Májilis depýtattary Nartai Aralbaiuly men Únzila Shapaq Astana men Almaty ákimdikterinde turaqtarǵa jaýapty tulǵalarmen jumys tobyn ótkizip, birqatar túitkildi suraqtardy talqylady, dep habarlaidy Dalanews.kz.
Aralbaiuly jiyn qorytyndysyn jariialap, Astanadaǵy aqyly avtoturaqtar 2025 jyldyń jazynda tolyqtai ákimdik tarapyna ótetinin málimdedi.
“Aqyly avtoturaqtyń aqysyn tóleýdi umytyp ketkenderge aldymen sms-habarlama barsyn degenbiz. Almaty bir qadam jasapty. Almatyda aqyly avtoturaqqa kirseńiz, ol jerde sizdi kameraǵa túsirse, "sizdiń kóligińiz aqyly avtoturaqqa kirdi" degen habarlama keledi eken”, - dedi ol.
Bul ózgerister ákimshilik kodekske engizilgen túzetýlerdiń nátijesinde júzege asýda. Májilismenniń aitýynsha, jańa erejege sáikes, avtoturaq tólemin jasamaǵandarǵa birden aiyppul salynbaidy – aldymen SMS-habarlama jiberilip, 24 saǵat ishinde tóleý múmkindigi beriledi. Tek osy ýaqyt ótken soń ǵana aiyppul qarastyrylýy múmkin.
“Ákimdikter "oryndaýdyń amalyn izdeimiz" dedi. Aitpaqshy, aqyly avtoturaqtardyń aqysyn tólemegenderge salynatyn aiyppuldyń qunyn 3 esege túsirgenimizdi aldynda aitqanmyn. Zań naýryzda kúshine enedi”, - dep qosty ol.
Májilis depýtaty taǵy bir mańyzdy jańalyqty jetkizdi. Qazirgi ýaqytta Astanada aqyly avtoturaqta 5 minýt tegin turýǵa ruqsat etilse, endi bul ýaqyt 15 minýtqa uzartylmaq. Depýtat bul máseleni kóterip, tiisti saýal joldaǵan. Al ákimdik usynysty qoldaǵan kórinedi.
Sonymen qatar halyqqa qyzmet kórsetý ortalyqtarynyń janynda aqyly avtoturaqtardyń bolmaýy keregi de aitylǵan.
“HQKO aldynda aqyly avtoturaq bolmaý kerek dedik. Ákimdik ýájben kelisti, iske asyrý tetikterin daiyndap ákeledi”, - dedi Májilis depýtaty.
Nartai Aralbaiuly barlyq ózgeris kúshine engen kezde qosymsha habarlaitynyn alǵa tartty.
Eske salaiyq, buǵan deiin Májilis depýtaty Baqytjan Bazarbek elektromobilderge arnalǵan tegin turaqtardyń jeke paida kózderine ainalý qaýpin kótergen edi. Bul másele Májiliste elektromobilderge jaǵdai jasaýǵa baǵyttalǵan zań jobasyn talqylaý barysynda aityldy.
Depýtat zań jobasyn qoldaitynyn bildirip, biraq eki suraq týyndaǵanyn jetkizdi. Onyń aitýynsha, turaqtar nege Jer kodeksine engizilmegen, al qýattandyrý stantsiialary sáýlet-qurylys zańyna negizdelip engizilýde. Sonymen qatar ol Almatydaǵy “Almaty parking” tájiribesin mysalǵa keltirip, tegin turaqtardyń kommertsiialaný qaýpin atap ótti.
