تاۋەلسىزدىكتى مانسۇقتاۋ
مۇرات ابەنوۆ ءوزىنىڭ فەيسبۋك پاراقشاسىندا: «كەڭەس وداعىن اڭساعان كىمدەر؟ قاراعاندى وبلىسى اكىمى جەڭىس قاسىمبەك بۇعان نەگە نازار اۋدارمايدى؟ تەمىرتاۋ دەگەن ءسوزدىڭ جانىنداعى كەڭەس زامانىنىڭ سۆاستيكاسىن الىپ تاستاۋ قيىن با؟ قاشانعى ءسسسر-دىڭ كولەڭكەسىنەن قورقا بەرەمىز؟ ولاي بولسا قازاق ءتىلى، مەملەكەتشىلىك ۇستانىم قالاي داميدى؟ جاستاردى وتانىمەن ماقتانۋعا قالاي ۇيرەتەمىز؟»، – دەپ كوپشىلىكتىڭ كوكەيىندە جۇرگەن سۇراقتى توتەسىنەن قويىپتى.
ءيا، ايتسا ايتقانداي تەمىرتاۋ ەلىمىزدىڭ ءوندىرىستى قالاسى. وسىنداي ماڭىزى زور قالانىڭ قاقپاسىندا كەڭەس زامانىنىڭ بەلگىسىن قالاي قويىپ قويۋعا بولدى؟
بۇگىندە مۇنداي بەلگىنى رەسەيدەن دە تاپپاۋىڭىز مۇمكىن. ال ءبىزدىڭ ەلدە ءالى تۇر. بۇل تاۋەلسىزدىكتى مانسۇقتاۋ ەمەس پە؟
مۇنى وبلىس اكىمى قاسىمبەكوۆتىڭ كورمەۋى مۇمكىن ەمەس. الدە قاسىمبەكوۆ اكىم بولعالى تەمىرتاۋعا ات ءىزىن سالماعان با؟ بۇلاي دەپ تاعى دا ايتا المايسىڭ.
ەگەر جەڭىس قاسىمبەكتىڭ ورنىندا جاسى الپىستى القىمداعان شەندى وتىرسا ونىڭ ارەكەتىن ازداپ بولسا دا تۇسىنۋگە بولار ەدى. ال تاۋەلسىزدىك جىلدارى ساياسي مانسابىن جاساعان جاس ساياساتكەر ءۇشىن بۇل ۇيات.
جەڭىس قاسىمبەك ءوزىنىڭ تەگىنىڭ سوڭىنا «وۆتى» جالعامايتىن ساناۋلى اكىمدەردىڭ ءبىرى. ويتكەنى ول تاۋەلسىزدىكتىڭ بەل بالاسى. تاۋەلسىزدىك جىلدارى مەملەكەتتىك قىزمەتكە ارالاسقان. شەتەل كورگەن ازامات. ءبىراق ونىڭ مىنا ارەكەتىن تۇسىنە المادىق.
كەڭەستىك جۇيەنى بەلگىلەرى مۋزەيدە تۇرۋى كەرەك!
قاراعاندى وبلىسىنىڭ اكىمدىگىندەگىلەر «بۇل بەلگى تەمىرتاۋدىڭ مەتالۋرگتەرىنىڭ ەڭبەگى ءۇشىن بەرىلگەن وردەننىڭ كەسكىنى» اقتالۋى مۇمكىن (ءبىزدىڭ شەندىلەر جۇمىستى قاتىرماسا دا، اقتالۋدىڭ شەبەرى ەمەس پە؟).
ءيا، سولاي دا مۇمكىن. ءبىراق باياعىدا تارقاپ كەتكەن كەڭەس وكىمەتىنىڭ بەلگىسىن قالانىڭ كىرەبەرىسىن ءىلىپ قويا تاۋەلسىزدىككە قاتەر ءتوندىرۋ، جاۋ شاقىرۋ ەمەس پە؟
مۇنداي بەلگىنى كورگەننەن كەيىن كەڭەستىك جۇيەنى اڭساۋشىلار كۇش الا تۇسەتىنى انىق قوي. وسىلايشا شەندىلەر ەلىمىزدە كەڭەس وكىمەتى ەلەسىنىڭ كەزىپ جۇرۋىنە جاعداي جاساپ وتىرعانىن نەگە تۇسىنبەيدى؟
ەگەر تەمىرتاۋلىق مەتالۋرگتەردىڭ ەڭبەگى ءۇشىن بەرىلگەن وردەن بولسا، وسىنىڭ تۇبىمەن قوپارىپ، تەمىرتاۋداعى كوپ مۋزەيدىڭ بىرىنە اپارىپ قويسىن.
بىزدىڭشە، كەڭەستىك جۇيەنى ەسكە سالاتىن بەلگىلەردى مۋزەيلەردىڭ ءبىر بۇرىشىندا تۇرۋى كەرەك. كورگىسى كەلگەن ادامدار مۇراجايعا بارىپ كورسىن. ەگەر جەڭىس قاسىمبەك وسى بەلگىگە جەلىمدەي جابىسىپ قالسا، كابينەتىنىڭ ءبىر بۇرىشىنا اپارىپ قويسىن!
«الگى بەلگى قايدا؟» دەپ كەلگەن ادامعا كورسەتىپ، تاس كەسەكتى سارى مايداي ساقتاپ وتىرعانىن ىزدەپ كەلۋشىگە ايتا جاتار.
كەڭەس زامانىندا قازاق جەرىندەگى كوپتەگەن اۋىلداعى ەڭبەك ۇجىمدارىنا وسىنداي وردەندەر بەرىلگەنىن بىلەمىز. ەگەر ولاردىڭ ءبارى «وتكەن تاريحىمىز، ەڭبەگىمىزدى باعالاۋدىڭ بەلگىسى» دەپ اۋىل مەن قالانىڭ كىرەبەرىسىنە قويا بەرسەك ءبىزدىڭ ەلدىگىمىز بەن تاۋەلسىزدىگىمىزدىڭ بەس تيىندىق قۇنى بولماسى انىق.
نازاربايەۆتىڭ شەندىلەر ورىستىڭ ىعىنا جىعىلا كەتۋگە دايار تۇرادى
نازاربايەۆ داۋىرىندە بيلىككە قول جەتكىزگەن شەندىلەردىڭ بويىندا كەڭەستىك جۇيە مەن ورىسقا قارسى كەلۋدەن (قاراپايىم ءسوز تالاستىرۋ دەڭگەيىندە بولسا دا) قورقاتىن، بويلارىن ۇرەي بيلەگەن شەندىلەردىڭ ۇلكەن شوعىرى قالىپتاستى. اڭگىمەنىڭ اشىعىن ايتساق، ۇكىمەت پەن پارلامەنتتەگى اق جاعالىلاردىڭ ءبارى وسىنداي ۇرەيمەن ءومىر سۇرەدى.
ەگەر ءبىز جاڭا قازاقستاندى شىنىمەن قۇرۋعا بەكىنسەك، قوعام مەن حالىق اراسىندا داۋ تۋعىزاتىن دۇنيەلەردى دەر كەزىندە شەشپەي كەيىنگى ىسىرا بەرۋگە بولمايدى. ءىستى كەيىنگە قالدىرۋ – تىعىرىقتان شىعار جول ەمەس.
ماسەلەنى شەشۋدىڭ ورىنان ونى ۇمىتتىرۋعا تىرىسامىز. بۇل – نازاربايەۆ كەزىندە شەندىلەر اراسىندا ادەتكە اينالعانى جاسىرىن ەمەس. بىزدەر وسى جامان ادەتتەن ارىلۋىمىز كەرەك.
نازاربايەۆ 30 جىل بيلىك قۇرعاندا رەسەيدىڭ بەتىنە سامال بولىپ سوققانىن ءبىر رەتتە كورمەدىك.
سودان ۇلگى العان شەندىلەر ورىستىڭ ىعىنا جىعىلا كەتۋگە قاشاندا دايار تۇرادى.
شەندىلەرىمىز ورىس كورسە، بۇگەجەكتەپ ورىسشا سويلەي جونەلۋدى توقتاتپاسا، ەل ىشىندەگى كەڭەستىك جۇيەنى اڭساۋشىلار ءبىر كەبىستى، ءبىر كەبىسكە سۇعىپ وتىراتىن ەسكى ادەتىنەن ەشقاشان توقتاتپايدى. بۇعان كوزىمىز جەتتى.
كەڭەستىك بەلگىلەر قوعامعا جىك سالاتىن قۇرت
جەڭىس قاسىمبەكتىڭ ازاماتتىق، پاتيروتتىق سەزىمى كەم دەپ ايتا الماس ەدىك. ءبىراق ونىڭ دا وي-ساناسىنا ۇرەي ۇيا سالىپ العان. جەڭىستەي جاس جىگىتتەردىڭ ۇرەيگە بوي الدىرۋى ەلىمىز ءۇشىن ءقاۋىپتى قۇبىلىس.
ءتىپتى، جەڭىس قاسىمبەك تەمىرتاۋدىڭ كىرە بەرىسىندە تۇرعان كىسى بويىنداي سۆاستيكانى الىپ تاستاۋ ويىنا (بۇل ويىنان ءوزى دە شوشىپ تا كەتكەن شىعار) كەلۋى دە مۇمكىن عوي. ءبىراق بويىنداعى ۇرەي ونى الىپ تاستاۋعا مۇمكىندىك بەرمەگەنىن ءىشىمىز سەزەدى.
ارينە، الگى سۆاستيكانى الىپ تاستاعاننان كەيىن تەمىرتاۋدا تۇراتىن ءتورت ورىس (اراسىندا ءورىستىلدى قازاق تا بولۋى مۇمكىن) داۋ شىعاراتىنى انىق. وسىنى بىلەتىن شەندىلەر «سولار داۋ شىعارماسا ەكەن» دەپ ماسەلەنى جىلى جاۋىپ قويا سالاتىنىن دا بىلەمىز (وتىرىك ەمەس قوي).
ءبىراق بويىن ۇرەي بيلەگەن شەندىلەر تەمىرتاۋعا جولى تۇسكەن مۇرات ابەنوۆ سىندى ۇلتجاندى ازاماتتاردىڭ الگى سۆاستيكانى كورگەننەن كەيىن اكىمگە وكپەسىن ايتىپ، ورىندى تالابىن قويۋىن زاڭىدىلىق دەپ قابىلداي الا ما؟ الدە الگى ازاماتتارمەن جاۋلاسىپ، كورمەستەي كەتە مە؟ بۇل ەندى ۇلكەن ماسەلە.
وسى ءبىر جايتتان ەلىمىزدىڭ كەز كەلگەن جەرىندە تۇرعان كەڭەستىك بەلگىلەر قوعامدى ەكىگە جارىپ، جارىلىس تۋعىزاتىن بومبا دەسەك ارتىق ايتقاندىق بولماس.
نازاربايەۆتىڭ ونەگەسى
كەڭەس وكىمەتىنىڭ كەلمەسكە كەتكەنىنە 30 جىل ءوتتى. تاۋەلسىزدىگىمىزگە يە بولدىق.
وسى 30 جىلدا پۋتين «قازاق جەرىندە بۇرىن-سوڭىدى مەملەكەت بولماعان» دەپ يمپەريالىق استامشىلىقپەن اڭگىمە ايتقاندا نازاربايەۆ بيلىگى قازاق حاندىعىنىڭ 550 جىلدىعىن ءار جەردە جەتىم قىزدىڭ تويىنداي قىلىپ وتكىزىپ، جاۋاپ... بەرگەندەي بولدى.
ۇلت كوباسشىسى، ماڭگىلىك ەلدى قۇرۋشى ەلباسىمىز نۇرسۇلتان نازاربايەۆ «ءاي پۋتين، قازاق جەرىندە عاسىرلار بويى مەملەكەتىك قالىپتاسقان، ونىڭ ءبارىن تاريحتان وقىپ، بىلۋگە بولادى» ايتا العان جوق.
30 جىل بويى نازاربايەۆتان ۇلگى العان جەڭىس قاسىمبەكتەي جاس شەندىلەر وسىدان كەيىن تەمىرتاۋدىڭ كىرەبەرىسىندەگى كەڭەستىك جۇيەنىڭ بەلگىسىن ءداتى جەتىپ، الىپ تاستايدى دەگەنگە كىم سەنەدى. سەنۋ قيىن.
وسىندان كەيىن ورىس كورسە قۇيرىعىن بۇتىنا تىعىپ، قىڭسىلاي جونەلەتىن نازاربايەۆتىڭ شەندىلەرىمەن جاڭا قازاقستاندى قۇرۋدىڭ قانشالىقتى قيىن ەكەنىن بايقايسىڭ.
https://dalanews.kz/comment/80999-ados-zhuzikti-aluga-bara-zhatyr
https://dalanews.kz/news/80944-nur-sultan-atauyn-khalyq-qabyldamady
