قازاقستان ۇلتتىق بانكى "ەستە قالاتىن وقيعالار مەن ءبىرتۋار ادامدار" سەرياسىنان قازاقستان كونستيتۋسياسىنا 30 جىل كوللەكسيالىق مونەتالارىن اينالىسقا شىعارادى، دەپ حابارلايدى Dalanews.kz.

قازاقستان كونستيتۋسياسىنىڭ 30 جىلدىعى – ەلىمىزدىڭ قۇقىقتىق مەملەكەت قۇرۋ جانە دەموكراتيالىق ينستيتۋتتاردى نىعايتۋ جولىنداعى تاريحي تاعدىرىن ايشىقتايتىن ايتۋلى داتا. اتا زاڭ تاۋەلسىزدىكتىڭ ىرگەتاسى، بىرلىك پەن ازاماتتىق كەلىسىمنىڭ سيمۆولى سانالادى.

مونەتالاردا ەل كونستيتۋسياسىن ايشىقتايتىن اشىق كىتاپ، ال ونىڭ ۇستىندە قازاقستان كارتاسىنىڭ كونتۋرى فونىندا «30» سانى بەينەلەنگەن. قازاقستان كارتاسىنىڭ ءدال ورتاسىنا كۇندى بەينەلەيتىن شاڭىراق ورنالاسقان. «30» سانىن بەينەلەۋ ىسىندە التىن جالاتۋ تەحنولوگياسى قولدانىلعان. مونەتانىڭ ەرەكشەلىگى دە سوندا.

مونەتالار:

• التىن جالاتىلعان 925 سىنامدى كۇمىستەن جاسالعان. ماسساسى 31،1 گرامم، ديامەترى 38،61 مم، دايىنداۋ ساپاسى – «proof»، نومينالى 1 000 تەڭگەلىك، تارالىمى – 1 000 (ءبىر مىڭ) دانا؛

نومينالى 1 000 تەڭگەلىك مونەتانىڭ بەينەسى

• نيبراسس/نەيزيلبەر قوسپالارىنان (بيكولورلى) جاسالعان. ماسساسى 6،45 گرامم، ديامەترى 24،5 مم، دايىنداۋ ساپاسى – «uncirculated»، نومينالى 100 تەڭگەلىك، تارالىمى – 5 000 000 (بەس ميلليون) دانا.

نومينالى 100 تەڭگەلىك مونەتانىڭ بەينەسى

نومينالى 1 000 تەڭگەلىك كۇمىس مونەتالاردىڭ قۇب ينتەرنەت-دۇكەنى ارقىلى قاشان ساتۋعا شىعارىلاتىنى قۇب رەسمي سايتىندا قوسىمشا حابارلانادى.

نومينالى 100 تەڭگەلىك بيكولورلى مونەتالار سيركۋلياسيالىق مونەتالارمەن بىرگە قازاقستان رەسپۋبليكاسىنىڭ اۋماعىندا ەركىن اينالىمدا بولادى.

كوللەكسيالىق مونەتالار قازاقستان تەڭگە سارايىندا دايىندالدى.

بۇعان دەيىن سايتىمىزدا "بانكتەر ءۇشىن ەڭ تومەن رەزەرۆتىك تالاپتاردى ارتتىرعان ۇلتتىق بانك ينفلياسيانى اۋىزدىقتاي الا ما؟" دەگەن ماقالا جاريالانعان بولاتىن.