Qazaqstan 2023 jyly qańtarda synaq retinde "Dostyq" qubyry arqyly Germaniiaǵa munai tasymaldap kóredi.
Bul jóninde "Qazmunaigaz" kompaniiasynyń 21 jeltoqsan kúngi baspasóz habarlamasynda aitylǵan.
"QMG-niń munai óndirýshi uiymdarynyń shikizaty Qazaqstannyń ishki naryǵyna munai ónimderin jetkizý jónindegi mindettemelerdi oryndaý úshin otandyq munai óńdeý zaýyttaryna jiberiledi. Al QMG munaiynyń eksportqa shyǵatyn kólemi biryńǵai júielik treider — KMG Trading'ke jetkiziledi, ol aldymen "QazMunaiGazdyń" Rýmyniiadaǵy munai óńdeý zaýyttarynyń qajettiligin óteidi.
Eksportqa arnalǵan munaidyń qalǵan kólemi uzaq merzimdi kelisimsharttar boiynsha satylady. Sonymen qatar, "QazMunaiGaz" prezidenttiń tapsyrmasyna sáikes, Germaniiaǵa synaq retinde munai partiiasyn 2023 jyldyń qańtar aiynda jóneltý múmkindigin qarastyryp jatyr" dedi 20 jeltoqsanda QMG basqarma bastyǵy Maǵzum Myrzaǵaliev.
QMG-nyń habarlaýynsha, 20 jeltoqsanda "Qazmunaigaz" basshylary Germaniianyń ekonomika jáne klimatty qorǵaý isteri jónindegi ministrligi ókilimen - onlain, Býndestag depýtaty Kristian Gerkemen Astanada oflain kezdesý ótkizgen.
Taraptar Qazaqstan munaiyn Germaniianyń Shvedt qalasyndaǵy munai óńdeý zaýytyna eksporttaý máselesin talqylaǵan. Germaniia jaǵy "Dostyq" munai qubyry arqyly shikizatty turaqty tasymaldaýǵa qyzyǵýshylyq bildirgen.
"QMG basshysy Qazaqstan munaiyn atalǵan munai qubyry arqyly Germaniiaǵa eksporttaý múmkin ekenin, alaida kelisimshart jáne tehnikalyq máselelerdi sheshý qajettigin atap ótti" dep jazylǵan QMG habarlamasynda.
Taraptar "ózara tiimdi yntymaqtastyqty odan ári jalǵastyrýǵa úmit bildirgen".
Shvedt qalasynda ornalasqan, jylyna 10 million tonnadan astam shiki munaidy óńdeýge shamasy bar munai óńdeý zaýyty Berlin men Shyǵys Germaniianyń kóp bóligin otynmen qamtamasyz etip otyr.
"Dostyq" qubyry – Resei munaiyn EO-qa tasymaldaityn iri arnalardyń biri. Ol Reseiden bastalyp, bir tarmaǵy Belarýs, Polsha, Germaniia, Latviia, Litvaǵa barady.
https://dalanews.kz/bas-takyryp/84660-qazaqstan-atomnan-qol-uzgen-emes-ayes-t
