مەملەكەت باسشىسى بۇل مەيرامنىڭ ەل ءۇشىن ەرەكشە ماڭىزعا يە ەكەنىن اتاپ ءوتتى،- دەپ حابارلايدى Dalanews.kz
"قۇرمەتتى وتانداستار! قازاقستان حالقىنىڭ بىرلىگى مەرەكەسى قۇتتى بولسىن! بۇل – مەملەكەتىمىز ءۇشىن ايرىقشا ءمانى بار مەيرام. جۇرتىمىز ورتاق قۇندىلىقتارعا نەگىزدەلگەن جاسامپاز ماقساتتارعا جەتۋ جولىندا بار كۇش-جىگەرىن جۇمىلدىرىپ، بولاشاققا سەنىممەن قادام باسىپ كەلەدى. كەڭ بايتاق جەرىمىزدە ءتۇرلى ەتنوس وكىلدەرى ءوزارا كەلىسىمدە، ءتاتۋ-تاتتى ءومىر ءسۇرىپ جاتىر"، - دەدى پرەزيدەنت.
ول بيىل قازاقستان حالقى اسسامبلەياسىنىڭ قۇرىلعانىنا 30 جىل تولعانىن جانە وسى بىرەگەي ۇيىم اۋەل باستان ەلىمىزدەگى بەيبىتشىلىك پەن تاتۋلىقتىڭ جارشىسىنا اينالعانىن اتاپ ءوتتى.
"اسسامبلەيا ازاماتتارىمىزدىڭ ءوزارا قۇرمەتى مەن ىرىستى ىنتىماعىنا سۇيەنىپ، ۇلتتى ۇيىستىرۋعا ەلەۋلى ۇلەس قوسىپ كەلەدى. حالقىمىزدىڭ اۋىزبىرشىلىگى مەن تىلەۋلeستىگىنىڭ ارقاسىندا مەملەكەتىمىز دامىپ، قولعا الىنعان اۋقىمدى رەفورمالار تابىستى جۇزەگە اسىرىلا بەرەدى. ەلىمىز تەڭدىككە، ءوزارا سەنىمگە جانە مادەني ءارالۋاندىلىقتىڭ جاسامپاز الەۋەتىنە ارقا سۇيەپ، ەل بىرلىگىن ودان ءارى نىعايتا تۇسەدى. ءبىز جۇرت بولىپ جۇمىلا بىلسەك، كەز-كەلگەن سىناقتى ەڭسەرىپ، بيىك بەلەستەردى باعىندىرامىز. ۇلتىمىزدىڭ ارمان-مۇراتى – ادىلەتتى ءارى قۋاتتى قازاقستاندى بىرگە قۇرامىز. بارشاڭىزعا باق-بەرەكە تىلەيمىن! بىرلىگىمىز بەكەم، اسپانىمىز اشىق بولسىن!"، - دەدى قاسىم-جومارت توقايەۆ.
