2026 جىلدىڭ باسىندا قازاقستاننىڭ جىلجىمايتىن مۇلىك نارىعى جوعارى بازاعا شىقتى. باستاپقى تۇرعىن ءۇيدىڭ باعاسى ءبىر جىل ىشىندە 15–17%-عا ءوسىپ، ينفلياسيا دەڭگەيىنەن اسىپ ءتۇستى. ال كوكتەم مەزگىلى ءداستۇرلى تۇردە نارىقتاعى بەلسەندىلىكتى كۇشەيتىپ، باعاعا 3–5% ۇستەمە قوسۋى مۇمكىن. بيىل بۇل ءۇردىس سالىق جانە رەتتەۋشى وزگەرىستەر اياسىندا جالعاسىپ وتىر، دەپ حابارلايدى Dalanews.kz.
قۇرىلىس سالاسىنىڭ ساراپشىسى، Qazaq Expert Club وكىلى ديليارا سەيىتنۇروۆانىڭ پىكىرىنشە، باعانىڭ جىلدىق وسىمىنە بىرنەشە نەگىزگى فاكتور اسەر ەتكەن: 2026 جىلدان باستاپ جاڭا قۇرىلىستارعا 16% ققس ەنگىزىلۋى، قۇرىلىس ماتەريالدارى قىمباتتاۋى جانە قارجىلاندىرۋ قۇنى ارتۋى. سونىمەن قاتار، ديەۆەلوپەرلەر جاڭا جوبالاردى نارىققا ساقتىقپەن شىعارىپ وتىر، بۇل دا ۇسىنىس شەكتەلۋىنە ىقپال ەتەدى.
ساراپشىنىڭ ايتۋىنشا، ماجبۇرلەپ شىعارۋ ەرەجەلەرىنە قاتىستى وزگەرىستەردى تالقىلاۋ قايتالاما نارىقتاعى ينۆەستورلار بەلسەندىلىگىن تومەندەتىپ، سۇرانىستىڭ ءبىر بولىگىن باستاپقى نارىققا باعىتتاۋى مۇمكىن.
يپوتەكالىق مولشەرلەمەلەر جوعارى بولۋىنا (18-22%) قاراماستان، نارىقتى "وتباسى بانكىنىڭ" جەڭىلدەتىلگەن باعدارلامالارى قولداپ وتىر. كوكتەمدە بۇل فاكتورعا دەپوزيتتەر بويىنشا مەملەكەتتىك سىياقى تولەنۋى قوسىلادى. سونىڭ ناتيجەسىندە ناۋرىزدا باعا ءوسىمى ەكونوم جانە كومفورت كلاسس سەگمەنتتەرىندە، سونىڭ ىشىندە الماتى مەن استانادا 36 ملن تەڭگەگە دەيىنگى پاتەرلەردە بايقالۋى ىقتيمال.
ال قايتالاما نارىقتا كەرىسىنشە توقىراۋ ءقاۋپى ساقتالادى. بيزنەس جانە ەليت ساناتىنداعى تۇرعىن ۇيلەر جەڭىلدەتىلگەن يپوتەكا ىقپالىنان تىس قالىپ وتىر.
