قازاقستان قىتايعا 1،5 مىڭ اقبوكەن سىيلايدى. بۇل تۋرالى مەملەكەت باسشىسى قاسىم-جومارت توقايەۆ مالىمدەدى، دەپ حابارلايدى Dalanews.kz.
بۇل رەتتە ق ر پرەزيدەنتىنىڭ باسپا ءسوز قىزمەتى تاراتقان اقپاراتتا بىلاي دەلىنەدى:
"قازاقستان پرەزيدەنتى قاسىم-جومارت توقايەۆ كورشى ەلدەگى اقبوكەن پوپۋلياسياسىن قالپىنا كەلتىرۋ ماقساتىندا قىتايدىڭ باتىس بولىگىنە جىبەرۋ ءۇشىن جۇڭگو ۇكىمەتىنە 1،5 مىڭ اقبوكەن بەرۋ تۋرالى شەشىم قابىلداعانىن مالىمدەدى. ءوز كەزەگىندە قحر ءتوراعاسى سي سزينپين قاسىم-جومارت توقايەۆقا بۇل ءۇشىن العىس ءبىلدىردى، ويتكەنى جۇڭگو اقبوكەندەر پوپۋلياسياسىن قالپىنا كەلتىرۋدى ماڭىزدى ماسەلە دەپ سانايدى".
ايتا كەتسەك، قازاقستاندا كوبەيىپ كەتكەن اقبوكەندەر ماسەلەسى بيىل كوكتەمدە ماجىلىستە كوتەرىلگەن بولاتىن. ءماجىلىس دەپۋتاتى نارتاي ارالباي ۇلى كيىك سانىن رەتتەۋ تەتىگىن قۇرۋدى، اسىرەسە كوكتەمدە قاپتاپ كەتەتىن ولەكسەلەرىن ءقاۋىپسىز جويۋ جۇيەسىن قالىپتاستىرۋدى ۇسىنعان. سەبەبى 2024 جىلى ءبىر باتىس قازاقستان وبلىسىندا كيىك سانى 2،3 ميلليونعا جەتكەن، الداعى ەكى جىلدا 5 ميلليوننان اسادى دەگەن بولجام بار. مامانداردىڭ ايتۋىنشا، وبلىس ەكوجۇيەسى ەڭ كوبى 500 مىڭ باس كيىكتى عانا كوتەرە الادى. سونداي-اق دەپۋتات 2023 جىلى بقو-داعى 921،7 مىڭ گەكتار جەردى كيىك تاپتاپ، ەگىستىك القاپتار مەن جايىلىمداردى جارامسىز كۇيگە تۇسىرگەنىن ايتادى. ناتيجەسىندە ءتورت اۋدان (بوكەي ورداسى، جاڭاقالا، جانىبەك، كازتالوۆ) توتەنشە جاعداي جاريالاۋعا ءماجبۇر بولدى.
