قازاقستان جول عىلىمي-زەرتتەۋ ينستيتۋتى جول قۇرىلىس ماتەريالدارى مەن جاڭا تەحنولوگيالار ءبولىمىنىڭ باسشىسى، حيميا عىلىمدارىنىڭ PhD سالتانات ءاشىموۆا «Egemen Qazaqstan» گازەتىنە بەرگەن سۇحباتىندا قازاقستان عالىمدارى جەرگىلىكتى تابيعي ماتەريالداردى، ونىڭ ىشىندە اكتاس پەن تەڭىز قابىرشىعىن قولدانا وتىرىپ، جول قۇرىلىسىنا بەرىك جانە قولايلى كۇكىرتتى-قيىرشىق تاستى جاساپ شىعارعانىن ايتتى.
– وتاندىق عالىمنىڭ جەتىستىكتەرى شەتەلدىك يننوۆاسيالاردان كەم تۇسپەيتىنىن ايتا كەتەيىك. مىسالى، ينستيتۋت ماماندارى كۇكىرتتى بيتۋمعا قوسىمشا نەمەسە الماستىرعىش كومپونەنت رەتىندە قولدانۋعا بايلانىستى زەرتتەۋلەردى قولعا الدى.
بۇل – قىمبات بيتۋمنىڭ شىعىنىن ازايتۋعا سەپتەسەدى. سونىمەن بىرگە كۇكىرتتىڭ كومەگىمەن ەلىمىزدىڭ باتىس وڭىرلەرىندەگى جول قۇرىلىسىنداعى وزەكتى ماسەلەلەردى دە شەشۋگە بولادى.
وزدەرىڭىز بىلەتىندەي، اتىااۋ، اقتوبە، باتىس قازاقستان جانە ماڭعىستاۋ وبلىستارىندا قيىرشىق تاس وندىرىلمەيتىندىكتەن، جولشىلارعا قاجەتتى شيكىزاتتى باسقا وڭىرلەردەن تاسۋعا تۋرا كەلەدى. بۇل ءتيىمسىز.
سوندىقتان ءبىزدىڭ عالىمدار جەرگىلىكتى تابيعي ماتەريالداردى، ونىڭ ىشىندە اكتاس پەن تەڭىز قابىرشىعىن قولدانا وتىرىپ، ونىڭ نەگىزىندە جول قۇرىلىسىنا بەرىك جانە قولايلى كۇكىرتتى-قيىرشىق تاستى جاساپ شىعاردى. سونداي-اق بيتۋمنىڭ تۇتقىرلىعىن جاقسارتۋ ءۇشىن ونەركاسىپ قالدىقتارىن – جىلۋ-ەلەكتر ورتالىقتارى مەن قازاندىقتاردان شىعاتىن كومىر شاڭى مەن كۇلدىڭ ۇساق بولشەكتەرىن قولدانۋ ءتاسىلى زەرتتەلىپ جاتىر. نانوموديفيكاسيالانعان ماتەريالدى ازىرلەۋ قورشاعان ورتانى لاستانۋدان قورعاپ، اۋاداعى زياندى قالدىقتاردى ازايتۋعا وڭ اسەر بەرەدى، – دەدى سالتانات ءاشىموۆا.
