"قمگ-نىڭ مۇناي ءوندىرۋشى ۇيىمدارىنىڭ شيكىزاتى قازاقستاننىڭ ىشكى نارىعىنا مۇناي ونىمدەرىن جەتكىزۋ جونىندەگى مىندەتتەمەلەردى ورىنداۋ ءۇشىن وتاندىق مۇناي وڭدەۋ زاۋىتتارىنا جىبەرىلەدى. ال قمگ مۇنايىنىڭ ەكسپورتقا شىعاتىن كولەمى ءبىرىڭعاي جۇيەلىك ترەيدەر — KMG Trading'كە جەتكىزىلەدى، ول الدىمەن "قازمۇنايگازدىڭ" رۋمىنياداعى مۇناي وڭدەۋ زاۋىتتارىنىڭ قاجەتتىلىگىن وتەيدى.
ەكسپورتقا ارنالعان مۇنايدىڭ قالعان كولەمى ۇزاق مەرزىمدى كەلىسىمشارتتار بويىنشا ساتىلادى. سونىمەن قاتار، "قازمۇنايگاز" پرەزيدەنتتىڭ تاپسىرماسىنا سايكەس، گەرمانياعا سىناق رەتىندە مۇناي پارتياسىن 2023 جىلدىڭ قاڭتار ايىندا جونەلتۋ مۇمكىندىگىن قاراستىرىپ جاتىر" دەدى 20 جەلتوقساندا قمگ باسقارما باستىعى ماعزۇم مىرزاعالييەۆ.
قمگ-نىڭ حابارلاۋىنشا، 20 جەلتوقساندا "قازمۇنايگاز" باسشىلارى گەرمانيانىڭ ەكونوميكا جانە كليماتتى قورعاۋ ىستەرى جونىندەگى مينيسترلىگى وكىلىمەن - ونلاين، بۋندەستاگ دەپۋتاتى كريستيان گەركەمەن استانادا وفلاين كەزدەسۋ وتكىزگەن.
تاراپتار قازاقستان مۇنايىن گەرمانيانىڭ شۆەدت قالاسىنداعى مۇناي وڭدەۋ زاۋىتىنا ەكسپورتتاۋ ماسەلەسىن تالقىلاعان. گەرمانيا جاعى "دوستىق" مۇناي قۇبىرى ارقىلى شيكىزاتتى تۇراقتى تاسىمالداۋعا قىزىعۋشىلىق بىلدىرگەن.
"قمگ باسشىسى قازاقستان مۇنايىن اتالعان مۇناي قۇبىرى ارقىلى گەرمانياعا ەكسپورتتاۋ مۇمكىن ەكەنىن، الايدا كەلىسىمشارت جانە تەحنيكالىق ماسەلەلەردى شەشۋ قاجەتتىگىن اتاپ ءوتتى" دەپ جازىلعان قمگ حابارلاماسىندا.
تاراپتار "ءوزارا ءتيىمدى ىنتىماقتاستىقتى ودان ءارى جالعاستىرۋعا ءۇمىت بىلدىرگەن".
شۆەدت قالاسىندا ورنالاسقان، جىلىنا 10 ميلليون توننادان استام شيكى مۇنايدى وڭدەۋگە شاماسى بار مۇناي وڭدەۋ زاۋىتى بەرلين مەن شىعىس گەرمانيانىڭ كوپ بولىگىن وتىنمەن قامتاماسىز ەتىپ وتىر.
"دوستىق" قۇبىرى – رەسەي مۇنايىن ەو-قا تاسىمالدايتىن ءىرى ارنالاردىڭ ءبىرى. ول رەسەيدەن باستالىپ، ءبىر تارماعى بەلارۋس، پولشا، گەرمانيا، لاتۆيا، ليتۆاعا بارادى.
https://dalanews.kz/bas-takyryp/84660-qazaqstan-atomnan-qol-uzgen-emes-ayes-t
