ەلەۋمەتتٸك جەلٸدە 89 جاستاعى قارييا كٸسٸنٸڭ اراعا 20 جىل سالىپ تۋعان جەرٸنە بارىپ, باۋىرلارىمەن قايتا قاۋىشقان سەتٸ كٶپشٸلٸكتٸڭ جٷرەگٸن ەلجٸرەتتٸ. تولقىنىسقا تولى بەينەجازبانى قارييانىڭ نەمەرەسٸ مارال جەكە پاراقشاسىندا جارييالاعان, دەپ حابارلايدى dalanews.kz.
بەينەكادرلاردا قارت انانىڭ قىتاي شەكاراسىنان ٶتٸپ, تۋعان-تۋىستارىمەن قاۋىشقان سەتٸ كٶرسەتٸلگەن. كٶز جاسىنا ەرٸك بەرگەن ەجەنٸڭ قۋانىشى جەلٸ قولدانۋشىلارىنا ەرەكشە ەسەر قالدىردى.
"جىلدار بويى ەجەمنٸڭ اڭساعان ارمانى ورىندالىپ, ساعىنىشى باسىلماي جاتىر", – دەپ جازدى مارال.
نەمەرەسٸنٸڭ ايتۋىنشا, ەجەسٸ 1959 جىلى 22 جاسىندا تۋعان اعاسىمەن بٸرگە وتانىنا ورالعان. الايدا قۇجات مەسەلەسٸنە بايلانىستى اتا-اناسى مەن التى باۋىرى شەكارادان ٶتە الماي, قىتايدا قالىپ قويعان.
"كەيٸن اراعا ۇزاق جىلدار سالىپ, 1989 جىلى اتام ارنايى ۆيزا رەسٸمدەپ, ەجەمدٸ تۋعان-تۋىستارىنا اپارىپ كەلگەن. ال 2006 جىلى ەجەم تۋعاندارىن ٸزدەپ تاعى بٸر مەرتە قىتايعا بارىپ قايتقان. سوعان قاراماستان, ەجەنٸڭ ساعىنىشى باسىلعان ەمەس", - دەيدٸ نەمەرەسٸ.
مارالدىڭ سٶزٸنشە, سول كەزەڭدەگٸ قاتاڭ زاڭ تالاپتارى باۋىرلاردىڭ ۇزاق جىلدار بويى بٸر-بٸرٸمەن بايلانىس ورناتا الماۋىنا سەبەپ بولعان.
بەينەجازبا جەلٸدە كەڭٸنەن تاراپ, كٶپشٸلٸك ٶزدەرٸنٸڭ دە تاعدىرلاس وقيعالارىن بٶلٸسە باستادى. كەيبٸرٸ جاقىندارىمەن قايتا قاۋىشقانىن جازسا, ەندٸ بٸرٸ ٶمٸر بويى ساعىنىشپەن ٶمٸر سٷرٸپ كەلە جاتقانىن ايتقان.
قوسىلعان سەتتەگٸ اپالى-سٸڭٸلٸلەردٸڭ قۇشاعى مەن كٶز جاسى كٶرەرمەندەردٸ بەيجاي قالدىرمادى. كٶپشٸلٸك قارييانىڭ ٶمٸر جولىنا تەنتٸ بولىپ, اق تٸلەكتەرٸن جاۋدىرىپ جاتىر.
تلەگەنوۆا ارۋنا
