Qazaeronavigatsiia ushý qaýipsizdigin arttyrýǵa jańa qadam jasap, Air Astana jáne SCAT aviakompaniialarymen yntymaqtastyq týraly shartqa qol qoidy, dep habarlaidy Dalanews.kz.
«Qazaeronavigatsiia» RMK elimizdiń jetekshi aviatasymaldaýshylary –
«Air Astana» jáne «SCAT» kompaniialarymen strategiialyq yntymaqtastyq týraly shartqa qol qoidy. Mundaǵy negizgi maqsat – Qazaqstan Respýblikasyndaǵy áýe qozǵalysy qaýipsizdigi men tiimdiligin arttyrý úshin ushqysh pen aviadispetcher arasyndaǵy ózara bailanysty nyǵaitý.
Jasalǵan shart aiasynda aýqymdy tájiribe almasý baǵdarlamasy bastaý almaq. 2025 jyldyń sońyna deiin bul bastamaǵa «Air Astana» aviakompaniiasynyń 500-den astam ushqyshy, «SCAT» kompaniiasynyń 50 ushqyshy, sondai-aq «Qazaeronavigatsiia» kásipornynyń keminde 200 aviadispetcheri qatysady. Eki taraptyń ókilderi áriptesteriniń qyzmet ereksheligimen jaqynyraq tanysý úshin bir-biriniń jumys oryndarynda bolyp, naqty jaǵdailardaǵy ózara is-qimyldy pysyqtai alady.
«Air Astana» men «SCAT» aviakompaniialarynyń ushqyshtary Áýe qozǵalysyn basqarýdyń avtomattandyrylǵan júiesi ortalyqtarynda bolyp, ushý qaýipsizdigine birden bir áseri bar sheshim qabyldaý protsesimen tikelei tanysa alady. Óz kezeginde, aviadispetcherler ekipaj jumysynyń ereksheligin is júzinde túsiný úshin baqylaýshy retinde pilot kabinasyna otyryp, kókke kóteriledi.
Budan bólek, shart sheńberinde aviadispetcherler standartty emes jáne avariialyq jaǵdailar úlgisin kórsetetin tolyq fýnktsionaldy aviatsiialyq simýliatorda (FFS - Full Flight Simulator) ushqyshtardyń jattyǵýlaryna qatysady. Bul Qazaeronavigatsiia mamandaryna ushqyshtardyń qatty stress jaǵdaiynda jedel áreket etýge arnalǵan is-qimyl algoritmderin tereńirek zerdeleýge, sondai-aq taraptar arasyndaǵy jalpy ózara is-qimyl deńgeiin arttyrýǵa múmkindik beredi.
«Bul jai ǵana kelisim emes, bul qaýipsizdik mádenietine jasalǵan investitsiia. Yntymaqtastyǵymyz artqan saiyn ushý qaýipsizdigi de arta túspek. Aviadispetcherler men ushqyshtar arasyndaǵy mundai ózara is-qimyl elimizdiń búkil azamattyq aviatsiia júiesine oń áserin tigizetinine senimdimiz», - dep atap ótti óz sózinde «Qazaeronavigatsiia» RMK bas direktory Nurjan Ahmetov.
Ózara is-qimyldyń jańa formaty ózara bailanys ornatý kedergilerin joiyp, operatsiialyq qateler qaýpin azaitady, ushý barysyndaǵy aqparat almasý jyldamdyǵy men dáldigin arttyrady.
Aita keteiik, 2024 jyly elimizdiń áýe keńistiginde "Qazaeronavigatsiia" RMK mamandary 446 106 reiske qyzmet kórsetti, onyń ishinde 111 850 qazaqstandyq jáne 334 256 sheteldik aviakompaniia.
