QAZAQ MARATHON 2024: قونايەۆ سپورت ورتالىعىنا اينالدى!

جاربول كەنت ۇلى 26 مام. 2024 21:19 1592

26 مامىردا قونايەۆ سپورت استاناسىنا اينالىپ، اركىم وزىنە لايىق قاشىقتىقتى تابا الدى. QAZAQ MARATHON قايتا ورالىپ، بيىل شارا ەرەكشە ماڭىزدىلىق پەن اۋقىمعا يە بولدى.

الماتى وبلىسى اكىمىنىڭ ورىنباسارى رۋستام يساتايەۆ جارىسقا قاتىسىپ، سالاۋاتتى ءومىر سالتى مەن ايماقتاعى سپورتتىڭ دامۋىنىڭ ماڭىزدىلىعىن اتاپ ءوتتى.

"بارشاڭىزدى مارافوننىڭ اشىلۋىمەن شىن جۇرەكتەن قۇتتىقتايمىن! ءبىزدىڭ وبلىس ورتالىعى - قونايەۆ قالاسىنان باستالعان اۋقىمدى جوبا رەسپۋبليكانىڭ بىرنەشە قالالارىندا وتەتىنى ءبىز ءۇشىن ۇلكەن ماقتانىش"، - دەدى رۋستام يساتايەۆ.

جارىسقا 1500-دەن استام قاتىسۋشى جينالدى، ولاردىڭ ءارقايسىسى ايماقتاعى بۇقارالىق سپورتتىڭ دامۋىنا ءوز ۇلەسىن قوسۋدا.

"پرەزيدەنت قاسىم-جومارت كەمەل ۇلى توقايەۆ ءار ادامنىڭ دەنساۋلىعى - ۇلتتىڭ دەنساۋلىعى ەكەنىن اتاپ ءوتتى. ال، دەنى ساۋ ۇلتتى قالىپتاستىرۋ - مەملەكەتتىڭ باستى ماقساتتارىنىڭ ءبىرى"، - دەپ اتاپ ءوتتى اكىمنىڭ ورىنباسارى.

ءىس-شارانىڭ باس سەرىكتەسى - Freedom life كومپانياسى.

QAZAQ MARATHON بەلسەندى قازاقستاندىقتار ءۇشىن ماڭىزدى وقيعا بولىپ قانا قويماي، كوپتەگەن ادامداردى سالاۋاتتى ءومىر سالتىنا قوسىلۋعا شابىتتاندىرۋى مۇمكىن.

مارافون بۇكىل قازاقستاندى قامتىپ، ءبىر قالادان باستالىپ، باسقا قالالارعا اۋىسادى. ءاربىر مارافون قاتىسۋشىلارىن ەستەلىك مەدالدار كۇتىپ تۇر.

مارافون كەلەسى اۋقىمدى ماقساتتاردى كوزدەيدى:

* سالاۋاتتى ۇلت ءۇشىن! قاتىسۋشىلاردان تۇسكەن قاراجاتتىڭ ءبىر بولىگى ينتەرناتتار مەن بالالار ۇيلەرىندەگى بالالارعا جاتتىعۋ ۇيىمداستىرۋعا جۇمسالادى.
* تەڭ مۇمكىندىكتەر! مارافونعا قاتىسۋ ءۇشىن تولەم جاساي وتىرىپ، قاتىسۋشى مۇمكىندىگى شەكتەۋلى بالالاردىڭ جۇگىرىسىن جارتىلاي دەمەيدى. بالالار مارافونعا قاتىسىپ، مەدال، ەستەلىك مەرچ الىپ، سپورتپەن شۇعىلدانۋعا موتيۆاسيا الادى.

QAZAQ MARATHON 2024 - بۇل جاي عانا سپورتتىق شارا ەمەس، بۇل قازاقستاننىڭ سالاۋاتتى بولاشاعىنا قادام!

"بۇل مەنىڭ 15ء-شى مارافونىم. جەڭىل اتلەتيكا جارىستارىنا 19 جاسىمنان باستاپ قاتىسىپ كەلەمىن، ءقازىر 35 جاستامىن. مەن بىردە-بىر وسىنداي سپورتتىق شارانى جىبەرمەۋگە تىرىسامىن. بۇگىن ەرلەر اراسىندا 5 كم قاشىقتىقتا ءۇشىنشى ورىنعا يە بولدىم. بۇگىنگى اۋا رايى دا جۇگىرۋگە ەڭ قولايلى. بارشاڭىزعا كوپ جۇگىرىپ، دەنساۋلىقتارىڭىز مىقتى بولۋىن تىلەيمىن"، - دەدى الماتىلىق جارىسقا قاتىسۋشى سۇلتان ايعاراي.

ايتا كەتەرلىگى، 5 كم جانە 10 كم قاشىقتىقتاردى ۇجىم بولىپ جۇگىرگەندەر دە بولدى. سولاردىڭ ءبىرى - ەڭبەكشىقازاق اۋدانىنان كەلگەن "تەحنوگراد" ءجشس-نىڭ 30 ادامدىق تاتۋ كومانداسى.

"بەس جىل بۇرىن ءبىزدىڭ قىزمەتكەرلەر وسىنداي بۇقارالىق سپورتتىق ءىس-شارالارعا، مارافوندارعا قاتىسۋ يدەياسىنا كەلدى. سودان بەرى ءبىز بىرلەسىپ جارىستارعا قاتىسۋدى ۇيعاردىق، بۇل ءبىزدىڭ ۇيىمىمىزداعى بىرلىكتى جانە كورپوراتيۆتىك رۋحتى نىعايتۋعا كومەكتەسەدى. مۇنداي ءىس-شارالار دەنساۋلىققا وڭ اسەر ەتىپ، سالاۋاتتى ءومىر سالتىن ناسيحاتتاپ، جۇگىرۋگە دەگەن سۇيىسپەنشىلىكتى وياتادى. بۇل مارافون وتە جاقسى ۇيىمداستىرىلعان. وسىنداي كەرەمەت سپورت مەرەكەسىن ۇيىمداستىرعاندارىڭىز ءۇشىن ۇيىمداستىرۋشىلارعا العىس ايتامىز"، - دەپ اتاپ ءوتتى "تەحنوگراد" ج ش س باسشىسى زيا تالعاتوۆ.

جارىستارعا رەسەي، بەلارۋس، وزبەكستان، قىرعىزستان جانە قازاقستاننان 10 جاستان اسقان اۋەسقويلار مەن كاسىپقويلار قاتىستى.


ۇسىنىلعان
سوڭعى جاڭالىقتار