapshylar onyń boljamdy kórsetkishten asyp túskenin, bul fakt aqsha-nesie saiasatyn qatańdatý qajettiligin rastaitynyn dabyl qaǵa aitady.
