قازاقستانداعى ۋران قورى ۇلتتىق اتوم ستانسيالارىن كەمىندە 60 جىل قامتاماسىز ەتۋگە جەتكىلىكتى. بۇل تۋرالى اتوم ەنەرگياسى جونىندەگى اگەنتتىك ءتوراعاسىنىڭ ورىنباسارى عۇمار سەرعازين مالىمدەدى، دەپ حابارلايدى Dalanews.kz سىلتەمە جاساپ.

“ۇلتتىق اتوم ستانسيالارىمىزدى قامتاماسىز ەتۋگە جەتكىلىكتى ۋران بار. قازىرگى رەسمي مالىمەتكە سايكەس، ەلدەگى تابيعي ۋران قورى شامامەن 1 ميلليون تونناعا جۋىق. فينليانديامەن دە كەلىسسوزدەر جۇرگىزىپ جاتىرمىز. ولاردا ەكى اتوم ەلەكتر ستانسياسى سالىنىپ جاتىر. كەلىسىمگە كەلسە، جەتكىزۋ مۇمكىندىگى قامتاماسىز ەتىلەدى”، - دەدى عۇمار سەرعازين Informburo.kz-كە بىلدىرگەن پىكىرىندە.

ەسكە سالايىق، 28 قازاندا اقوردادا وتكەن ءىس-شارانىڭ كۋلۋارىندا اتوم ەنەرگياسى جونىندەگى اگەنتتىكتىڭ ءتوراعاسى الماسادام ساتقالييەۆ قازاقستان ۋرانىن ەكسپورتتاۋ جوسپارى تۋرالى ايتقان ەدى.

"فينليانديانىڭ اتوم ەلەكتر ستانسيالارىنا – ساتىپ الۋشىلارعا قازاقستاندىق ۋران جەتكىزۋ مۇمكىندىكتەرى تالقىلانۋدا. قازاقستان ءاردايىم حالىقارالىق نارىقتى كەڭەيتۋگە مۇددەلى، ءبىز ءاردايىم سەرىكتەستەرىمىزگە قازاقستاندىق ۋراندى ساتىپ الۋ مۇمكىندىگىن قاراستىرۋدى ۇسىنامىز. ءبىز بۇل ۇسىنىستى ارىپتەستەرىمىزگە جەتكىزەمىز"، – دەدى ول.

ونىڭ ايتۋىنشا، بۇعان دەيىن فينليانديا بيلىگى بۇل ماسەلەگە زور قىزىعۋشىلىق بىلدىرگەن.

"بۇل ساپار – وسىنداي تاسىمالدىڭ كولەمى مەن مۇمكىندىكتەرى جونىندە ناقتى كەلىسسوزدەر جۇرگىزۋگە وتە جاقسى مۇمكىندىك"، – دەپ تۇيىندەدى الماسادام ساتقالييەۆ.