ەلەمدٸك بوكس تٶرەشٸلٸگٸندە AIBA-نىڭ ەڭ جوعارى “ٷش جۇلدىزدى” مەرتەبەسٸن العاش بولىپ ەنشٸلەگەن قازاق تٶرەشٸسٸ بەرٸكبول قاسىمحانوۆ بٸرنەشە جىلدان بەرٸ ۇلتتىق قۇراماداعى جۇمىسىنان شەتتەتٸلٸپ كەلەدٸ. كەيٸنگٸ 23 جىلدا شەتەلدٸك فەدەراتسييالار ونىڭ بٸلٸكتٸلٸگٸنە سەنٸم ارتىپ, حالىقارالىق جارىستارعا قازىلىق ەتۋگە شاقىرعانىمەن, ٶز ەلٸندە ونىڭ وراسان زور تەجٸريبەسٸ مەن بٸلٸمٸ ەسكەرۋسٸز قالعان. ورىندالماعان ۋەدەلەر, سىرتىنان تاعىلعان نەگٸزسٸز ايىپتار مەن جٷيەسٸز كادر ساياساتى حالىقارالىق دەرەجەدەگٸ تٶرەشٸنٸڭ كەسٸبي ورتادان ىعىسۋىنا الىپ كەلگەن. قاسىمحانوۆ Dalanews.kz تٸلشٸسٸنە بەرگەن ەسكليۋزيۆتٸ سۇحباتىندا وتاندىق بوكستاعى كادرلىق توقىراۋدىڭ باستى سەبەپتەرٸن اتاپ, شەشٸلمەي كەلە جاتقان جٷيەلٸ مەسەلەنٸ اشىپ ايتتى.
كەسٸبي جولى قالاي باستالدى?
بەرٸكبول قاسىمحانوۆ حالىقارالىق تٶرەشٸلٸك جولىن 2003 جىلى پەكٸستاندا ٶتكەن تۋرنيردەن باستاعان. الايدا بۇل ساپارعا فەدەراتسييا قاراجات بٶلمەگەن. سوندىقتان جول شىعىنىن ٶتەۋ ٷشٸن دەمەۋشٸ ٸزدەۋگە مەجبٷر بولعان. ايتۋىنشا, سول كەزدە مەجٸلٸس دەپۋتاتى نۇرتاي سەبيليانوۆ قولداۋ كٶرسەتٸپ, ەۋە بيلەتٸن الىپ بەرگەن.
“سول ۋاقىتتا قولىمدا تەلەفونداعى اۋدارماشى ەمەس, شاعىن سٶزدٸك كٸتاپشا بولدى. سوندا اعىلشىن تٸلٸن بٸلمەي حالىقارالىق دەڭگەيدە ٶسۋ مٷمكٸن ەمەس ەكەنٸن تٷسٸندٸم. قازاقستاندا العان بٸلٸمٸم از ەكەنٸن دە سول ساپاردا سەزٸندٸم. ەگەر وسى جولمەن جٷرەتٸن بولسام, ٷنەمٸ ٷيرەنۋٸم كەرەك دەگەن شەشٸمگە كەلدٸم”, - دەيدٸ ول.
تۋرنيرگە ازييا, افريكا جەنە امەريكا قۇرلىعىنان تٶرەشٸلەر كەلگەن. جارىستى سول كەزدەگٸ AIBA پرەزيدەنتٸ انۆار چاۋدري دە باقىلاعان. قاسىمحانوۆتىڭ ايتۋىنشا, ۇيىم باسشىسى ونىڭ جۇمىسىن بٸرنەشە كەزدەسۋ بويى ارنايى قاداعالاپ, كەيٸن وڭ باعاسىن بەرگەن. وسى ساپاردا ول ازييا دەڭگەيٸندەگٸ قاپتال تٶرەشٸسٸ رەتٸندە العاشقى ەمتيحانىن تاپسىرادى.
“بۇل بٸر رەتتٸك ساپار بولىپ قالعان جوق. كەيٸن وڭتٷستٸك كورەياداعى جاستار اراسىنداعى ەلەم چەمپيوناتىنا, يندونەزيياداعى پرەزيدەنت كۋبوگٸنە جەنە باسقا دا حالىقارالىق جارىستارعا قاتىستىم. جاس امير حان مەن كەيٸن ەلەمدٸك بوكستا تانىلعان بٸرقاتار سپورتشىنىڭ جەكپە-جەكتەرٸنە تٶرەلٸك ەتتٸم”, - دەيدٸ ول.
وسىلايشا 2005 جىلى AIBA قاپتال تٶرەشٸسٸ دەرەجەسٸن, ال 2007 جىلى رەفەري سەرتيفيكاتىن الادى. قاسىمحانوۆ سول كەزەڭدەگٸ تالاپتىڭ قازٸرگٸدەن ەلدەقايدا قاتاڭ بولعانىن ايتادى. سەبەبٸ بٸر دەڭگەيدەن ەكٸنشٸسٸنە ٶتۋ ٷشٸن بەلگٸلٸ بٸر ۋاقىت جۇمىس ٸستەپ, حالىقارالىق جارىستاردا تەجٸريبە جيناۋ قاجەت ەدٸ.
“بٷگٸن كەيبٸر ەمتيحاندى تەلەفون ارقىلى تاپسىرۋعا بولادى. ال بٸز ەر جەكپە-جەكتٸ تالداپ, رينگتەگٸ جەنە قاپتالداعى تٶرەشٸنٸڭ قاتەسٸن بەتپە-بەت تالقىلايتىنبىز. تەورييامەن شەكتەلمەي, پراكتيكالىق جۇمىستان ٶتتٸك. تٶرەشٸنٸ مامان ەتەتٸن دە وسى تەجٸريبە”, - دەيدٸ قاسىمحانوۆ.
بەيجٸڭگە اپارعان بەس جىل
العاشقى حالىقارالىق ەمتيحانىن پەكٸستاندا تاپسىرعان قاسىمحانوۆ اراعا بەس جىل سالىپ, بەيجٸڭ وليمپياداسىندا تٶرەلٸك ەتەدٸ. ماماننىڭ سٶزٸنشە, ٷمٸتكەرلەردٸڭ جۇمىسى بٸرنەشە جىل بويى باعالانىپ, باستاپقى 88 تٶرەشٸنٸڭ اراسىنان 34 مامان عانا وليمپياداعا تاڭدالعان.
“ورتا ازييادان جالعىز مەن باردىم. ٶزبەكستاننان دا, قىرعىزستاننان دا تەجٸريبەلٸ تٶرەشٸلەر بولدى. بٸراق AIBA كوميسسيياسى ەر جارىستاعى رەيتينگ پەن جۇمىستى مۇقييات تەكسەردٸ. وليمپياداعا بٸر كٷندە نەمەسە بٸرەۋدٸڭ ٶتٸنٸشٸمەن بارا المايسىڭ. وعان دەيٸن بٸرنەشە ٷلكەن ەمتيحاننان ٶتۋٸڭ كەرەك”, - دەيدٸ ول.
قاسىمحانوۆ بەيجٸڭ وليمپياداسىندا فينالدىق بەسەكەلەرگە دەيٸن قىزمەت اتقارعان ساناۋلى تٶرەشٸنٸڭ بٸرٸ بولعانىن ايتادى. كەيٸن AIBA وليمپيادا فينالىندا جۇمىس ٸستەگەن ماماندارعا ەڭ جوعارى ٷش جۇلدىزدى مەرتەبە بەرگەن. ونىڭ سٶزٸنشە, قازاقستاننان بۇل دەڭگەيگە العاش جەتكەن تٶرەشٸ دە ٶزٸ بولعان.
ونىڭ حالىقارالىق تەجٸريبەسٸ بٸر وليمپيادامەن شەكتەلمەگەن. قاسىمحانوۆ جەتٸ ەلەم چەمپيوناتىندا, 2006 جىلعى دوحا ازييا ويىندارىندا جەنە وننان استام ازييا چەمپيوناتىندا تٶرەلٸك ەتكەنٸن ايتادى. كەيٸن حالىقارالىق تەحنيكالىق مامان, تٶرەشٸلەردٸ باعالاۋشى جەنە نۇسقاۋشى دەرەجەلەرٸن الىپ, ٶزگە ەلدەردە سەمينار مەن ەمتيحاندار ٶتكٸزە باستاعان.
ٶكٸنٸشكە قاراي, ەلەمدٸك دەڭگەيدەگٸ جەتٸستٸگٸ قاسىمحانوۆتىڭ ەل ٸشٸندەگٸ بەدەلٸن نىعايتا الماعان. كەرٸسٸنشە, وليمپيادادان كەيٸن كٶپ ۇزاماي ونىڭ ۇلتتىق تٶرەشٸلٸك جولىنداعى ورنى ەلسٸرەي باستاعان.
بٸر جەكپە-جەكتەن كەيٸن باستالعان قىسىم
قاسىمحانوۆ 2007-2009 جىلدارى قازاقستانداعى تٶرەشٸلەر القاسىن باسقارعانىن ايتادى. وسى ارالىقتا ول تٶرەشٸلەر دايارلاۋ جٷيەسٸن جولعا قويۋعا, جارىستاردىڭ ۇزاقتىعىن حالىقارالىق تالاپقا جاقىنداتۋعا جەنە مامانداردىڭ ەڭبەكاقىسىن كٶتەرۋگە كٷش سالعان.
ونىڭ باستاماسىمەن قازاقستاندا بٸرنەشە سەمينار ٶتٸپ, 27 تٶرەشٸ حالىقارالىق دەرەجەگە يە بولعان. سول كەزەڭدە ناتاليا تسوي مەن ەسەم امانباەۆا سىندى ەيەل تٶرەشٸلەر دە حالىقارالىق ارەناعا شىققان. كەيٸن ناتاليا تسوي 2016 جىلعى وليمپيادادا تٶرەلٸك ەتكەن.
“جاقسى بوكسشىنى جاقسى تٶرەشٸ تاڭدايدى. تٶرەشٸنٸڭ قولىندا سپورتشىنىڭ بٸرنەشە جىلدىق ەڭبەگٸ, بولاشاعى مەن تاعدىرى تۇرادى. سوندىقتان مەن ەرٸپتەستەرٸمە: “ەشكٸمگە كٶمەكتەسپەيمٸز, ەشكٸمنٸڭ ىعىنا جىعىلمايمىز. كٸم جەڭسە, جەڭٸستٸ سوعان بەرەمٸز”, دەپ ايتاتىنمىن”, - دەيدٸ ول.
قاسىمحانوۆتىڭ ايتۋىنشا, ٶزٸنە جاسالعان قىسىم 2009 جىلى سەرٸك سەپيەۆ پەن ونىڭ قارسىلاسى اراسىنداعى داۋلى جەكپە-جەكتەن كەيٸن باستالعان. ول كەزدەسۋدە جەڭٸستٸ سەپيەۆكە بەرگەن. الايدا ۇپاي ەسەبٸ فەدەراتسيياداعى كەيبٸر ادامداردىڭ نارازىلىعىن تۋعىزعان. وسىدان كەيٸن ونىڭ كەسٸبي بٸلٸگٸنە كٷمەن كەلتٸرەتٸن سٶزدەر تاراپ, شەشۋشٸ بەسەكەلەرگە تٶرەشٸ رەتٸندە تاعايىنداۋ سيرەي باستاعان.
2009 جىلعى 16 جەلتوقساندا قاسىمحانوۆ تٶرەشٸلەر القاسىنىڭ تٶراعالىعىنان ٶزٸنٸڭ قاتىسۋىنسىز الىنعانىن ايتادى.
ٶز ەلٸمە كەرەك بولمادىم…
كەسٸبي مٷمكٸندٸگٸ شەكتەلە باستاعان كەزدە قاسىمحانوۆقا قاراعاندى وبلىسىنىڭ بوكس فەدەراتسيياسىن باسقارۋ ۇسىنىلادى. ول ٶڭٸردە ەكٸ جىلدان استام اتقارۋشى ديرەكتور بولىپ, جاس بوكسشىلار مەن تٶرەشٸلەردٸ دايارلاۋعا قاتىسادى. كەيٸن وعان ميانما ۇلتتىق قۇراماسىن جاتتىقتىرۋ جٶنٸندە شاقىرتۋ تٷسەدٸ.
شەشٸم قابىلداۋعا وعان بەس مينۋت جەتكٸلٸكتٸ بولعان.
“قازاقستاندا مەنٸ ەش جارىسقا شاقىرمايتىنىن تٷسٸندٸم. سوندا “ٶز قازاعىما كەرەك بولماسام, كٸمگە كەرەك بولسام, سوعان قىزمەت ەتەمٸن” دەپ ويلادىم. سٶيتٸپ ميانما ۇسىنعان كەلٸسٸمشارتقا قول قويدىم”, - دەيدٸ ول.
سول ەلدە ٷش جىل ەڭبەك ەتٸپ, قۇرامانى وڭتٷستٸك-شىعىس ازييا ويىندارىنا دايىنداعان. ونىڭ جەتەكشٸلٸگٸمەن ەل تاريحىندا العاش رەت تٶرت بوكسشى فينالعا شىققان. وسى نەتيجەدەن كەيٸن كەلٸسٸمشارتى ۇزارتىلعانىن ايتادى.
كەيٸن قاسىمحانوۆ ۆەتنام, تٷركييا, كامبودجا جەنە تەجٸكستاندا جاتتىقتىرۋشى, كەڭەسشٸ جەنە تٶرەشٸلٸك بويىنشا مامان بولىپ جۇمىس ٸستەگەن. ۆەتنامدىق بوكسشىنىڭ وليمپياداعا العاش رەت جولداما الۋىنا ٷلەس قوسقان. رەسەي مەن ورتالىق ازييا ەلدەرٸندە تٶرەشٸلەرگە پراكتيكالىق سەمينارلار ٶتكٸزگەن.
مسەلەنٸڭ ەڭ اششى تۇسى دا وسىندا. ٶزگە مەملەكەتتەر ونىڭ تەجٸريبەسٸن باعالاپ, ارنايى جۇمىسقا شاقىرعانىمەن, قازاقستاندا حالىقارالىق دەڭگەيدەگٸ مامانعا تٶرەشٸلٸك قىزمەتتەن ورىن تابىلماعان.
قولدان جاسالعان قىسىم
قاسىمحانوۆتىڭ ەڭبەك جولىنداعى ەڭ داۋلى مەسەلەنٸڭ بٸرٸ AIBA بەرگەن ٷش جۇلدىزدى مەرتەبەگە بايلانىستى ٶربٸگەن. ونىڭ ايتۋىنشا, بەيجٸڭ وليمپياداسىنان كەيٸن حالىقارالىق ۇيىم وعان جوعارى دەرەجەلٸ تٶرەشٸ ساناتىن بەرگەن. الايدا تيٸستٸ سەرتيفيكات ٶزٸنە ۋاقىتىندا تابىستالماي, كەيٸن اتى AIBA-نىڭ رەسمي دەرەكقورىنان الىنىپ تاستالعان. سٶيتٸپ وعان ٷش جۇلدىزدى مەرتەبەنٸڭ ورنىنا بٸر جىلعا جارامدى تٶمەن ساناتتاعى قۇجات بەرٸلگەن.
“مەنٸڭ رەيتينگٸم جوعارى بولدى. 2012 جىلعى وليمپياداعا دا بارۋعا مٷمكٸندٸگٸم بار ەدٸ. بٸراق حالىقارالىق جارىستارعا ۇسىنۋدىڭ ورنىنا اتىمدى بازادان ٶشٸرٸپ, ٷش جۇلدىزدىڭ ورنىنا بٸر جۇلدىز بەرگٸزدٸ. ارتىمنان جەمقورلىققا قاتىسى بار, حالىقارالىق ۇيىم ٶكٸلدەرٸنە سىيلىق پەن پارا بەرگەن دەگەن جالعان اقپارات تاراتتى. مۇنىڭ بەرٸ جالا ەدٸ”, - دەيدٸ ول.
ونىڭ سٶزٸنشە, بۇل ايىپتاۋلار بٸرنەشە باسىلىمدا جارييالانعان. سول كەزدە زاڭگەرلەر سوتقا جٷگٸنۋدٸ ۇسىنعانىمەن, قاسىمحانوۆ داۋدى جالعاستىرۋدان باس تارتقان. ارادا بٸرنەشە جىل ٶتكەن سوڭ ماتەريالداردىڭ بٸرٸن جازعان جۋرناليست كەشٸرٸم سۇراعانىن ايتادى. بٸراق كٸمنٸڭ تاپسىرما بەرگەنٸ سول كٷيٸ جۇمباق قالعان.
ەدٸلدٸكتٸ قازاقستان ەمەس, حالىقارالىق كوميسسييا ورناتتى
قاسىمحانوۆتىڭ ايتۋىنشا, بٸرنەشە جىلدان كەيٸن AIBA تٶرەشٸلەر كوميسسيياسى ونىڭ ٸسٸن قايتا قاراپ, ٷش جۇلدىزدى مەرتەبەسٸن تولىق قالپىنا كەلتٸرگەن. 2017 جىلى ول اۆسترالييانىڭ گولد-كوست قالاسىندا ٶتكەن ازييا جەنە وكەانييا چەمپيوناتىنا بەيتاراپ تٶرەشٸ رەتٸندە شاقىرىلعان.
سول ساپارداعى رەسمي كەشتە حالىقارالىق ۇيىم ٶكٸلدەرٸ ونىڭ مەرتەبەسٸ قايتارىلعانىن جارييالاپ, ەرٸپتەستەرٸنٸڭ الدىندا قۇتتىقتاعان.
“ماعان “ەدٸلدٸكتٸڭ ورناۋىمەن قۇتتىقتايمىز” دەدٸ. بۇل سٶزدٸ ٶز ەلٸمدەگٸ باسشىلاردان ەستۋٸم كەرەك ەدٸ. بٸراق اينالاما قاراسام, مەنٸ قۇتتىقتاپ, قۇشاقتاپ جاتقاننىڭ بەرٸ شەتەلدٸك ەرٸپتەستەرٸم. بٸر قازاق جوق. سول سەتتە كٶزٸمە جاس كەلدٸ. نە قۋانارىمدى, نە جىلارىمدى بٸلمەدٸم”, - دەيدٸ قاسىمحانوۆ.
الايدا حالىقارالىق مەرتەبەسٸ قالپىنا كەلگەنٸمەن, قازاقستانداعى جاعداي ٶزگەرٸسسٸز قالعان. ونىڭ ايتۋىنشا, شەتەلدٸك جارىستارعا, سەمينارلار مەن ەمتيحاندارعا شاقىرتۋ الىپ جٷرگەن كەزدە دە ۇلتتىق چەمپيوناتتارعا باس سۇقپاعان.
تەك 2015 جىلى تارازدا ٶتكەن قازاقستان چەمپيوناتىنا ونى باس تٶرەشٸ ەتٸپ سوڭعى سەتتە شاقىرعان. قاسىمحانوۆ جارىستان كەيٸن باپكەرلەر مەن فەدەراتسييا ٶكٸلدەرٸنەن تٶرەلٸككە قاتىستى شاعىم بولماعانىن ايتادى. وعان فەدەراتسييادا قىزمەت ۇسىنىلاتىنى دا ايتىلعان. الايدا چەمپيونات اياقتالعان سوڭ بۇل ۋەدە جاۋاپسىز قالعان.
جاقسى تٶرەشٸ جەڭٸستٸڭ ەلۋ پايىزىنا ەسەر ەتەدٸ
قاسىمحانوۆ قازاقستان بوكسىنىڭ كەيٸنگٸ جىلدارداعى نەتيجەسٸن تەك سپورتشىلار مەن باپكەرلەردٸڭ دايىندىعىمەن باعالاۋ جەتكٸلٸكسٸز ەكەنٸن ايتادى. ونىڭ پٸكٸرٸنشە, حالىقارالىق جارىستاردا ەلدٸڭ بەدەلدٸ تٶرەشٸسٸنٸڭ بولماۋى بوكسشىلاردىڭ نەتيجەسٸنە دە ەسەر ەتەدٸ.
“باپكەرلەر “جاقسى تٶرەشٸ جەڭٸستٸڭ ەلۋ پايىزى” دەپ ايتاتىن. بۇل بٸرەۋگە زاڭسىز ۇپاي الىپ بەرۋ دەگەن سٶز ەمەس. حالىقارالىق ورتادا سەنٸڭ ەلٸڭنەن بٸلٸكتٸ تٶرەشٸ بولماسا, سول مەملەكەتتٸڭ داۋسى دا ەلسٸز ەستٸلەدٸ. قازاقستان, كۋبا, ٶزبەكستان مەن رەسەي بوكس دەرجاۆالارى سانالادى. بٸراق ٶزگە ەلدەردٸڭ تٶرەشٸلەرٸ حالىقارالىق جارىستاردا جٷرگەندە, قازاقستان ٶكٸلٸنٸڭ بولماۋى ٷلكەن سۇراق تۋعىزادى”, - دەيدٸ ول.
قاسىمحانوۆ كەيٸنگٸ جىلدارى تٶرەشٸلەر دايارلاۋ ٸسٸندەگٸ ساباقتاستىق ٷزٸلگەنٸن دە سىنعا الدى. ونىڭ ايتۋىنشا, جاستارعا مٷمكٸندٸك بەرٸلۋٸ قاجەت, بٸراق جەتكٸلٸكتٸ تەجٸريبەسٸ جوق ماماندى بٸردەن حالىقارالىق جارىسقا شىعارۋ وتاندىق بوكستىڭ بەدەلٸنە كەرٸ ەسەر ەتۋٸ مٷمكٸن.
“رەفورما دەپ جٷرگەنٸمٸز ەكٸ جىلعا سوزىلعان ەكسپەريمەنتكە اينالدى. جاس تٶرەشٸلەر بار, بٸراق تەجٸريبەسٸ از. كەيبٸرٸ كەسٸبي تۇرعىدا شىڭدالۋدان بۇرىن شەتەلگە بارىپ, سۋرەتكە تٷسۋدٸ ويلايدى. ال تٶرەشٸلٸك اتاق تا, ساپار دا ەمەس. ونىڭ ەر شەشٸمٸنٸڭ ارتىندا سپورتشىنىڭ تاعدىرى تۇر. كٶكتەمدە قانداي تۇقىم ەكسەڭ, كٷزدە سونىڭ جەمٸسٸن كٶرەسٸڭ”, - دەيدٸ ول.
ول فەدەراتسييانىڭ اقپاراتتىق جۇمىسىنا دا كٶڭٸلٸ تولمايتىنىن جەتكٸزدٸ. ايتۋىنشا, ەلەۋمەتتٸك جەلٸدە قازاقستاندىق بوكسشىلاردىڭ تەك سەتتٸ سوققىلارىن قيىپ كٶرسەتۋ جەكپە-جەكتٸڭ شىنايى بارىسىن اڭعارتپايدى. مۇنداي بەينەلەر كٶرەرمەنگە جالعان ەسەر قالىپتاستىرىپ, سپورتشىنىڭ ناقتى دايىندىعىن باعالاۋعا كەدەرگٸ كەلتٸرەتٸنٸن اتاپ ٶتتٸ.
“بوكستاعى مەسەلەنٸ ەدەمٸ بەينەروليكپەن جاسىرا المايسىڭ. نەتيجە شىعارۋ ٷشٸن رينگتەگٸ ناقتى جۇمىس, مىقتى كوماندا جەنە كەسٸبي تٶرەشٸلەر مەكتەبٸ قاجەت. بٸرلٸك جوق جەردە تۇراقتى جەڭٸس تە بولمايدى”, - دەيدٸ مامان.
قازاققا سىرتتان جاۋ كەرەك ەمەس
قاسىمحانوۆ ٶز تەجٸريبەسٸنٸڭ قازاقستاننان گٶرٸ شەتەلدە كٶبٸرەك باعالانىپ جٷرگەنٸن قىنجىلا ايتتى.
“قازاقتا “ٶزگە ەلدە سۇلتان بولعانشا, ٶز ەلٸڭدە ۇلتان بول” دەگەن سٶز بار. بٸراق ٶز ەلٸڭە بٸلٸمٸڭ دە, تەجٸريبەڭ دە قاجەت بولماسا, سەنٸ باعالاعان جەردە جۇمىس ٸستەۋگە تۋرا كەلەدٸ. مەن باسقا مەملەكەتتەردە قىزمەت ەتسەم دە, قازاقستانعا پايدام تيسە ەكەن دەپ جٷردٸم”, - دەيدٸ ول.
تەجٸريبەلٸ تٶرەشٸ مۇنىڭ سالدارى حالىقارالىق جارىستاردا انىق كٶرٸنٸپ جٷرگەنٸن ايتادى. ونىڭ پٸكٸرٸنشە, سوڭعى ازييا ويىندارىندا قازاقستاننان بەدەلدٸ تٶرەشٸنٸڭ بولماۋى بٸرنەشە داۋلى جەكپە-جەكتە ۇلتتىق قۇرامانىڭ مٷددەسٸن كەسٸبي دەڭگەيدە قورعاۋعا مٷمكٸندٸك بەرمەگەن.
“ازييا ويىندارىندا قازاقستاننان بٸردە-بٸر تٶرەشٸ بولعان جوق. ٶزبەكستاننىڭ, قىرعىزستاننىڭ, تەجٸكستاننىڭ ٶكٸلدەرٸ جٷردٸ, ال بوكستان الدىڭعى قاتارداعى ەل سانالاتىن قازاقستاننان مامان بارمادى. سونىڭ سالدارىنان جەڭٸسكە لايىق بٸرنەشە بوكسشىمىزدىڭ جولى كەسٸلدٸ دەپ ەسەپتەيمٸن. بٸز ەكٸ التىنمەن شەكتەلمەۋٸمٸز كەرەك ەدٸ”, - دەيدٸ قاسىمحانوۆ.
ول قازاقستاندا تەجٸريبەلٸ ماماندار بٸرٸن-بٸرٸ قولداۋدىڭ ورنىنا, جولىن كەسۋگە بەيٸم تۇراتىنىن اشىق ايتتى.
“قازاققا سىرتتان جاۋ كەرەك ەمەس. كەيدە قازاقتىڭ ٶزٸنە قازاق جاۋ بولىپ جاتادى. مەنٸڭ دە جىلدار بويى جيناعان تەجٸريبەم ٶز ەلٸمدە باعالانباي, كەرٸسٸنشە, جولىمدى كەسۋگە ەرەكەت جاسالدى”, - دەيدٸ ول.
قازٸر قاسىمحانوۆ قازاق سپورت جەنە تۋريزم اكادەميياسىندا بوكس, اۋىر اتلەتيكا جەنە شىعىس جەكپە-جەگٸ تٷرلەرٸ كافەدراسىن باسقارادى. كافەدرادا تاەكۆوندو, كاراتە, ۋشۋ-ساندا جەنە باسقا دا سپورت تٷرلەرٸ بويىنشا ماماندار دايارلانادى. ونىڭ ايتۋىنشا, شەكٸرتتەرٸ حالىقارالىق جارىستاردا, سونىڭ ٸشٸندە ازييا ويىندارىندا جەڭٸسكە جەتٸپ, جٷلدەلٸ ورىنداردان كٶرٸنگەن.
“كافەدرامىزدا ون بەستەن استام سپورت تٷرٸ بار. ستۋدەنتتەرٸمٸز ازييا ويىندارى مەن باسقا دا حالىقارالىق جارىستاردا ەل نامىسىن قورعاپ, جەڭٸسكە جەتٸپ جٷر. تاەكۆوندو, كاراتە, ۋشۋ-ساندا باعىتىندا نەتيجەلٸ ٶنەر كٶرسەتكەن جاستارىمىز بار. ولاردىڭ ەر جەتٸستٸگٸ ۇستاز رەتٸندە بٸز ٷشٸن ٷلكەن قۋانىش”, - دەيدٸ قاسىمحانوۆ.
مەسەلەگە كٸم نازار اۋدارادى?
شىنتۋايتىندا, قازاقستاندا بٸلٸكتٸ تٶرەشٸ جوق ەمەس, بار مامانعا ورىن تابىلماي وتىر. سوندىقتان بەرٸكبول قاسىمحانوۆتىڭ باسىنان ٶتٸپ جاتقان جاعدايدى بٸر ادامنىڭ جەكە رەنٸشٸ دەپ قاراۋعا بولمايدى. حالىقارالىق دەڭگەيدە مويىندالعان, جيىرما جىلدان استام تەجٸريبەسٸ بار مامان نەلٸكتەن ٶز ەلٸنٸڭ تٶرەشٸلٸك قۇرامىنان شەت قالدى? ونىڭ ورنىنا كەلگەن كادرلار قانداي تالاپپەن ٸرٸكتەلدٸ? ەلدە قانشا حالىقارالىق دەرەجەدەگٸ تٶرەشٸ بار? كەيٸنگٸ ەكٸ جىلدا ولاردى دايارلاۋعا قانشا قاراجات بٶلٸنٸپ, قانداي نەتيجە شىقتى? بۇل سۇراقتارعا فەدەراتسييا اشىق جاۋاپ بەرۋٸ تيٸس.
