ءماجىلىس دەپۋتاتتارى نارتاي ارالباي ۇلى مەن ءۇنزيلا شاپاق استانا مەن الماتى اكىمدىكتەرىندە تۇراقتارعا جاۋاپتى تۇلعالارمەن جۇمىس توبىن وتكىزىپ، ءبىرقاتار تۇيتكىلدى سۇراقتاردى تالقىلادى، دەپ حابارلايدى Dalanews.kz.

ارالباي ۇلى جيىن قورىتىندىسىن جاريالاپ، استاناداعى اقىلى اۆتوتۇراقتار 2025 جىلدىڭ جازىندا تولىقتاي اكىمدىك تاراپىنا وتەتىنىن مالىمدەدى.

“اقىلى اۆتوتۇراقتىڭ اقىسىن تولەۋدى ۇمىتىپ كەتكەندەرگە الدىمەن sms-حابارلاما بارسىن دەگەنبىز. الماتى ءبىر قادام جاساپتى. الماتىدا اقىلى اۆتوتۇراققا كىرسەڭىز، ول جەردە ءسىزدى كامەراعا تۇسىرسە، "ءسىزدىڭ كولىگىڭىز اقىلى اۆتوتۇراققا كىردى" دەگەن حابارلاما كەلەدى ەكەن”، - دەدى ول.

بۇل وزگەرىستەر اكىمشىلىك كودەكسكە ەنگىزىلگەن تۇزەتۋلەردىڭ ناتيجەسىندە جۇزەگە اسۋدا. ماجىلىسمەننىڭ ايتۋىنشا، جاڭا ەرەجەگە سايكەس، اۆتوتۇراق تولەمىن جاساماعاندارعا بىردەن ايىپپۇل سالىنبايدى – الدىمەن SMS-حابارلاما جىبەرىلىپ، 24 ساعات ىشىندە تولەۋ مۇمكىندىگى بەرىلەدى. تەك وسى ۋاقىت وتكەن سوڭ عانا ايىپپۇل قاراستىرىلۋى مۇمكىن.

“اكىمدىكتەر "ورىنداۋدىڭ امالىن ىزدەيمىز" دەدى. ايتپاقشى، اقىلى اۆتوتۇراقتاردىڭ اقىسىن تولەمەگەندەرگە سالىناتىن ايىپپۇلدىڭ قۇنىن 3 ەسەگە تۇسىرگەنىمىزدى الدىندا ايتقانمىن. زاڭ ناۋرىزدا كۇشىنە ەنەدى”، - دەپ قوستى ول.

ءماجىلىس دەپۋتاتى تاعى ءبىر ماڭىزدى جاڭالىقتى جەتكىزدى. قازىرگى ۋاقىتتا استانادا اقىلى اۆتوتۇراقتا 5 مينۋت تەگىن تۇرۋعا رۇقسات ەتىلسە، ەندى بۇل ۋاقىت 15 مينۋتقا ۇزارتىلماق. دەپۋتات بۇل ماسەلەنى كوتەرىپ، ءتيىستى ساۋال جولداعان. ال اكىمدىك ۇسىنىستى قولداعان كورىنەدى.

سونىمەن قاتار حالىققا قىزمەت كورسەتۋ ورتالىقتارىنىڭ جانىندا اقىلى اۆتوتۇراقتاردىڭ بولماۋى كەرەگى دە ايتىلعان.

“حقكو الدىندا اقىلى اۆتوتۇراق بولماۋ كەرەك دەدىك. اكىمدىك ۋاجبەن كەلىستى، ىسكە اسىرۋ تەتىكتەرىن دايىنداپ اكەلەدى”، - دەدى ءماجىلىس دەپۋتاتى.

نارتاي ارالباي ۇلى بارلىق وزگەرىس كۇشىنە ەنگەن كەزدە قوسىمشا حابارلايتىنىن العا تارتتى.

ەسكە سالايىق، بۇعان دەيىن ءماجىلىس دەپۋتاتى باقىتجان بازاربەك ەلەكتروموبيلدەرگە ارنالعان تەگىن تۇراقتاردىڭ جەكە پايدا كوزدەرىنە اينالۋ ءقاۋپىن كوتەرگەن ەدى. بۇل ماسەلە ماجىلىستە ەلەكتروموبيلدەرگە جاعداي جاساۋعا باعىتتالعان زاڭ جوباسىن تالقىلاۋ بارىسىندا ايتىلدى.

دەپۋتات زاڭ جوباسىن قولدايتىنىن ءبىلدىرىپ، ءبىراق ەكى سۇراق تۋىنداعانىن جەتكىزدى. ونىڭ ايتۋىنشا، تۇراقتار نەگە جەر كودەكسىنە ەنگىزىلمەگەن، ال قۋاتتاندىرۋ ستانسيالارى ساۋلەت-قۇرىلىس زاڭىنا نەگىزدەلىپ ەنگىزىلۋدە. سونىمەن قاتار ول الماتىداعى “الماتى پاركينگ” تاجىريبەسىن مىسالعا كەلتىرىپ، تەگىن تۇراقتاردىڭ كوممەرسيالانۋ ءقاۋپىن اتاپ ءوتتى.