اۋىل شارۋاشىلىعى ءمينيسترى ايداربەك ساپاروۆ بيىل ەلىمىزدە اۋىل شارۋاشىلىعى داقىلدارى ەگىلەتىن جەر كولەمى وتكەن جىلمەن سالىستىرعاندا 518 مىڭ گەكتارعا ارتاتىنىن مالىمدەدى، دەپ حابارلايدى Dalanews.kz.
ءمينيستردىڭ ايتۋىنشا، اۋىل شارۋاشىلىعى ءونىمىن ەكى ەسە ۇلعايتۋ جونىندەگى جول كارتاسى اياسىندا ەگىس القاپتارىن ءارتاراپتاندىرۋ جۇمىستارى جالعاسادى. بارلىق ءتيىستى كورسەتكىش اكىمدىكتەرگە جەتكىزىلگەن.
“بيىل اۋىل شارۋاشىلىعى داقىلدارى 23،8 ميلليون گەكتارعا ەگىلەدى، بۇل وتكەن جىلمەن سالىستىرعاندا 518 مىڭ گەكتارعا كوپ”، — دەدى مينيستر.
ءارتاراپتاندىرۋ اياسىندا رەنتابەلدىگى جوعارى داقىلداردىڭ كولەمى 750 مىڭ گەكتارعا ۇلعايادى.
“ونىڭ ىشىندە: مايلى داقىلدار – 365 مىڭ گا،ازىقتىق داقىلدار – 184 مىڭ گا، ارپا – 114 مىڭ گا، قاراقۇمىق – 41،5 مىڭ گا، كارتوپ – 15 مىڭ گا بولادى”، — دەپ قوستى ول.
سونىمەن قاتار بيدايعا تاۋەلدىلىكتى ازايتۋ ماقساتىندا ەگىستىك قۇرىلىمىن وزگەرتۋ جۇمىستارى جالعاسىپ جاتىر. سوڭعى ەكى جىلدا بيداي القابى 730 مىڭ گەكتارعا، ال بيىل 159 مىڭ گەكتارعا قىسقارعان.
مينيستر مايلى جانە بۇرشاق داقىلدارىنا ىشكى جانە سىرتقى نارىقتا تۇراقتى سۇرانىس بار ەكەنىن اتاپ ءوتتى.
“ماسەلەن، بيدايدىڭ ورتاشا باعاسى تونناسىنا 65-70 مىڭ تەڭگە بولسا، زىعىر جانە راپس سياقتى ەكسپورتقا باعىتتالعان داقىلداردىڭ باعاسى 200 مىڭعا دەيىن بارادى جانە ودان دا جوعارى”، — دەدى ول.
ەسكە سالايىق، بۇعان دەيىن اۋىل شارۋاشىلىعى ءمينيسترى ايداربەك ساپاروۆ قازاقستاندا ەگىس جۇمىستارىنا نەسيە بەرۋدە فەرمەرلەرگە قويىلاتىن تالاپتار قايتا قاراستىرىلاتىنىن حابارلاعان ەدى. بۇل تۋرالى "بايتەرەك" حولدينگى باسشىلىعىمەن، سونداي-اق حولدينگ قۇرامىنا كىرەتىن قارجى ينستيتۋتتارىنىڭ وكىلدەرىمەن كەزدەسۋى كەزىندە ءمالىم بولدى.
"كەزدەسۋ بارىسىندا ەگىس جۇمىستارىنا نەسيە الۋ كەزىندە فەرمەرلەرگە قويىلاتىن جەكەلەگەن تالاپتاردى الىپ تاستاۋ ماسەلەسى قارالدى. ءمينيستردىڭ تاپسىرمالارى "بايتەرەك" حولدينگىنىڭ جۇمىسىنا الىندى جانە جاقىن ارادا قايتا قارالاتىن بولادى"، - دەيدى قۇزىرلى ۆەدومستۆو.
كەزدەسۋدە 2025 جىلعى كوكتەمگى ەگىس جانە ەگىن جيناۋ جۇمىستارىن ەرتە قارجىلاندىرۋعا وتىنىمدەردى قابىلداۋعا قاتىستى ماسەلەلەرگە نازار اۋدارىلدى. پرەزيدەنتتىڭ تاپسىرماسىن ورىنداۋ شەڭبەرىندە وسى ماقساتتارعا 700 ملرد تەڭگەگە دەيىن باعىتتاۋ جوسپارلانۋدا، ونىڭ 560 ملرد تەڭگەسى نارىقتىق كاپيتال كوزدەرىنەن تارتىلاتىن بولادى.
2024 جىلدىڭ 29 قاراشاسىنان باستاپ "اگرارلىق نەسيە كورپوراسياسى" اق "كەڭ دالا 2" باعدارلاماسى بويىنشا جىلدىق 5% جەڭىلدىكتى سىياقى مولشەرلەمەسىمەن قارجىلاندىرۋ اشىلدى. 1364 اۋىل شارۋاشىلىعى تاۋارىن وندىرۋشىلەردەن شامامەن 205،1 ملرد تەڭگە سوماعا وتىنىمدەردىڭ جالپى پۋلى قالىپتاستىرىلدى، ونىڭ ىشىندە 1253 اشتو-دەن 195،5 ملرد تەڭگە سوماعا وتىنىمدەر جۇمىسقا قابىلداندى. 125،6 ملرد تەڭگە سوماسىنا 907 ءاشتو قارجىلاندىرىلدى.
سونىمەن قاتار، كەزدەسۋ بارىسىندا ىنتىماقتاستىقتى كەڭەيتۋ، جەڭىلدەتىلگەن كرەديت بەرۋ باعىتتارى، اگرارلىق سەكتورعا ينۆەستيسيالار تارتۋ، اگروونەركاسىپتىك كەشەننىڭ باسىم باعىتتارى بويىنشا "اكك" اق قاراجاتىنا ىسكە اسىرىلاتىن جوبالار، قارجىلاندىرۋدىڭ جاڭا تەتىكتەرى جانە 2025 جىلعا ارنالعان جوسپارلار قارالدى.
مەملەكەت باسشىسىنىڭ تاپسىرمالارىن ىسكە اسىرۋ شەڭبەرىندە ايداربەك ساپاروۆ اۋىل شارۋاشىلىعىنىڭ تۇراقتى دامۋىنا قول جەتكىزۋ، اگرارلىق سەكتوردى قولداۋ بويىنشا جاڭا باعىتتاردى ەنگىزۋ جانە سالانى قارجىلاندىرۋ قارقىنىن كۇشەيتۋ قاجەتتىلىگى ءۇشىن ىنتىماقتاستىقتىڭ ماڭىزدىلىعىن اتاپ ءوتتى.
