قازاق حالقىنان كەنەسارى حاننىڭ ءولىمى ءۇشىن كەشىرىم سۇراعان قىرعىز ءانشى قوماقتى ايىپپۇل تولەيتىن بولدى، دەپ حابارلايدى Dalanews.kz.

ءانشى قايرات پىرىمبەردييەۆكە 100 مىڭ سوم ايىپپۇل سالىندى. 

بۇل شامامەن 588 516 تەڭگە. 

ەسكە سالايىق،قىرعىزستاننىڭ ۇلتتىق قاۋىپسىزدىك مەملەكەتتىك كوميتەتى ءانشى قايرات پريمبەردييەۆتى قاماۋعا العان بولاتىن. ول بۇعان دەيىن كەنەسارى حاننىڭ ءولىمى ءۇشىن كەشىرىم سۇراعان ەدى. 

ول ۇلتارالىق ارازدىقتى قوزدىرۋعا باعىتتالعان مالىمدەمە جاساعانى ءۇشىن قاماۋعا الىنعان. ۆەدومستۆو ءانشىنىڭ ەلدەن شىعۋىنا تىيىم سالدى.

قازىرگى ۋاقىتتا ءتيىستى تەرگەۋ جانە پروسەسسۋالدىق شارالار ءجۇرىپ جاتىر. قىرعىزستاندا ناسىلدىك، ۇلتتىق، ۇلتتىق، ءدىني نەمەسە ايماقارالىق ارازدىقتى قوزدىرۋعا باعىتتالعان ارەكەتتەر ءۇشىن 10 جىلعا دەيىن باس بوستاندىعىنان ايىرۋ جازاسى قاراستىرىلعان.

ەسكە سالايىق، بۇعان دەيىن قىرعىزستاندىق ءانشى قايرات پريمبەردييەۆ قازاق حالقىنان كەنەسارى حاننىڭ ءولىمى ءۇشىن كەشىرىم سۇراعانى ءۇشىن سىنعا ۇشىراعان بولاتىن.

قازاقستاندىق باق-تىڭ ءبىرى قايرات پريمبەردييەۆتەن سۇحبات العان بولاتىن. ءانشى تاريحي وقيعالارعا قاتىستى پىكىر ءبىلدىرىپ، وتكەنگە وكىنىش بىلدىرگەن. ول قىرعىز حانى ورمون حاننىڭ كەنەسارى قاسىموۆتىڭ باسىن الۋعا ءماجبۇر بولعانىن ايتىپ، قازاق حالقىنان كەشىرىم سۇرادى:

«ءبىزدىڭ ورمون حان كەنەسارى حاندى ولتىرۋگە ءماجبۇر بولعان. مەن بۇل ءۇشىن قازاق حالقىنان كەشىرىم سۇراعىم كەلەدى. بۇل جاعداي ءۇشىن شىن جۇرەكتەن كەشىرىم سۇرايمىن. ءقازىر جىلاعىم كەلىپ تۇر، راسىندا. ءبىز كەنەسارى حاننىڭ باسىن قايتارىپ، قۇران وقىپ، بۇل وكپەنى لايىقتى تۇردە ۇمىتۋىمىز كەرەك»، — دەدى ول سۇحباتىندا.

الايدا بۇل سوزدەرى ءۇشىن ءانشى سىننىڭ استىندا قالدى، ول «قازاقستاننىڭ پروپاگانداسىنا ەردى» دەپ ايىپتالدى. 24.kg باسىلىمى قىرعىزستاننىڭ مادەنيەت ۆيسە-مينيسترى مارات تاعايەۆتىڭ پىكىرىن جاريالادى. ول قايرات پريمبەردييەۆ «قازاقستاننىڭ ىقپالىنا ءتۇسىپ قالعانىن» ايتتى.

شەنەۋنىكتىڭ پىكىرىنشە، قىرعىزدار ءوز جەرىن قورعاعان ورمون حاننىڭ ارەكەتى ءۇشىن كەشىرىم سۇراماۋى كەرەك. جاستار تاريحىن ءبىلۋى ءۇشىن قىرعىزستاندا وزدەرىنىڭ تاريحي فيلمدەرىن ءتۇسىرۋ قاجەت ەكەنىن اتاپ ءوتتى.