2025 جىلى قازاقستاننىڭ سىرتقى ساۋدا اينالىمى 143،9 ملرد دوللاردى قۇراپ، 2024 جىلمەن سالىستىرعاندا نومينالدى تۇردە 1،3%-عا ءوستى. ونىڭ ىشىندە ەكسپورت كولەمى 79 ملرد دوللار بولىپ، 3،2%-عا تومەندەدى. ال يمپورت 64،8 ملرد دوللارعا جەتىپ، 7،4%-عا ارتقان، دەپ حابارلايدى Dalanews.kz.
ەكسپورتتا بۇرىنعىداي مۇناي مەن شيكىزات نەگىزگى تابىس كوزى بولىپ وتىر. ەل ەكسپورتتايتىن ءونىمىنىڭ جارتىسىنان كوبى، ياعني 50،5%-ى شيكى مۇناي مەن مۇناي ونىمدەرى. بۇدان كەيىن راديواكتيۆتى حيميالىق ەلەمەنتتەر مەن يزوتوپتار (5،3%)، تازارتىلعان مىس پەن مىس قورىتپالارى (5،2%)، مىس كەندەرى مەن كونسەنتراتتارى (3،6%) جانە فەرروقورىتپالار (2،6%) كىرەدى.
قازاقستان ونىمدەرىن ەڭ كوپ ساتىپ الاتىن ەلدەردىڭ قاتارىندا يتاليا (19،8%) كوش باستاپ تۇر. ودان كەيىن جۇڭگو (19،2%)، رەسەي (10،3%)، نيدەرلاندى (7،6%)، تۇركيا (4،9%) جانە وزبەكستان (4،5%).
يمپورتقا كەلسەك، قازاقستان شەتەلدەن ەڭ كوپ اكەلەتىن تاۋار - جەڭىل اۆتوكولىكتەر. ولار جالپى يمپورتتىڭ 4،4%-ىن قۇرايدى. بۇدان كەيىن دارى-دارمەك (2،8%) جانە ۇيالى تەلەفوندار (2،4%) كەلەدى. سونداي-اق اۆتوكولىك كۋزوۆتارى (2،3%) مەن كولىك بولشەكتەرى (2،2%) دە يمپورتتا ماڭىزدى ورىن الادى.
قازاقستانعا تاۋار جەتكىزەتىن نەگىزگى ەلدەر قاتارىندا رەسەي (29،7%) مەن جۇڭگو (29،2%) الدا كەلەدى. سونىمەن بىرگە گەرمانيا (4،8%)، وڭتۇستىك كورەيا (3،5%)، اقش (3،3%) جانە فرانسيا (2،4%) دا ماڭىزدى سەرىكتەستەر قاتارىندا.
