Qazaqstan jol ǵylymi-zertteý institýty Jol qurylys materialdary men jańa tehnologiialar bóliminiń basshysy, himiia ǵylymdarynyń PhD Saltanat Áshimova «Egemen Qazaqstan» gazetine bergen suhbatynda Qazaqstan ǵalymdary jergilikti tabiǵi materialdardy, onyń ishinde áktas pen teńiz qabyrshyǵyn qoldana otyryp, jol qurylysyna berik jáne qolaily kúkirtti-qiyrshyq tasty jasap shyǵarǵanyn aitty.
– Otandyq ǵalymnyń jetistikteri sheteldik innovatsiialardan kem túspeitinin aita keteiik. Mysaly, institýt mamandary kúkirtti bitýmǵa qosymsha nemese almastyrǵysh komponent retinde qoldanýǵa bailanysty zertteýlerdi qolǵa aldy.
Bul – qymbat bitýmnyń shyǵynyn azaitýǵa septesedi. Sonymen birge kúkirttiń kómegimen elimizdiń batys óńirlerindegi jol qurylysyndaǵy ózekti máselelerdi de sheshýge bolady.
Ózderińiz biletindei, Atyaaý, Aqtóbe, Batys Qazaqstan jáne Mańǵystaý oblystarynda qiyrshyq tas óndirilmeitindikten, jolshylarǵa qajetti shikizatty basqa óńirlerden tasýǵa týra keledi. Bul tiimsiz.
Sondyqtan bizdiń ǵalymdar jergilikti tabiǵi materialdardy, onyń ishinde áktas pen teńiz qabyrshyǵyn qoldana otyryp, onyń negizinde jol qurylysyna berik jáne qolaily kúkirtti-qiyrshyq tasty jasap shyǵardy. Sondai-aq bitýmnyń tutqyrlyǵyn jaqsartý úshin ónerkásip qaldyqtaryn – jylý-elektr ortalyqtary men qazandyqtardan shyǵatyn kómir shańy men kúldiń usaq bólshekterin qoldaný tásili zerttelip jatyr. Nanomodifikatsiialanǵan materialdy ázirleý qorshaǵan ortany lastanýdan qorǵap, aýadaǵy ziiandy qaldyqtardy azaitýǵa oń áser beredi, – dedi Saltanat Áshimova.
