قازاەروناۆيگاسيا ۇشۋ قاۋىپسىزدىگىن ارتتىرۋعا جاڭا قادام جاساپ، Air Astana جانە SCAT اۆياكومپانيالارىمەن ىنتىماقتاستىق تۋرالى شارتقا قول قويدى، دەپ حابارلايدى Dalanews.kz.
«قازاەروناۆيگاسيا» رمك ەلىمىزدىڭ جەتەكشى اۆياتاسىمالداۋشىلارى –
«Air Astana» جانە «SCAT» كومپانيالارىمەن ستراتەگيالىق ىنتىماقتاستىق تۋرالى شارتقا قول قويدى. مۇنداعى نەگىزگى ماقسات – قازاقستان رەسپۋبليكاسىنداعى اۋە قوزعالىسى قاۋىپسىزدىگى مەن تيىمدىلىگىن ارتتىرۋ ءۇشىن ۇشقىش پەن اۆياديسپەچەر اراسىنداعى ءوزارا بايلانىستى نىعايتۋ.
جاسالعان شارت اياسىندا اۋقىمدى تاجىريبە الماسۋ باعدارلاماسى باستاۋ الماق. 2025 جىلدىڭ سوڭىنا دەيىن بۇل باستاماعا «Air Astana» اۆياكومپانياسىنىڭ 500-دەن استام ۇشقىشى، «SCAT» كومپانياسىنىڭ 50 ۇشقىشى، سونداي-اق «قازاەروناۆيگاسيا» كاسىپورنىنىڭ كەمىندە 200 اۆياديسپەچەرى قاتىسادى. ەكى تاراپتىڭ وكىلدەرى ارىپتەستەرىنىڭ قىزمەت ەرەكشەلىگىمەن جاقىنىراق تانىسۋ ءۇشىن ءبىر-بىرىنىڭ جۇمىس ورىندارىندا بولىپ، ناقتى جاعدايلارداعى ءوزارا ءىس-قيمىلدى پىسىقتاي الادى.
«Air Astana» مەن «SCAT» اۆياكومپانيالارىنىڭ ۇشقىشتارى اۋە قوزعالىسىن باسقارۋدىڭ اۆتوماتتاندىرىلعان جۇيەسى ورتالىقتارىندا بولىپ، ۇشۋ قاۋىپسىزدىگىنە بىردەن ءبىر اسەرى بار شەشىم قابىلداۋ پروسەسىمەن تىكەلەي تانىسا الادى. ءوز كەزەگىندە، اۆياديسپەچەرلەر ەكيپاج جۇمىسىنىڭ ەرەكشەلىگىن ءىس جۇزىندە ءتۇسىنۋ ءۇشىن باقىلاۋشى رەتىندە پيلوت كابيناسىنا وتىرىپ، كوككە كوتەرىلەدى.
بۇدان بولەك، شارت شەڭبەرىندە اۆياديسپەچەرلەر ستاندارتتى ەمەس جانە اۆاريالىق جاعدايلار ۇلگىسىن كورسەتەتىن تولىق فۋنكسيونالدى اۆياسيالىق سيمۋلياتوردا (FFS - Full Flight Simulator) ۇشقىشتاردىڭ جاتتىعۋلارىنا قاتىسادى. بۇل قازاەروناۆيگاسيا ماماندارىنا ۇشقىشتاردىڭ قاتتى سترەسس جاعدايىندا جەدەل ارەكەت ەتۋگە ارنالعان ءىس-قيمىل الگوريتمدەرىن تەرەڭىرەك زەردەلەۋگە، سونداي-اق تاراپتار اراسىنداعى جالپى ءوزارا ءىس-قيمىل دەڭگەيىن ارتتىرۋعا مۇمكىندىك بەرەدى.
«بۇل جاي عانا كەلىسىم ەمەس، بۇل قاۋىپسىزدىك مادەنيەتىنە جاسالعان ينۆەستيسيا. ىنتىماقتاستىعىمىز ارتقان سايىن ۇشۋ قاۋىپسىزدىگى دە ارتا تۇسپەك. اۆياديسپەچەرلەر مەن ۇشقىشتار اراسىنداعى مۇنداي ءوزارا ءىس-قيمىل ەلىمىزدىڭ بۇكىل ازاماتتىق اۆياسيا جۇيەسىنە وڭ اسەرىن تيگىزەتىنىنە سەنىمدىمىز»، - دەپ اتاپ ءوتتى ءوز سوزىندە «قازاەروناۆيگاسيا» رمك باس ديرەكتورى نۇرجان احمەتوۆ.
ءوزارا ءىس-قيمىلدىڭ جاڭا فورماتى ءوزارا بايلانىس ورناتۋ كەدەرگىلەرىن جويىپ، وپەراسيالىق قاتەلەر ءقاۋپىن ازايتادى، ۇشۋ بارىسىنداعى اقپارات الماسۋ جىلدامدىعى مەن دالدىگىن ارتتىرادى.
ايتا كەتەيىك، 2024 جىلى ەلىمىزدىڭ اۋە كەڭىستىگىندە "قازاەروناۆيگاسيا" رمك ماماندارى 446 106 رەيسكە قىزمەت كورسەتتى، ونىڭ ىشىندە 111 850 قازاقستاندىق جانە 334 256 شەتەلدىك اۆياكومپانيا.
